2
1 Buséntina lubeíti lun jasúbudiruni luágu luweírin lidíjeri narítagun juágu,
lúma jawágu afíñetiña ja Laodicéabaña,
lúma jawágu sun jíbirigu afíñetiña ja maríjin jamágidinabaña.
2 Weíriti nayúmajan lun gagúraasun jumá tídan janígi,
lun lídan jumá ában láu línsiñejabu Crístu juágu joun jíbirigu,
lun gunfaráanda jumáni linárün Búngiu buídu buídu lun derégüdagu jumá lídan le uágubei jafíñera,
gayára lámuga jasúbudiruni laráansejan Búngiu lé meja arámudaguabei,
le luáguti Crístu guánarügü.
3 Lídaañein Crístu sun linárün Búngiu lúma ubáfu lun gunfaráanda wamáni sún buri inárüni le,
le queísibei ában oúnwenbun irísini woun.
4 Naríñaguñein buri cátei le jun lun mayéedun lánün ni ában láu buri dimúrei buíduburiti.
5 Láu sun úa nan jigíbugiñe lun gayára lan jamúga jaríjinina,
anájein júma lídan espíritu,
áni gúndaatina láu naríjini luágu lídaañein lan dan sun cátei jurúma áni derégüdagu jíña lídan jafíñen luágu Crístu.
6 Ligía,
ítara queísi jerésibiruni Wabúreme Jesucrístu láu sun jafíñen luágu,
lúnti ítara lan jabágaridun lídan ában lúma,
7 lun ragǘñu lan jibágari luágu lídan le jídin jubáruaguoún lúma,
derégüdagu lídan jafíñen ítara queísi larúfudajoúniwa jun,
láu eteíngiruni lun Búngiu súnwandan.
Iséri ibágari lídan Crístu
8 Toúnigi jumá,
mígiraguagüda jumá júngua joun ja busénbaña jayéejan láu buri arúfudajani málati.
Máma lúmagiñeti Crístu cátei le jarúfudajabei,
lúmagiñeti jagáburi binádu mútu lúma buri ligáburi jarítagun gürígia lánina uboú le luágu cátei.
9 Níjein sun le Búngiubei lídan Crístu,
10 áni jugúya,
buin jíña láu Búngiu lugúndun lídaañadün ában lúma Crístu.
Jéreti Crístu lueí sun lúrudu lúma ubáfu le uboúagubei lúma le siélubei.
11 Láu gíñe lídaañadün lan ában lúma Crístu,
queísigubeirügü resíbi jumáali lan circuncisión lé meja jerésibirubei binádu juríu lun jarúfuduni luágu lánigu jamá Búngiu.
Circuncisión le jibíjubei,
máma le adügǘbei láu bíti luágu úgubu,
jáni circuncisión,
láu jasálbarun lídaangiñe figoú le áubei jiábin uboúagun.
Niján luwúyeribei ladǘgüníwa Crístu lun lánigu wamá Búngiu.
12 Láu jabásterún,
arúfuda jumúti luágu bunáwa jumá lúma Crístu lun ibágari le binádubei,
sarátün gíñe lúma lun ibágari le iséribei ladǘga jafíñerun luágu lubáfu Búngiu le ásaaragüdübalin lídaangiñe oúweni.
13 Luágu meja ában dan,
jiláñu jiñá meja lun cátei lánina Búngiu ladǘga jifígoun,
ladǘga gíñe jabágariduña lan queísi gürígia boúguditiña lueí lilúrudun Búngiu,
agúnfulireina lúma sun luríban layúmajan júra.
Ánjeinti guetó,
rújali Búngiu iséri ibágari jun úara lúma Crístu.
14 Láu loúnwen Crístu,
ferúduna láali Búngiu sun wafígoun,
ába lagúmuchaguagüdüni Búngiu lilúrudun Moisés lúma buri sun gumádi le lánina lúrudu ligía le áubei mabáfu wamá lun wagúnfulirun,
queígubeirügü jamúga dágua láni Búngiu lúrudu ligía luágu lugúruwan Crístu.
15 Dan le loúnwenbei Crístu luágu gurúwa,
gáñei lumúti Máfia lúma buri líbiri ubáfu wuríbati,
ába lǘnabudagüdüniña ligíbugiñe guríriguaü,
ába lanǘgüniña quei adaürǘtiña lun.
Áluaja jumeí buri cátei le lánina siélu
16 Úa la ni ában añáwarijati jarítagun luágu buri arúfudajani lánina cátei le lúnbei jeígini o le lan lúnbei játuni lun jagúnfulirun lúma Búngiu,
o luágu lán buri fédu le jarítaguagüle luágu iséri irúmu,
lúma iséri játi,
o luágu lan wéyu le eméraaguagülei.
17 Sún buri cátei le,
lúntirügü lagúnfulirúniwa lúma darí meja liábin Crístu uboúagun,
liyáwa rügǘñein le lúnbei liábin,
Crístu ligía linárünbei.
18 Mígiraguagüda jumá júngua joun ja afámurubaña quei ǘnabugutiña,
ja ájuduragubaña joun ánjeligu,
lun janǘgüni jagáñirun jueí.
Weíriti jadímurejan luágu nege buri cátei le ayáwadaguti joun,
ába buri janáangun joúngua luágu ligáburi jasáminan,
le jáni gürígia.
19 Mámañanu lídan ában lúma Crístu,
le ichǘgüdinaü joun sun lánigu ja gíribaña lúgubu,
le ágüdajabalin úgubu ligía,
le awáanseragüdübadiwa lídan cátei le lánina Búngiu,
ru ligía ubáfu woun lun gayáraabei lan lídan wamá ában queísi labúseeruni Búngiu.
20 Jugúya,
ígira jumáali binádu jigáburi,
queísi lídaanjadün lan ában lúma Crístu,
gidáadün lídaangiñe ligáburi jarítagun gürígia luágu buri cátei.
¿Cáti uágu jabágaridunbei camá jamuga lánigugidün uboú,
21 íchaagua júngua lun ligáburi uboú lun jagúnfulirun lúma Búngiu queí buri jamúga lúrudu le aríñagubei.
“Magúurabeí le,
meígabeí líra,
márügüdabeí cátei ligía”?
22 Sún buri gumádi le,
luáguti buri cátei le gagúmuchaditi láu layúsurún,
áni máma ámu cátei lueí gumádi buri lúma arúfudajani le jáni gürígia.
23 Inárüni luágu gayára lan genége láni buri cátei lánina subúdi lugúndun labúseerúniwa agúnfuliruni lúma ǘnabuni lun lagúnfulirúniwa láu,
áni deréti líra woun.
Láu sun líra,
mabáfuti lúrudu buri ligía lun lídejan luágu luríban jayúmajan gürígia.