Gúndaagüdabá gürígia bíledi, máma amǘrü guánarügü
15
1 Wagía le jérebei lídan wafíñen,
lúnti gagúraasun wamá jabá ja loúguagiñabaña afíñe,
lúnti warítagun luágu le buídubei joun,
mámarügü luágu wíchugun ugúndani woúniwagua.
2 Cáda ában wádaangiñe,
lúnti lagúndaaraguagüdüni gürígia líledi láu le buídubei lun gürígia ligía,
lúma láu le gayáraati lagánwoundagüdǘni lafíñen.
3 Ni Crístu,
míchugunti ugúndani lúniwagua,
lubáragiñe líra,
suséreti le abǘrüjoúbei tídan Lerérun Búngiu lun.
“Núguchi,
áburujati janábajan ja anábubalibu nuágun.”
4 Sun le aríñawagúbei tídan Lerérun Búngiu lúmagiñe binárü,
lun larúfudajoún woun labǘrüjoúa,
bürǘwatí meja dimúrei buri ligía lun wanǘgün gurásu lúma dǘgüdaguaü lídaangiñe,
gayára lámuga weménigiduntima luágu Búngiu.
5 Búngiu le íchugubei gurásu lúma dǘgüdaguaü,
íderagualaǘn lun jabágaridun lídan dan jáma jíbirigu,
queísi ladǘgüni Jesucrístu.
6 Ítara lúba,
sun lan wagía lídan ában,
láu ábanrügü umálali,
wíchuguba uweíriguni lun Búngiu,
le Lúguchi Wabúreme Jesucrístu.
Agáambatiña ja mámabaña juríu luágu Wasálbaragüle
7 Resíbigua jumá lubeíti júniwagua quei gíñe lerésibiruníwa Crístu,
lun liñurúniwa líri Búngiu.
8 Le naríñagubei,
luágu liábinbei lán meja Crístu lun lesériwidun joun juríu,
lun lagúnfulirun dimúrei le íchugúbei joun binádu wagǘbürigu,
lun larúfudún luágu gúnfuli láani Búngiu lerérun.
9 Liábinbei gíñe lun jíchuguba lan ja mámabaña juríu uweíriguni lun Búngiu luágu lareídun,
quei taríñaguni Lerérun Búngiu.
Ligía níchuguba lubeí uweíriguni bun jagánaguagiñe ja mámabaña juríu,
nerémujaba gíñe luágu buweírigun.
10 Taríñajare gíñe Lerérun Búngiu.
Gúnda jumá,
jugúya le mámabei juríu,
úara jáma ja lánigubaña Búngiu.
11 Taríñajare gíñe.
Rújuma sun ja mámabaña juríu inébesei lun Búngiu,
adímureja jamá sun gürígia luágu luweírigun.
12 Laríñajare gíñe Isaías tídan Lerérun Búngiu.
Liábiba ában ladǘgawagun Isaí,
le lúnbei lagúmadiruniña ja mámabaña juríu.
Jagía,
jeménigiduba luágu.
13 Búngiu,
le íchugubalin eménigini woun,
buíngüdalaǘn láu ugúndani lúma darángilaü lídan jafíñerun luágu,
lun buíñu jumá láu eménigini,
láu lubáfu Sífiri Sándu.
14 Nidújeñu,
choúruguatina núngua luágu buin jíña lan láu areíduni lúma subúdi luágu wafíñen luágu Crístu,
luágu gíñe gíchigadi jumá dimúrei buíti joun jíbirigu.
15 Tídan gárada to,
abǘrüjaadina jun láu sun furáangu luágu buri cátei le lun mabúlieidun jumáni.
Nadǘgüñein luágu wadágimanu le rúlaalíbei Búngiu nun láu lareíni,
16 lun nesériwidun lun Jesucrístu jagánagua ja mámabaña juríu.
Seríwi le nadǘgübei,
napúrichijani ugánu lúmagiñeti Búngiu luágu Wasálbaragüle lun nanǘgübaña lan ja mámabaña juríu lun Búngiu,
lun lerésibiruniña queísi gürígia ja jarúmaaru janígi láu luwádigimaridun Sífiri Sándu jádan.
