3
1 Queísiti jabágariduña lan ában ibágari iséri ladǘga lídaanjadün lan ában lúma Crístu,
áluaja jumeí buri cátei le lánina siélu,
le ñí lubei Crístu ñun lueígiñe loúnwenren Búngiu.
2 Samína jumá luágu buri cátei le lánina siélu,
máma luágu buri le lánina uboú.
3 Jilátün lúma Crístu lun uboú le,
guetó,
níjein jibágari le tímatimaati lúma Crístu le yágütabei siélu lúma Búngiu.
4 Dánme lagíribudun Crístu,
le úmabei lídan wamá ában,
wachǘlaaguba gíñe lúma,
ábame gafánran wamá lídan luweírigun.
Binádu ibágari lúma iséri ibágari
5 Ígira jumeí sun le jigáburibei le láninabei uboú le.
Úa la ni ában jídaangiñe agámariduti mamárieidunga,
madǘgün jugúyame cátei wíyeti,
mafálara jumeí luríban ayúmajani,
maweínamulá jágu luágu cátei le máma jáni,
le méme ájuduraguni joun sándu.
6 Lueígiñe buri cátei le,
láburujan lanárime ligáñi Búngiu jawágun ja madǘgünbaña gásu láu.
7 Jugúya,
adǘga buri jumúti meja cátei le lídan meja binádu jibágari,
8 ánjeinti guetó,
ígira jumeí sún buri cátei le.
igáñi,
iyéreejabuni,
wuríbani,
anábajani,
lúma buri dimúrei wíyeti.
9 Maríñaga jumá iyéeni júmagua quei ígira jumáali lan binádu jigáburi lúma lé buri meja jadǘgübei.
10 Isérijali jigáburi le isérideinábei quei méme ligáburi Búngiu guánarügü le adǘgübalin,
daríme jasúbudiruni Búngiu buídu buídu.
11 Iséri ibágari ligía,
mámaali cátei lánina juríu jumá o máma jumá juríu,
ni lánina jerésibiruni circuncisión lúma merésibirun jumáni,
ni lánina teréncha jumá o máma jumá teréncha,
machǘlaaguntiña,
idámuni,
máma idámuni,
Crístu,
ligía sun cáteibei,
áni níjein gíñe jádan sun lánigu láu láni Espíritu.
12 Jínsiñetün lun Búngiu,
anúadaja láadün lun lánigume.
Ítara líña lubeíti,
abágarida jumá queísi lánigu,
láu gudémejabu,
areíduni,
manáanguni únguaü,
gagáambadi,
lúma gagúraasuni.
13 Gagúraasun jumá jubáruagua,
ferúdunagua jugúyame júmawagua,
ítara quei ferúduna lánün Crístu,
ítaralá gíñe jadǘga.
14 Loúgiñe sun cátei,
jínsiñejabu jumá,
ligía cátei le íchugubalin sun cátei lídan ában,
áni joústagüdaleí lubuídun jigáburi.
15 Abúguraleí lidárangilan Búngiu sun le jadǘgübei,
ladǘga ligía lagúarunbei Búngiu jun lun ábanrügü jumá úgubu,
abágarideina láu darángilaü.
Geteíngiradi jumá gíñe.
16 Buíngüdaloún láni Crístu ugánu janígi le gumúti.
Arúfudaja jumá júmawagua,
aríñagagua jugúyame júmawagua láu lichú áu.
Jerémuja luágu luweírigun Búngiu láu eteíngiruni lun tídan janígi.
17 Furúmieguarügü cátei le jadǘga o le lan jaríñagun,
adǘga jumeí lídan ában luwúyeri le íchuguti inébesei lun Wabúreme Jesucrístu,
eteíngireina Búngiu Úguchili lídaangiñe Jesucrístu.
Igáburi le lúnbei wagáburiduni jáma ja wábiñebaña
18 Würíña,
gagáambadi jumá joun júmarigu,
ligía cátei buíti le lúnbei jadǘgüni queísi afíñetiña luágu Wabúreme Crístu.
19 Wügǘriña,
jínsiñe jamá júmarigu jun,
magáñida jumá jáma.
20 Isáanigu,
agáamba jumáña jagǘbürigu lídan sun cátei,
ladǘga ligía jínsiñebei lun Búngiu.
21 Agǘbürigu,
másügüragualá jagúmadiruniña jisáanigu,
ragǘ jáñein magúraasuni.
22 Esériwidutiña,
gagáambadi jumá joun jiyúbudirigu lídan sun cátei,
mámarügü dan le aríagu jáña lan jun lun jeréderun buídu jagíbugiñe,
adǘga jumeí súnwandan táu sun janígi ladǘga luweírin linében Búngiu jun.
23 Furúmieguarügü cátei le jadǘga,
adǘga jumeí láu ugúndani,
camá jamuga jadǘgüñein lun Wabúreme Crístu máma joun gürígia.
24 Subúdi jumáali luágu líchugubei lan Búngiu alágan jun queísi jafáyeiruaja,
ladǘga lun Wabúreme Crístu le Jabúreme le tímatimaati jesériwida.
25 Ánjeinti le adǘgüti wuríbati,
lerésibirubei lafáyeiruaja wuríbati le ladǘgübei,
áni ában láu lanǘgüniña Búngiu sun gürígia.