Amúriajati Páblo jáma lun jayúmuragun lun Búngiu luágu
3
1 Lagúmujoún cátei,
nidújeñu,
ayúmuragua jumá wawágu,
burúgua lámuga ugánu luáguti Wasálbaragüle furése lídan sun fulásu,
resíbiwa ligíame láu ugúndani queísi lasúseredun jagánagua.
2 Ayúmuragua jumá gíñe lun gayára lan weséfurun jaweí wügǘriña wuríbatiña,
lugúndun máma sun gürígia uboúagu afíñetiña luágu Crístu.
3 Ánjeinti Búngiu,
gayáraati wafíñerun luágu,
luágu lagúnfuliruba lan láu lerérun,
lárügüdübadün derégüdagu,
goúnigilaǘnme tueí lisádaran Máfia.
4 Jeménigitiwa luágu Wabúreme Búngiu luágu adǘga jumáni le waríñagubei jun áni luágu jadǘga mémebei lan.
5 Íderagualaǘn Búngiu lun jasándiruni lísiñejabu jun,
lúma lun gagúraasun jumá quei Crístu luágu jasúfurirun.
Lúnti wawádigimaridun
6 Nidújeñu,
aríñagatina jun lídan líri Wabúreme Jesucrístu lun jadísedun lueí furúmieguarügü jídaangiñe le májati luwádigimaridun,
le mabágaridunti úaragua lúma arúfudajani le jibíjubei wámagiñe.
7 Subúdi jumúti ída lúba lan luwúyeri wabágaridun jagánagua lun jafálaruni wáni jémpulu,
merédetiwa mawádigimariga jagánagua.
8 Meígin wamúti jeígin,
mafáyeirunga wameí.
Lubáragiñe líra,
ñadágimeintiwa,
áfaagua wagía wéyuagu áriebu,
lun mámabadiwa lan ában ijǘrügu lun ni ában jídaangiñe.
9 Láu sun garícha wamá yebe lun wamúriajan júma lun jíderaguniwa,
ñadágimeinrügütiwa lun wíchugun ában jémpulu jun lun jafálaruni.
10 Dán meja le júma wamá,
rúwamuti meja gumádi le jun.
“Le májabei luwádigimaridun,
meígalá.”
11 Agáambatiwa luágu añájein lan jídaangiñe májatiña jawádigimaridun,
jerédera madǘgünga ni cáta,
eténira lun le moún lubei jeténirun lun.
12 Waríñaguña joún buri gürígia jagía láu lugúmadin Wabúreme Jesucrístu lun jawádigimaridun darángilañu lun jagáñeirunun jeígan fein.
13 Nidújeñu,
mabúchadalá juágu adǘga buíti.
14 Ánjein ñi ában le madǘgünti gásu láu le waríñagubei tídan gárada to,
aríja jumeí cátei lan,
memétera jumá lúmoun,
barǘ lámuga busíganu.
15 Manǘga jumeí quei ágani,
erérarügü jumá lun queísi idújei.
Lagúmujoún abíniruni
16 Wabúreme Jesucrístu méme le lánina darángilaü,
rúla darángilaü jun lídan sun luwúyeri,
súnwandan.
Júmalá sun jugúya Wabúreme,
súnwandan.
17 Áu Páblo,
nabǘrüjañein mábugaü le jun láu guánarü nújabu lúma nilétüran.
Ítara lúba jasúbudiruni luágu áu lan oúnajabarun gárada to.
18 Binílaün Wabúreme Jesucrístu sun jugúya.
Ítaralá.