Loúndarún seínsu joun idújeñu lueígiñe Jesucrístu
16
1 Luágu loúndarún seínsu joun wadújeñu lueígiñe Jesucrístu ja gudémebaña yágüta Jerusalén,
adǘga jumeí quei narúfudajani tídan sun ligílisi loúbawagu Galácia.
2 Ságü wéyu dimáasu,
cáda ában jídaangiñe lúnti ladíreirun murúsun lídaangiñe le lagáñeirubei,
ábame lareíduni lun dánme lan nachǘlürün,
merédedünme oúndaragua seínsu.
3 Dánmeti le nachǘlürün,
noúnajabaña gürígia ja janúadajabaña ubúrugu Jerusalén,
ábame níchugun gárada joun lun janǘgüni seínsu le joúndarubei joun wadújeñu ja ñíbaña.
4 Ánjein gíñe lun lubeí nídin,
joúdiba núma.
Laráansejan Páblo lubá luweíyasun
5 Lídan nuweíyasun,
násügürüba loúbawagugiñe Macedónia lun neréderun átiri wéyu ñi,
nachǘlürüba lubeíti ubúrugu Corínto lárigiñe.
6 Fágua neréderagun júma átiri dan,
o násügürüni lan sun juyáabun ñi,
gayáraabeiti jíderagunina lídan nuweíyasun léme ñíjin lumúti nídin lárigiñe nebélujan júmoun.
7 Mabúseerúntina chülǘguarügü nan aríjaün,
buséntina neréderagun átiri dan júma,
ánjein busén Wabúreme.
8 Neréderuba ya ubúrugu Éfeso darí luwéyuri Pentecostés,
9 lugúndun níjein ában oúnwenbun cháansi nuágu lun nadímurejan luágu Wabúreme Jesucrístu ya,
áni buídubei lanǘgün.
Añájein gíñe gíbetiña gürígia mabúseerúntiña lun nuwádigimaridun luágu Wabúreme ya,
ligía siñábei lubeí nígiruni Éfeso guetó.
10 Dánme le lachǘlürün Timotéo,
joúcha jumá lun gúnda lan jagánagua,
lun úa lan sarágu samínaü luágu,
lugúndun luwádigimariña luágu Wabúreme Jesucrístu queísi áu.
11 Manǘga jumeí quei ni cáta.
Dánme le gumúlaali lidáani júma,
jíderagueime lun gayára lan lagíribudun númoun láu ában ugúndani tídan lanígi luágu lubuídun lidáani júma.
Nagúrabajañein ya Éfeso jáu sun jíbiri wadújeñu lueígiñe Jesucrístu ja lúnbaña jayábin úara lúma.
12 Ayúmuraguatina yebe lun Apólos lun lídin jáma jíbiri wadújeñu aríjaün,
jénreenguti lídin guetó,
lídiba dánme le gayára lan.
Lagúmujoún buri mábugaü
13 Ítara méme jumá agágudañu,
toúnigiñu lueí cátei le jamúga gayáraabei ladíñurunün lueí lubuídun ǘma le gádaanbalün,
derégüdagu jumá lídan jafíñen.
Agáburida jumá quei wügǘriña ja awáanserubaña lídan le inárünibei,
manúfudeiga,
jére jumá,
gáñei jumámuga luágu wuríbani.
14 Sun cátei le jadǘgübei,
adǘga jumeí láu ínsiñejabuni.
15 Nidújeñu,
subúdi jumúti luágu Estéfanas lan jáma sun tílana lúban furúmiñebaña loúbawagua Acáya ígirutiña binádu jagáburi lun jerésibiruni Crístu,
luágu gíñe derégeguaaña lan joúngua lun jesériwidun joun wadújeñu lídan afíñeni lídan furúmieguarügü cátei le jayáraati.
16 Buséntina lubeíti lun gíñe jíchaagun júngua joun,
lúma joun sun ja ídejabaña,
ñadágimein jagía ítara.
17 Gúndaatina láu jayábin Estéfanas,
Fortunáto,
lúma Acáico ñájoun.
Weíriñajati nisáminan juágu,
áni siñáti jiábin sun jugúya,
18 ába jíchugun wügǘriña jagía gurásu nun láu janǘgün ugánu nun juágu.
Afíñetina luágu janǘgüba lan gíñe gurásu jámagiñe luágu jadímurejan jun nuágu.
Lúnti jeteíngiruni Búngiu jawágu gürígia ítaratiña.
19 Mábuga jáña tílana ligílisi buri to loúbawaguboun Ásia jun.
Mábuga jáña gíñe Aquíla túma Priscíla jáma sun ja oúndaragubaña jábiñe jun,
queísi afíñetiña luágu Crístu.
20 Mábuga jáña sun idújeñu ja yábaña jun.
Chúgua jumá júngua lídan líri Wabúreme,
arúfuda jumámugei luágu lídaañadiwa lan ában wámagua.
21 Áu Páblo,
noúnajañein mábugaü le jun le nabǘrüjabei láu nújabu lúma nilétüran.
22 Le mínsiñejabuti lun Wabúreme Jesucrístu,
reídeilá lábugiñe líñaragun Búngiu.
¡Giríbubá furése uboúagun,
Wabúreme!
23 Binílaün Wabúreme Jesucrístu.
24 Oúnaja numúti nínsiñejabu lídan Jesucrístu jun,
sun jugúya.
Ítaralá.