2
1 Ligía mídinya nubeí bisídaün lun nírudaguagüdünün.
2 Lugúndun ¿ída lubásan gayára lan jamúga nagúndaarun lárigiñe níchuguni íruni joun gürígia ja agúndaaraguagüdübalina?
Siñáti jamúga.
3 Ligía nabǘrüjanbei jun ítara,
lun gayára lan jaráanseruni cátei le mégeibei jídaangua lubáragiñe nachǘlürün júmoun,
dánme lámuga nachǘlürün,
mibíjin námuga íruni júmagiñe,
jugúya le lúnbei nibíjin ugúndani júmagiñe.
Subúdi numúti luágu láu lan jamúga nasándirun ugúndani,
jasándiruña lan jamúga gíñe ugúndani.
4 Dán meja le nabǘrüjanbarun gárada tugúya jun,
weíriti meja nidíjeri juágu darí lun nayájun lídan le nabǘrüjabarun.
Máma meja lun nírudaguagüdünün nabǘrüjoun jun ítara,
nabǘrüjanun lun jasúbudiruni luweírin nínsiñejabu jun.
Ferúdun lun lé meja afígounjabei
5 Le rújalibei íruni láu luríban leménerun,
máma rügǘñein nun líchiga íruni,
rúlumuti gíñe jun lídan ában luwúyeri.
Naríñagunbei “lídan ában luwúyeri” lun maweírin lan naweíridaguagüdüni jun.
6 Abeíchuni lé meja jaríñagubei lídan jadámurin lun líchugúniwa luágu gürígia ligía,
buídurügaali.
7 Guetó,
lúnti ferúduna jumáni,
ru jugúyame gurásu lun lueí ladǘgün sarágu íruni wuríbati lun.
8 Ligía nayúmuragunbei jun lúnya jarúfuduni jínsiñejabu lun.
9 Abǘrüjatina jun luágu cátei le lun gíñe nasúbudiruni ánjein aráanse jubeí lun jadǘgüni le nubeíbei jun.
10 Guetóti,
le únti ferúduna jumá furúmieguarügü cátei,
ferúduna nubeí gíñe,
ánjein gíñe níjein lubeí cátei le lúnti ferúduna náni gürígia ligía luágu,
ferúduna numúti ligíbugiñe Crístu,
jueígiñe.
11 Lídan ában cátei líbe líra,
mabúseerúntiwa wíchugun lúgaaru lun Máfia lun lanǘgün ában gürígia le máma láni lárigoún lídoun lubáfu,
subúdiwati lumáñaan Máfia buídu buídu.
Madárangilan lan larítagun Páblo ubúrugu Tróas
12 Dán meja le nachǘlürünbei ubúrugu Tróas lun napúrichijani ugánu luáguti Crístu,
ába nibíjin ában oúnwenbun cháansi ñi lun nuwádigimaridun luágu Wabúreme.
13 Madárangilaanti narítagun lugúndun madári náni wadúje Títo Tróas lun nagáambun lúma juágu.
Ligía nayoúragunbei joun wadújeñu ja Tróasbaña,
ába nídin loúbawagun Macedónia lun nadúnragun lúma Títo ñi.
Gáñeitiwa láu lubáfu Crístu
14 Buíti lasálirun sun cátei.
Teínqui wamúti Búngiu le anǘgübaliwa lídoun sun fulásu,
amáchareina wagía lábugiñe lagúmadijan Wábuti Jesucrístu,
le súnwandanbei lagáñeiragüdüníwa lídan sun lénreengúnga.
Yúsu lumútiwa Búngiu lídan sun fulásu lun wasúbudiragüdüni ugánu luáguti Crístu,
queísi lirímichúniwa líjeme cupáli.
15 Lugúndun ítara wáña quei cupáli le lágudajabei Crístu lun Búngiu,
ñǘdüntiwa láu ugánu luáguti Crístu,
le queíbei líjeme cupáli,
joun ja lúnbaña jerésibiruni ugánu ligía lun jasálbarun,
jáma gíñe ja lúnbaña merésibirun jamáni ugánu ligía lun jeféridirun.
16 Joun ja merésibirunbalin ugánu ligía,
ítara líña quei ában íjemeni le gáfarajati,
ánjein joun ja erésibirubalin,
ítara líña quei ában árani le areídaguagüdüti.
¿Cáti gabáfubei lun lasúbudiragüdüni ugánu luáguti Crístu?
17 Wagía le loúnajabei Crístu,
gabáfutiwa,
ladǘga mítaran wamá queísi arúfudajatiña yéetiña jagánagua,
ja asáansiragubalin linárün Búngiu quei jabúseerun lun jaríjin cába lan jagáñeira lídaangiñe.
Lubáragiñe líra,
apúrichija wamúti Lerérun Búngiu quei lubeí,
ligíbugiñe Búngiu,
wagía queísi loúnajan Búngiu ja lídaanbaña ában lúma Crístu.