Lirícha Jesúsu témpulurugu
20
1 Luágu ában wéyu,
dan le témpuluruguñein lubeí Jesúsu arúfudaja joun gürígia,
apúrichijei ugánu luáguti asálbaruni,
ligía jayábin jábutigu jafádirigun juríu,
jáma arúfudajatiña lilúrudun Moisés,
jáma wügǘriña weírigutiña lídan jafíñen juríu,
2 ába jaríñagun lun.
—Aríñagabeí woun ca lan biríchabei lun badǘgüni cátei le.
¿Ca íchugubalin ubáfu le bun?
3 Ábati laríñagun Jesúsu joun.
—Nálügüdáadün gíñe ában cátei,
oúnaba jumána.
4 ¿Ca oúnajabalin Juan abásteragüdaja?
¿Loúnajan Búngiu ódi joúnajan wügǘriña?
5 Ába jagúmeserun aríñaga jámagua.
—¿Cába waríñaga?
Ánjawa aríñaga luágu loúnajan lan Búngiu,
laríñagame woun ca lan uágu mafíñerun wabeí lun.
6 Ánjawa aríñaga luágu joúnajan lan wügǘriña,
jachámuraguba gürígia dǘbü wawágun,
ladǘga choúru jamúti luágu proféta lán meja Juan.
7 Ábati jaríñagun luágu ibídiñe lan joun ca lán meja oúnajabalin Juan abásterágüdaja.
8 Ábati laríñagun Jesúsu joun.
—Maríñagun nubeí gíñe jun ca lan áu ubáfu nadǘgei buri cátei le.
Jémpulu jawáguti ñadágimeintiña wuríbatiña
9 Ába lagúmeserun Jesúsu adímureja joun gürígia,
ába labájüdagun ában úraga le gíbebei laníchigu,
joun.
Niján úraga ligía.
—Ñíñein meja ában wügǘri ábunaguti beíbei lichárirugu,
lárigiñe,
ába lájayajani lichári joun ñadágimeintiña,
ába lídin lídoun ámu fulásu luágu sarágu dan.
10 Dan le lachǘlürün lidáani alúbajani,
ába loúnajan ában lumúsun anǘgei lufánran,
ába jabúleiseiruni ñadágimeintiña músu ligía,
ába joúnajani lárigoún,
míchugunga ni cáta lun.
11 Ábayati loúnajan ábanya músu,
ába gíñe janábuni,
buleísei jameí,
oúnaja jameí,
míchugunga ni cáta lun.
12 Ábaya loúnajan ábanya,
ábaya gíñe jabúleiseiruni,
ába jabúguni ñígiñe.
13 ‘Ába laríñagun labúreme ichári lúnguarügü.
“¿Cábasán funa nadǘga?
Noúnajaali niraǘ le jínsiñebei nun,
dánme le jaríjini,
fágua inébebei joun.”
Ába loúnajani.
14 Dan le jaríjinbalin,
ába jaríñagun jámagua.
“Niján le lúnbei lerésibiruni alágan,
wáfaraali jilágubei,
wagía lámuga labúriña sun cátei.”
15 Ábati jaságaruni lídaangiñe fulásu ligía,
ába jáfaruni jilágubei.
Ábati lálügüdajan Jesúsu,
laríñaga.
—¿Cábati ladǘga labúreme ichári?
16 Liábinme,
ábame láfaraguniña ñadágimeintiña jagía jilágubei,
ábame líchuguni ichári joun ámu.
Dan le jagáambunbalin cátei le,
ába jaríñagun.
—¡Masúsereda lámuga ítara!
17 Ába laríaguniña Jesúsu,
ába laríñagun joun.
—¿Cáti lílabei le bürǘñubei tídan Lerérun Búngiu le ñí lubei laríñaga.
Lé meja dǘbü le mabúseerun jabeí ábunagutiña,
ligíaali furúmiñeti?
18 Furúmieguarügü le achúgeraguti luágu dǘbü ligía lagǘnrinchaguba,
léti uágunti láburuja,
labúrechagúbei.
Áu dǘbü ligía.
Luáguti liseínsuna gumádi
19 Lídan meme óra ligía,
ába jálugun jábutigu jafádirigun juríu jáma arúfudajatiña lilúrudun Moisés járügüdüni Jesúsu,
ladǘga jasúbudiruni luágu jawáguti lan jémpulu le laríñagubei,
madǘgün jamúti ladǘga janúfude jaweí gürígia.
Ábati jagúrabajan ámu dan.
20 Ábati joúnajan gürígia ja ásügürütiña joúngua camá jamuga jarúmatiña lun jaríaajani Jesúsu,
lun jaríñagagüdüni cátei le gawáguti gayára lan jíchugun lidúnrun lun jedéregeruni lun gumádimati.
21 Ligía jálügüdünbalin,
jaríñaga lun.
—Maésturu,
subúdi wamúti luágu richá lan le baríñagubei lúma gíñe le barúfudajabei,
manúfudetibu gíñe lueí ni ában,
ladǘga ni cáta lan luweírigun gürígia bun,
áni láu inárüni barúfudajei lémeri Búngiu.
