Lubáfu Páblo queísi apóstolu
10
1-2 Aríñawagúati luágu gudémegu nan dan le júma nan,
ánjein lan dan le díse nan jueí,
derégüda lan noúserun júma.
Áu Páblo,
ayúmuraguatina jun láu ában ǘnabuni lúma ában areíni líbe le larúfudubei Crístu,
lun mafósurun jubádina lan lun narúfuduni nubáfu láu nafáyeigüdünün luágu wuríbati le jadǘgübei,
dánme le nachǘlürün júmoun.
Sáansi jumeí ligáburi jarítagun wawágu,
jugúya le aríñagubei luágu lun lan waríjin cába lan waságara lídaangiñe wesériwidun lun Crístu.
Ánjein madǘgün jumá,
aráansetina lun nagágibudagun júma.
3 Inárüni luágu uboúaguna wamá láu sun jadébilin gürígia uboúaguna,
máma queísi wügǘriña lánina uboú le wawúribuja luágu wuríbani.
4 Máma uboúaguna áruma to áuboun wawúribuja,
larúmate Búngiu wayúsuruboun lun tagǘnrinchagun érei.
5 Ítara líña lubeíti,
láu lubáfu Búngiu güríngua wamúti sun arítaguni le múaraanbei lúma linárün Búngiu,
lúma sun cátei le abúseerúbei leréderuni lasúbudirúniwa Búngiu.
Sun gíñe jasáminan gürígia uboúagu rúwamuti lábugiñoun lubáfu Crístu lun lúaraduba lan láu le lubeíbei.
6 Áni lárigiñe jíchaagun júngua le gumúti lábugiñoun lagúmadijan Crístu,
aráanseñu wáña lun wasúfuriragüdüniña ja magáambadigiñabaña lun.
7 Barǘ jumuti cátei quei larijíniwa boúgudigiñe libíti.
Aríñagatina jun luágu ánjein lan choúrugua lubeí ában gürígia lúngua luágu lánigu lan Crístu,
lúnti gíñe lasúbudiruni luágu ítara méme líña lan lánigu wamá gíñe Crístu.
8 Fágua jarítagun luágu néredun murúsun lueí le lubúdubu luágu nubáfu queísi láni Crístu apóstolu,
úabei nibúsigari nan luágu líra,
lugúndun Búngiu guánarü rúlaali ubáfu le nun lun nawáanseragüdünün lídan cátei lánina Búngiu,
máma lun nagǘnrinchaguni jafíñen,
queísi jadǘgüni arúfudajatiña jagánagua guetó.
9 Mabúseerúntina lun jarítagun luágu náluguña lan nebélaagüdün anúfudei jídoun táu nigáradan.
10 Aríñagatiña náganiñu luágu abǘrüja nánun gárada queísi ában gürígia láuti sarágu ubáfu,
áni derégüdatí nege nerérun jun tídan,
dan le júma nan,
débilitiná nege,
áni mínsiñegu lán nege ligáburi nadímurejan.
11 Furúmieguarügü le aríñagubalin cátei le,
lúnti gíñe lasúbudiruni luágu ítara lan quei nubeí láu dimúrei díse jueí,
ítara núba lan gíñe dánme le júma nan.
12 Míchaaguntiwa woúngua jámoun ja adímurejabaña buídu jawoúgua,
mítaraantiwa quei jagía.
Jagía,
adǘgatiña ában libídiouniga áu láu jamísuraagun joúngua láu guánarügü jamísuraagüle lúma láu jíchaagun joúngua jámagua.
13 Wagía,
mapántajaanbadiwa luágu wawádigimaridun lun Búngiu lídan ában fulásu le ñílumuti míchugun lan Búngiu ǘma woun lun wesériwidun lun ñi,
queísi jadǘgüni arúfudajatiña jagánagua guetó.
Búngiu arúfudubalin lébeja fulásu le lúnbei wawádigimarini lun,
áni ligía ánjarubei lun wachǘlürün júmoun ubúrugun Corínto.
14 Ligía mídin wabeí sügǘ láu le labúseerubei Búngiu wadǘga lídan le wáfaagun lun wíderagunün,
ladǘga wagía anǘgübalin ugánu luáguti Crístu jun furúmiñe.
15 Mapántajaantiwa láu wadágimanu le jadǘgübei ámu,
camá jamuga wadǘga.
Agúrabarügütiwa lun quei lan lagánwoundun jafíñen,
gayáraabei lan wawádigimaritima jagánagua,
súnwandan quei lugúndan Búngiu.
16 Lárigiñeme,
jarítaguatiwa wadíseduntima lun wapúrichijani ugánu lánina asálbaruni lídan buri fulásu le díseti jueí,
le ñí lumuti magáambungiña lan luágu Crístu,
lueí wapántajan luágu wadágimanu le jadǘgübei ámu,
camá jamuga wadǘga.
17 Le busénti ladímurejan luágu uweíriguni,
ladímureja luágu luweírigun Crístu,
máma luágu luweírigun guánarü.
18 Lugúndun gürígia le buídubei,
máma le adímurejabei buídu luoúgua,
le uágubei buídu lan ladímurejan Wabúreme Crístu,
ligía buídubei.