17 Ítara líña lubeíti,
áu queísi ában afíñeti luágu Jesucrístu,
gébunati gúnda nan lídan nesériwidun lun Búngiu,
18 luágu rügǘñein buri cátei le ladǘgübei Crístu guánarügü nídaangiñe nadímureja,
lun jayábin ja mámabaña juríu lun jagáambubei lan Búngiu.
Yúsu láali Crístu nerérun lúma náfaagun,
19 luweírin buri seíni lúma buri miláguru le nadǘgübei láu lubáfu Sífiri Sándu nídan,
lun lanǘgüniña ja mámabaña juríu lúmoun.
Láu igáburi le,
joústagüda náali lapúrichijoún ugánu luáguti asálbaruni lídaangiñe Crístu,
lúmagiñe Jerusaléngiñe darí loúbawagun Ilírico.
20 Ítara líña áfaaguaadina lan lun napúrichijani ugánu luáguti Wasálbaragüle le ñí lumuti magaambúngili lan líri Crístu.
Mabúseeruntina nuwádigimaridun lun Crístu lídan fulásu le ñí lumuti chülǘjali lan ámu láu ugánu luágu,
nubáragiñe,
21 lubáragiñe líra,
súnwandan busén nan nagúnfuliruni dimúrei lébei le taríñagubei Lerérun Búngiu.
Ja masúbudirungiñabaña luágu,
jagáambuba luágu,
gunfaráanda jagíame luágu.
Jarítaguati Páblo lídin Róma
22 Ladǘga nesériwiduña lan lun Crístu lídan ámu fulásu,
siñágili lubeí nídin bisídaün,
láu sun gíbeeli lan weíyaasu nabúseerun nadǘgüni.
23 Guetóti,
quei gumúnaali lan nuwádigimari lueígiñe oúbaü le,
áni quei lúmagiñe lan binárü nabúseera nídin aríjaün,
24 agúrabatina násügürün bisídaün dánme le nídin Espáña.
Lárigiñeme aríja náadün lan lun wagúndaaragun wámagua murúsuraü,
agúrabatina lun jíderagubadina lan luágu nuweíyasun yágütoun.
25 Ánjein guetó,
neíbuga Jerusalén,
barüína cátei joun wadújeñu lueígiñe Jesucrístu ñi.
26 Lugúndun wadújeñu ja Macedóniabaña jáma ja Acáyabaña jarítaguaaña joúndarun seínsu jádaangua lun joúnajani joun idújeñu gudémetiña ja Jerusalénbaña.
27 Jarítaguaaña luágu buídu lan lun jadǘgüni cátei le,
áni richátiña,
lugúndun dúwei jamúti joun le tímatimaati,
lugúndun ítara quei jafánreinraguni afíñetiña ja juríu jarísin le lánina siélu jáma ja mámabaña juríu,
lúnti giñéti jíderaguniña afíñetiña ja mámabaña juríu afíñetiña ja juríu luágu jemégeirun ya uboúagu.
28 Dánme lubeíti gumúnaali cátei le,
derége neíme seínsu le joun,
ábame nídin lun Espáñoun,
bisída naǘnme dánme le násügürün.
29 Choúru numúti luágu dan lánme nachǘlürün júmoun,
nachǘlürüba lan buin láu abíniruni lúmagiñe Crístu.
30 Nidújeñu,
ayúmuraguatina jun luágu jínsiñejabu lun Wabúreme Jesucrístu,
lúma luágu ínsiñeni le líchugubei Sífiri Sándu woun,
lun júaradun núma lídan áfaaguni,
ayúmuragueina lun Búngiu nuágu.
31 Amúriaja jumá lúma Búngiu lun leséfurunina jaweí mafíñetiña ja Judéabaña,
lun gíñe buídu lan lerésibirúniwa íderawaguni le nanǘgübei joun wadújeñu ja Jerusalénbaña,
32 lun gúndaabadina lan dánme le nachǘlürün júmoun eméraagua murúsun,
ánjein ligía lubeí lugúndaabei Búngiu.
33 Júmalá Búngiu le íchugubei darángilaü.
Ítaralá.