Ugánu luáguti iséri darádu
3
1 Dan le waríñaguni cátei le,
¿genége lumúti jun luágu wagúmeseruñaya lan adímureja buídu wawoúgua?
¿Ódi gásu funági warúfudun gárada jámagiñetu ámu mútu jun to adímurejatu luágu lubuídun wagáburi lun gayára lan jerésibiruníwa,
o wamúriajan lan gárada júmagiñetu joun ámu mútu,
quei jadǘga jíbiri mútu?
2 Uá,
lugúndun jugúya afíñetiña,
ítara jíña queísi ában gárada to adímurejatu luágu lubuídun wawádigimaridun jagánagua,
ítara jíña quei ában gárada to bürǘwañutu tídan wanígi,
to gayáraaboun jalíijanun sun gürígia,
asúbudiragüdei cátawa lan.
3 Ítara jíña queísi ában gárada to labǘrüjan Crístu guánarügü,
to wedéregeruboun,
ában gárada jugúya to abǘrüjoúboun láu láni Búngiu le wínwanbei Espíritu,
máma láu tínta,
áni tídan janígi ladǘgei Espíritu ligía wadágimanu,
máma luágu dǘbü.
4 Gayáraati waríñagun luágu buídu lan wesériwidun lun Crístu ladǘga wadǘgüni jeménigiñu luágu Búngiu lun líchuguni ubáfu woun lídaangiñe Jesucrístu.
5 Mabáfutiwa lun ni cáta láu wáni woúngua,
sun le wayáraabei adǘga,
lúmagiñe Búngiu liábin.
6 Rújali ubáfu woun lun wesériwidun lun láu wasúbudiragüdüni iséri lidáradun jáma gürígia lun jasálbarun.
Iséri darádu ligía,
mítaraanti quei lé meja binádu,
lé meja lánina lúrudu bürǘwati le lúnbei lagúnfulirúniwa láu,
lánina ában ibágari le erésibirúti lúmagiñe Sífiri Sándu.
Lúrudu ligía,
le lilúrudun Moisés,
arúfudarügü lumúti wafígoun ligíbugiñe Búngiu,
figoú ligía,
oúweni lafáyeijabei.
Ánjeinti Sífiri Sándu,
rúti ibágari joun sun ja ánjabaña lun.
7 Lilúrudun Moisés le,
abǘrüjoúati luágu dǘbü.
Dan le lerésibirubalin lúrudu ligía lúmagiñe Búngiu lun líchuguni joun Israelítagu,
ñíñein ában oúnwenbun larúgounga lúmagiñeti Búngiu ligíbuagu darí lun siñá lán meja jaríaguni gürígia jagía ligíbu Moisés,
lugúndun weíriti lámiridun ligíbu.
Láu sun líra,
ába éñegucheina lan larúgounga ligía murúsun murúsun.
Ánjein láu lubeí sarágu uweíriguni liábin lúrudu ligía le asíadijabei gürígia lun oúweni,
8 ¡weíritimaati luweírigun ugánu le lanǘgübei Sífiri Sándu woun luágu Wasálbaragüle!
9 Ánjein weíri lubeí luweírigun meja lúrudu le esériwidubei lun larúfuduni wadúnrun ligíbugiñe Búngiu woun,
¡weíritimaati luweírigun ugánu luágu Wasálbaragüle le adǘgübalíwa richágua ligíbugiñe Búngiu!
10 Ni cáta luweírigun lilúrudun Moisés ligíbugiñe luweírigun Wasálbaragüle.
11 Ánjeinti weírigu lubeí meja darádu le lúnbei ladúrarun murúsunrügü dan,
weíritimaati luweírigun darádu le lúnbei ladúrarun lun sun dan.
12 Ladǘga níjein lan eménigini le wawágu,
luágu siñá lan leféridiruni ugánu luáguti Crístu luweírigun,
wapúrichijánbei furáangu.
13 Madǘgüntiwa queí meja Moisés,
adáuragua láu ligíbu táu ában bélu lun maríjin jamáni Israelítagu léñeguchun larúgounga ligía le siñábei ladúrarun,
marámudaguntiwa láu ugánu lánina wasálbarun ni murúsun.
14 Derétu janígi Israelítagu jagía lun laníchigu lilúrudun Moisés joun,
queísigubeirügü jamúga núrein lan bélu darúgu láu jasáminan.
Íbini guetó,
dan le jalíijan tídaangiñe líburu to lilúrudun Moisés,
bélu méme tugúya to luáguboun jasáminan,
mígirun tumútiña lun gunfaráanda jamáni laníchigu binádu lidáradun Búngiu joun,
siñáti jasúbudiruni luágu gúnfuliwa lan sun laníchigu binádu darádu ligía lídan Crístu le Wasálbaragüle.
15 Chülǘ lúmoun dan le,
dan le jalíijanun líburu buri to labǘrüjaboun Moisés,
darúguatu ában bélu láu jachǘgü lueí gunfaráanda jamá.
16 Ánjeinti dan le lígiruni ában gürígia binádu ligáburi lun leíbugun lúma Crístu,
ába tagídarún bélu tugúya lueí.
17 Wabúreme Crístu,
ligía Espíritu le íchugubei ibágari.
Láu Espíritu ligía (le méme Sífiri Sándu) wádan,
sálbatiwa,
máfaagunga wagía lun wagúnfulirun láu lilúrudun Moisés.
18 Ligía sun lubeí wagía afíñetiña luágu Crístu,
gidáwaaru bélu lueí wasáminan,
subúdi wamúti Crístu furáangu,
láu sun luweírigun.
Ítara wáña quei ában isúbusein to arúfudubalin luweírigun Wabúreme Crístu,
áni láu wasígirun íchigei warítagun luágun,
sáansiguagüda lumútiwa láni Espíritu murúsun murúsun lun ítara wamá queí ligía.