11
1 Áyeija jumeí nigáburi queísi náyeijani ligáburi Crístu.
Würíña lídan joúndaragun afíñetiña
2 Nidújeñu,
gúndaatina jáu luágu súnwandan lan jarítagun nuágu,
lúma luágu falá jumani arúfudajani le níchugubei jun.
3 Guetó,
níjein ámu arúfudajani le nabúseerubei lun gunfaráanda jumáni,
luágu Crístu lan lichǘgüdinabei cáda wügǘri,
wügǘri tichǘgüdina lúmari,
ítara quei Búngiu lan lichǘgüdinabei Crístu.
4 Nibúsigarídünati lun ladáuragun ában wügǘri láu lábulugu dan le layúmuragun lun Búngiu,
eteíngirei lídan jadámurin afíñetiña,
o dan lan le laríñagun ugánu le ladímurejan Búngiu liyúmulugugiñe wügǘri ligía,
ladǘga láu líra,
larúfuduñein luágu níjein lan ában wügǘri weírigutimaati lanǘgüni lueí lídan adámurini ligía,
áni Crístu rügǘñein weírigu jádan sun wügǘriña.
5 Nibúsigarídünati gíñe lun madáuragun tan wǘri láu tábulugu dan le tayúmuragun lun Búngiu,
eteíngirei lídan jadámurin afíñetiña,
o dan lan le ladímurejan Búngiu tiyúmulugugiñe,
ladǘga láu líra tarúfuduñein tamájarun lun tanǘgüni wügǘri weírigu sügǘ táu,
wuríbati líra,
queísigubeirügü jamúga lasarún tídiburi queísi wügǘri.
6 Ánjoun madáuragun ában wǘri láu tábulugu,
buítimaati lun tásaruni sun tídiburi,
áni ánjein busíganudüna lubeí tíbuguni wǘri tídiburi o tásaruni lan tábulugu,
darúguatá láu tábulugu.
7 Moún lumuti ladáuragun wügǘri láu lábulugu lídan jadámurin afíñetiña lugúndun liyáwa Búngiu ligía,
áni arúfuda lumúti luweírigun Búngiu.
Ánjounti wǘri,
arúfuda tumúti luweírigun wügǘri,
8 lugúndun dan le ladǘgünbalin Búngiu wügǘri,
máma tídaangiñe wǘri ladǘgei,
wǘri ladǘgüboun lídaangiñe wügǘri.
9 Adǘga lumútu Búngiu wǘri lun wügǘri,
máma wügǘri tun wǘri.
10 Ligía lúnti lubeí tadáuragun wǘri láu tábulugu lídan jadámurin afíñetiña queísi liseíni derégüdaguaü lábugiñe lagúmadijan wügǘri,
lúma lun jagúndaarun ánjeligu láu tagúfurumadun.
11 Láu sun líra,
lídan wabágari queísi afíñetiña,
mégei lumútu wügǘri wǘri,
mégei tumúti gíñe wǘri wügǘri.
12 Queísi inárüni lubeí luágu lídaangiñe lan wügǘri tadügǘwa wǘri,
ítara líña gíñe inárüni lan luágu wǘri lan íchugubalin wügǘri uboúagu,
áni sun cátei lúmagiñe Búngiu liábin.
13 Ítara líña lubeíti,
samína jumá júngua ánjein buídu lubeí lun tayúmuragun wǘri lun Búngiu lídan adámurini madáuragunga láu tábulugu.
14 Jéchutiwa wagía gürígia lun warítagun luágu busíganu lan lun migínagu lan lídiburi wügǘri.
15 Ánjoun wǘri,
ában uwéndeni tun lun migínagu lan tídiburi,
ligía líchugúnbei ídiburi migínaguti tun lun tadáuragun láu tábulugu.
16 Ánjein níjein lubeí busénti lasígenejan luágu cátei le,
lúnti lasúbudiruni luágu ni lan wagía,
ni já buri jíbiri tílana lilígilisin Búngiu masúbudiruntiwa ámu igáburi lueí líra.
Luríban jagáburi afíñetiña dan le jeígin luágu lidábulan Wabúreme Jesucrístu
17 Nabǘrüja jun guetó luágu ában cátei le siñábei naríñagun luágu buídu lan jadǘgüni,
lugúndun genége lumúti luágu adǘga lán buri joúndaragun dáñu jun lubáragiñe jamúga ladǘgün buíti.
