LIGÁRADAN PÁBLO JOUN FILÍPOSNA
Labǘrüjan Páblo furísunrugugiñe joun tílana ligílisi to Filíposboun
1
1 Anája áu Páblo lúma Timotéo,
esériwidutiña wagía lun Jesucrístu,
wabǘrüjañoun gárada to jun,
sun jugúya fádirigu jáma esériwidutiña ligílisirugu ja ubúrugubaña Filípos,
jáma jíbiri lánigu Búngiu ja lídaañabaña gíñe ában lúma Crístu Jesúsu.
2 Binílaün Wáguchi Búngiu lúma Wabúreme Jesucrístu,
ibíja jumá giñe darángilaü jámagiñe.
Layúmuragun Páblo jawágu afíñetiña
3 Ságü narítagun juágu neteíngiruni Nubúngiute.
4 Súnwandan nayúmuragun lun Búngiu juágu láu ugúndani,
5 Láu narítagun luágu luweírin jíderagunina abúruchaguagüdei ugánu le lánina asálbaruni lúmagiñe wéyu le jagáambubalin chülǘ lúmoun wéyu le ugúñebei.
6 Choúru numúti luágu Búngiu lan le agúmeserubei adǘgei lubuídun luwádigimari jídan,
lasígira mémeba lan adǘgei daríme wéyu le liábingüle Jesucrístu.
7 Richáti lun narítagun juágu ítara lugúndun weíriti jínsiñe nun,
lugúndun gíñe gafánran jumá lídan abíniruni le nánibei dan le furísunruguñadina lan luágu nesériwidun lun Crístu,
o dan lan le naráramun ligíbugiñe lúrudu lun nadímurejan lueígiñe loúbadina ugánu le lánina asálbaruni lun nachoúruruni joun luágu inárüni lan.
8 Subúdi lumúti Búngiu luágu weíri lan nálugun juágu lugúndun jínsiñetün nun queísigubeirügü jínsiñe jumá lun Jesucrístu.
9 Amúriajatina lídan nayúmuragun lun Búngiu juágu lúntima laweíridun jínsiñejabu láu sarágu subúdi lúma gunfaráandaü lídan sun cátei,
10 lun gayára lan janúadajani cátei le buídubei súnwandan.
Ítara lúba jabágaridun ában ibágari jarúmati,
madúnrun jumámuga dánme liábin Crístu.
11 Amúriajatina lúma Búngiu lun buin jumá láu lubuídun igáburi,
láu lubáfu Jesucrístu le jídaanbei,
lun líchugúniwa uweíriguni lun Búngiu luágu.
Crístu ibágaribei nun
12 Nidújeñu,
buséntina jasúbudiruni luágu cátei lán buri le suséreelibei nun,
ñǘbinjali lídan linárün lun líderagun lídan lapúrichijoún ugánu le lánina asálbaruni.
13 Subúdi jamúti lubeíti sun tisúdaraana lúban urúei jáma sun ja jíbiri luágu nadaürǘña lan lueígiñe nesériwidun lun Crístu.
14 Játi jíbiri idújeñu,
láu jaríjin luágu nadaürǘña lan lueígiñe napúrichijani ugánu luágu Crístu,
ragǘjaña anígi lun japúrichijani méme ugánu ligía manúfudeiga,
láutima afíñeni luágu Crístu.
15 Inárüni luágu añájein lan adímurejatiña luágu Crístu ladǘga jagímugan,
busén jagía janǘgüniña gürígia jánigume.
Ánjaña jíbiri,
japúrichijan luágu Crístu láu lubuídun arítaguni.
16 Gürígia jagía,
luágu ínsiñejabuni japúrichija,
lugúndun subúdi jamáni luágu lueígiñe lan nadímurejani ugánu le lánina asálbaruni nadaürǘña lan.
17 Ánjaña ja jíbiri,
máma láu janárün japúrichija,
lun jarijíniwa weírigu jadǘgei,
lúma lun jíchugun líbe samínaü nun guetó le nadaürǘña lan.
18 Wel,
úati cátei luágu líra,
lídan sun luwúyeri,
láu yebe janárün o máma lan láu,
luágu Crístu jadímureja,
áni gundaatina luágu líra.
Áni nagúndaarúba gíñe,
19 lugúndun subúdi numúti luágu buídubei lan nasálirun lídan sun cátei le,
ladǘga jayúmuragun lun Búngiu nuágu lúma ladǘga líderagunina láni Jesucrístu Espíritu.
20 Cátei le nabúseerúbei lúma le nagúrabubei,
lun madǘgün nan ni cáta lun jamúga nanǘgün busíganu luágu,
gayáraarügü lámuga nadímurejan manúfudeiga,
arijúa mémetima lámuga luweírigun Crístu nuágu guetó quei súnwandan,
wínwañu áu yebe,
jiláñu áu yebe.
21 Lugúndun ánjana abágarida méme,
lúnba Crístu nabágarida,
ánjana oúwe,
buítimaabei nun lugúndun lúmounbadina Crístu.
22 Ánjein gayára lubeí nasígirun ñadágimein luágu láni nabúreme Crístu fuleísei láu nasígirun abágarida,
ibídiñeti nun ca lan buítimaabei,
ánjein lun lubeí nasígirun wínwañu ódi lun noúnwen.
23 Jénreenguti nun lun nanúadajan lídan bián cátei le.
lídan ában oúbaü,
buséntina jamúga noúnwen lun nídin erédera lúma Crístu,
lugúndun buítimaati jamúga líra nun,
24 lídan le ában oúbaü,
buítimaati jun lun nasígirun abágarida.
25 Áni quei choúru náni cátei le,
subúdi numúti luágu nerédera mémeba lan júma lun níderagunün lun jasígirun jubáruaguoún,
lun gíñe jagúndaaruntima lídan jafíñen.
26 Ítara lúba jiñúragüdüni líri Crístu Jesúsu luágu lagíribudagüdünina júmoun.
27 Joúcha jumá lun úaragua lan ligáburi jabágaridun lúma larúfudajan Crístu.
Ítara lúba,
ánjana ñǘdün aríjaün o ánjein díseñu níña lubeí jueí lun agáambarügü nan juágu,
gayára lámuga nasúbudiruni luágu derégüdagu meme jíña lan áni lídaañadün lan gíñe ában,
áfaagua súngubei lídan ában lun labúruchagun afíñeni luágu Jesucrístu queísi Wasálbaragüle,
28 mígiraguagüdünga júngua lun janúfudedagun jaweí jáganiñu.
Ladǘga jáganiñu lan gürígia jagía,
arúfuda lumúti líra furáangu luágu joúdiña lan lídoun gürínguaü,
arúfuda lumúti gíñe jasálbarun jugúya le afíñebei,
áni lúmagiñe Búngiu liábin cátei le.
29 Ladǘga Crístu,
gayáraati mámarügü lun jafíñerun luágu,
gayáraati gíñe jasúfurirun lueígiñe.
30 Jugúya núma,
lídaañadiwa ában méme áfaaguni.
Aríja jumáali meja ída líña lan náfaagun,
guetó agáambatün luágu ída líña méme lan náfaagun.