22 Aríñagabá ában cátei woun.
¿buíti lun lafáyeijoún seínsu lun warúeite César ódi mabuídunti?
23 Ába lasúbudiruni Jesúsu luríban jarítagun,
ába laríñagun joun.
—¿Ca uágu jabúseera jíchugun sádara nubá?
24 Arúfuda jumá ában lídaangiñe seínsu ligía nun.
¿Cá iyáwa lúma íri le bürǘñubei luágu?
Jaríñaga lun.
—Láni César.
25 Ábati laríñagun joun.
—Le láni César rújumei lun César,
le láni Búngiu rújumei lun Búngiu.
26 Siñá jamútiti áburugüda tídoun jasádaran láu lé buri laríñagubei jagíbugiñe gürígia,
weírirügüti janígi láu loúnabagüle joun.
Ába jámanichun.
Álügüdajani lübǘgürü ásaaruni lídaangiñe oúweni
27 Lárigiñe,
ába joúdin saduséogu aríjei Jesúsu.
Jaríñajare saduséogu luágu másaarunbaña lan jiláaña lídaangiñe oúweni lúnya jabágaridun.
Ábati jaríñagun lun Jesúsu.
28 —Maésturu,
laríñajare Moisés woun tídan lilíburun,
luágu ánjein lan oúwe ában wügǘri,
ába lígirunun lúmari marájüñüga ligía táu,
lúnti lan lamárieidun lamúlen túma lun garájüñü lan táu,
gadǘgawagun lámuga líbugaña le oúwebei.
29 Wel,
ñíñanu mejáti sédü wügǘriña gamúlenuguátiña,
ába lamárieidun le furúmiñeti,
ába loúnwen marájüñüga.
30 Ába lamárieidun le jabíaman túma buga lúmari íbugañaü,
ába gíñe loúnwen marájüñüga.
31 Ábati lamárieidun le jǘrüwan túma,
chülǘ lúmoun le jasédün,
jilágua meme jagía,
marájüñüga táu.
32 Ába gíñe toúnwen wǘri tugúya.
33 Aríñagabá ában cátei woun.
dánmeti le jásaarun lídaangiñe oúweni lúnya jabágaridun,
¿cábati úmari wǘri to jádaangiñe,
quei maríei tubeí jáma sédügubei?
34 Ába laríñagun Jesúsu joun.
—Lídan uboú le,
maríeitiña wügǘriña jáma würíña,
35 ánjein lídaanme dan le lúnbei liábin,
úabei agámariduni siélu jádan ja garíchabaña lun ásaaruni lídaangiñe oúweni lúma lun jebélurun siélun agánawa ñi lun sun dan.
Magámaridubaña ñi,
míchaajan jamáñame jarájüñü lun maríei,
36 ladǘga moúnwendügüyaaña gürígia siélu,
ítaraañame quei ánjeligu,
lirájüñü jañáme Búngiu ja saráaña lídaangiñe oúweni.
37 Moisés guánarügü arúfuda lumúti luágu níjein lan ásaaruni lídaangiñe oúweni lídan le labǘrüjanbei luágu búbugati geméti.
Laríñajare ñi luágu Búngiu lan Lubúngiutebei Abrahám,
Isáac lúma Jacób.
38 Láu dimúrei ligía,
arúfuda lumúti Moisés luágu wínwangiña lan Abrahám,
Isáac lúma Jacób,
láu sun jilá lan jágubu,
ladǘga máma Jabúngiute jiláaña Búngiu,
Jabúngiute ja wínwangiñabaña.
Wínwangiña lanǘgüniña Búngiu sun gürígia.
39 Ábati jaríñagun arúfudajatiña lilúrudun Moisés.
—Buíti baríñaguni,
Maésturu.
40 Ába málügüdagun jamáali lan.
¿Ladǘgawagunsan Davíd Crístu?
41 Ába laríñagun Jesúsu joun.
—¿Ída liñásan jaríñagunbei luágu ladǘgawagun lan Davíd Crístu?
42 Laríñajare Davíd guánarügü tídan líburu to gíriboun Sálmos.
Aríñagati Búngiu lun Nabúreme.
“Ñurúba lueígiñe noúnwenren,
43 daríme níchuguniña báganiñu bújaburugun.”
44 ¿Ída lubáti ladǘgawagun lan Davíd Crístu,
áni aríñagati Davíd guánarügü lun Crístu “Nabúreme”?
Ladárirun Jesúsu jadúnrun arúfudajatiña lilúrudun Moisés
45 Ñíñanu sarágu gürígia agáambajei Jesúsu,
ába jagáambun laríñagun joun láni disípulugu.
46 —Toúnigigua jumá júngua jaweí arúfudajatiña lilúrudun Moisés,
ganígitiña jeíbugun táu anáanguni durúrutu,
busén jagía lun labúsurún joun láu inébesei ǘmadarugu,
áluaja jameí ubáraü le jabára weírigutiña tídan ligílisi,
lúma lubuídun-ágei ubáraü lídan eígini.
47 Gidá jamutu gíñe jában würíña ja jiláaña úmari jaweí,
lúnti jadáuragun láu,
ába jadǘgün furíeigi migínaguti.
Weíribei jasúfurirun luágu sun le jadǘgübei.