18 Furúmiñeti cátei,
aríñawagúati nun luágu dan lan le joúndaragun,
níjein lan fánreinguaü jídan,
áni afíñetina luágu níjein lan inárüni lídan le aríñawagúbei.
19 ¡Fágua lúnti ñi lan fánreinguaü jídan lun lasúbudirúniwa cátaña lan afíñetiñabaña ja tímatimaatiña!
20 Láu buri fánreinguaü le,
dan le joúndaragun lun jeígin luágu lidábulan Wabúreme Jesucrístu,
siñáti jeígin láu ában igáburi le íchugubei inébesei lun,
21 lugúndun dan le lachǘlürün óra lun jeígin,
meígintǘn nege lídan ában.
Lubáragiñe líra,
cáda ában,
ába loúfudajan eígei eígini le lanǘgübei.
Ja siñábei janǘgün gíbeti,
ába jeréderun láu jaláma.
Jayábiti jídaangiñe,
ába játun sarágu darí lun jabácharuadun.
22 ¿Mábantün funági lun jeígin lúma lun játun ñi?
Láu igáburi le,
barǘ jumutiña tílana lilígilisin Búngiu quei ni cáta,
rújumaña ja úabei ni cáta jáma lídoun busíganu.
¿Cábagi naríñaga jun luágu líra?
¿Lúnti nagúndaarun jáu?
¡Luágu líra siñáti!
Adíneruni le arítaguagülei luágu loúnwen Wabúreme
23 Lúmagiñe guánarügü Wabúreme Jesucrístu nerésibirei igáburi le warítaguagüle luágu loúnwen,
lé meja níchugubei jun.
Queísi le nubeíbei jun,
luágu le lan áriebu le lalúgurúnbei Wabúreme,
ába lanǘgünun fein lújaburugu,
24 lásun líchugun eteíngiruni lun Búngiu tuágu,
ába lagúbachagunun lun lafánreinragunun jádan lánigu,
ába laríñagun.
“Joújuma,
núgubu le,
le nedéregerubei luágu jufúleisein.
Adǘga meme jumeí cátei le,
jarítaguagüleme nuágu.”
25 Ítara gíñe,
lásun jeígin,
ába lanǘgüni cópu táu diweín lújaburugu,
ába laríñagun.
“Cópu le táu diweín to,
liseíni iséri lidáradun Búngiu júma,
le achoúrurúabei láu níta le lúnbei láwiyurun lídaangiñe núgubu juágu.
Ságüme játuni,
adǘga jumeí lun jarítagun nuágun.”
26 Ítara líña lubeíti,
daríme le lagíribudun Wabúreme uboúagun,
ságüme jeígin fein,
gurá jugúya diweín to jarítaguagüle luágu Jesúsu,
jarúfuduñein luáguti loúnwen Jesúsu wawágu.
Ligáburi leigín eígini le arítaguagülei luágu Jesúsu
27 Furúmieguarügü le eígitu fein tugúya,
guráloun diweín to láni Wabúreme Jesucrístu lídan ában igáburi le míchuti inébesei lun Búngiu,
ladǘgüña figoú ladǘga líchuguña lan minébesei lun lúgubu Wabúreme lúma líta.
28 Ítara líña lubeíti,
cáda ában lúnti lasúbudiragun lúngua buídu ánjein jarúma tubeí lanígi lubáragiñe lerésibirun.
29 Lugúndun ánjein erésibira marítagunga luágu laníchigu lánina lúgubu Wabúreme,
labeíchubei Búngiu.
30 Ligía añájein lubeí sarágu jídaangiñe,
sánditiña,
débilitiña,
jilágua jíbiri.
31 Ánjawa jamúga asúbudiragua woúngua buídu lubáragiñe werésibirun,
mabeíchun lumútiwa jamúga Wabúreme ítara.
32 Dan le labeíchuníwa Wabúreme,
ladǘgüñein líra lun wasúbudiragun woúngua,
gayára lámuga wasáansiraguni wagáburi lueí weféridirunme úara jáma lirájüñü uboú.
33 Ítara líña lubeíti nidújeñu,
dan le joúndaragun lun jerésibirun,
agúrabagua jumá júngua.
34 Ja lamátiña,
joújama jábiñe,
mabeíchun lámugaña Búngiu luágu luríban ligáburi joúndaragun.
Lé buri líbiri cátei naráanserubei dánme le nídin aríjaün.