Jémpulu luáguti oúnigiruti le múaraanbei
16
1 Aríñagati gíñe Jesúsu joun láni disípulugu.
—Ñíñein méja ában iyúbudiri rísiti,
ñíñein gíñe ában loúniri lumégegun,
ába jayábin aríñaga lun luágu lachágaruñein lan oúnigiruti ligía lirísin.
2 Ábati lagúarun iyúbudiri lun,
ába laríñagun lun.
“Ída liñásan cátei le,
le aríñawagúbei nun buágu?
Rúba fe nun luágu buwádigimari,
ladǘga masígijadibu oúnigirei nílagu.”
3 Ábati leréderun oúnigiruti ligía asáminara,
laríñaga lúnguarügü.
“¿Cábati nadǘga guetó lárigiñe gidála lan niyúbudiri wadágimanu nueí?
Méretina lun nadǘgün wadágimanu jǘrüti,
áni nibúsigaritina lun namúriajan.
4 Subúdi náali cába lan nadǘga lun ñí jama erésibirutina jábiñe dánme mawádigimarijadina.”
5 Ába loúnajan jawágu ja adúweirubalin liyúbudiri lun jayábin lun ában ában.
Ába lálügüdüni le furúmiñeti,
laríñaga lun.
“¿Átiri badúweiruni niyúbudiri?”
6 Ába laríñagun lun.
“Dúwei numúti san barín agǘlei.”
Ábati laríñagun oúnigiruti ligía lun.
“Nuján bigáradan,
ñurúba furése,
badǘgame ában luágurügü dimí-san.”
7 Lárigiñe,
ábaya lálügüdün ában,
laríñaga lun.
“Ángi amǘrü,
¿átiri badúweijan?”
Laríñaga lun.
“San ságü türígu.”
Laríñagati lun.
“Nuján bigáradan,
adǘgabá ában luágurügü gádürü-wein.”
8 Ába lasúbudiruni iyúbudiri luágu chu lan láu oúnigiruti ligía lídan ligáburi ladǘgüni cátei.
Ligía laríñagun Jesúsu.
—Gürígia wuríbatiña ja lánina uboú le,
chúti jáu lídan jáni jáma ámu sügǘ jáu ja lánina larúgounga,
ja lirájüñü Búngiu.
9 Siñáti leménigidún luágu irísini lánina uboú le,
aríñagatina lubeíti jun lun jayúsuruni jirísin lun jadǘgün buíti,
lun dánme lan le lagúmuchun jibágari,
jerésibirúba tídan múna to magúmuchaditu,
yágüta siélu.
10 ‘Le adǘgüti buíti láu le murúsunrügüti,
ladǘgüba gíñe buíti láu le gíbeti,
le madǘgünti buíti láu le murúsunrügüti,
madǘgünbei gíñe buíti láu le gíbeti.
11 Ánjaün lubeíti madǘgün buíti láu buri irísini le láni uboú le,
le uágubei siñá lan leménigidún,
¿cábagi afíñera juágu lun ledéregerun irísini inárüniti lábugiñe jaríaajan?
12 Ánjaünti madǘgün buíti láu jemégen ámu,
¿cábagi íchigei le jáni guánarügü jun?
13 ‘Siñáti lesériwidun ában gürígia joun bián iyúbudirigu,
ladǘga liyéreeguduba ában lun,
línsiñedame le ában lun,
o úarabei lan lun ában,
lanǘgeime le ában quei ni cáta.
Siñáti lesériwidúniwa lun Búngiu lúma lun seínsu.
14 Agáambagu jáña fariséogu lun sun cátei le,
ába jéjerajan láu Jesúsu,
ladǘga jínsiñe lan seínsu joun.
15 Ábati laríñagun Jesúsu joun.
—Jugúya gürígia ja arúfudagubaña joúngua quei buítiña jagíbugiñe gürígia,
ánjeinti Búngiu,
subúdi lumútu janígi luágu wuríba tan.
Le cátei le janǘgübei gürígia quei weíriti cátei,
iyéreeguti lun Búngiu.
Lúrudu lúma larúeijan Búngiu
16 ‘Níjein meja lilúrudun Moisés lúma jarúfudajan profétagu darí lúmoun lidáani Juan.
Lúmagiñe dan ligía,
lapúrichijoún ugánu buíti le luáguti larúeijan Búngiu,
sun gürígia joúchatiña lun jebélurun lídoun.
17 ‘Méreenguntimaati lun lagúmuchagun siélu lúma uboú,
máma lun magúnfulirun lan liñǘraü-ágei dimúrei lídaangiñe lilúrudun Búngiu.
Larúfudajan Jesúsu luágu ígiraguni
18 ‘Ánjoun lígira ában wügǘri lúmari,
lagámarida ámu,
ladǘgüñein figoú le gíribei adultériu,
le gíñe agámariduti ában wǘri to ígiraguaaru,
ladǘgüña gíñe adultériu.
Wügǘri le rísibei, lúma Lázaro
19 Aríñagati gíñe Jesúsu.
—Ñíñein méja ában wügǘri rísiti,
anáanguni fínutu to wéndegutu ladáüraguboun,
ságüja wéyu ladáagun fédu láu sarágu wéndegu.
20 Ñíñein gíñe ában gudémeti gíriti Lázaro,
sun lúra láu gumeín,
21 lañúurati buri múarugu tubéneri lúban rísiti ligía áluga leígini lífe eígini le eíguaduti lueígiñe lidábulan rísiti.
Weíriti lasúfurirun darí lun lawánduni jayábin oúnli éjelujei lugúmein.
22 Luágu ában wéyu,
ába loúnwen fugiábu ligía,
ába janǘgüni ánjeligu lúmoun Abrahám,
le ñíjin jabeí jiláaña buítiña,
ába gíñe loúnwen rísiti,
ába lábunajoún.
23 Dan le lasúfuriruña lan rísiti ligía lídan fulásu le ñíjin jabeí jiláaña wuríbatiña,
ába liñúruni laríjin,
ában laríjini Abrahám dísegiñe,
láu Lázaro lúma.
24 Ábati lagúaragun,
laríñaga.
“¡Núguchi Abrahám,
gudémená bun!
Oúnajabeí Lázaro lun ladǘdüragüdüni ligíbu lújabu láu dúna,
ñǘbin lámuga éderei tuágu niñéñe,
ladǘga nasúfuriruña sarágu lídan wátu geméti le.”
25 Ába laríñagun Abrahám lun.
“Niraǘ,
jarítaguabá luágu buídu lán meja dan bun lídan bibágari,
ánjein lun Lázaro,
wuríbati meja dan.
Guetó,
buíti dan lun ya,
bugúya asúfurira.
26 Boúgudigiñe lueí sun le,
níjein ában baráangu afánreinraguáwa júma,
ja jamúga buséntiña joúdin yágiñe lun ñíjin,
siñáti,
ni ja ñíbaña,
siñáti jayábin ñájoun.”
27 Ábati laríñagun rísiti.
“Amúriajatina búma,
Núguchi Abrahám,
lun boúnajani Lázaro lúbiñe núguchi,
28 añájein seíngü namúlenu ñi,
lun ladímurejan joun,
mayábin jamámuga gíñe lídoun fulásu lánina asúfuriruni le.”
29 Ába laríñagun Abrahám lun.
“Níjein le labǘrüjabei Moisés jáma profétagu jáma ñi,
¡adǘga jamá gásu láu!”
30 Ába loúnabun rísiti,
ába laríñagun.
“Binárün,
núguchi Abrahám,
láu sun líra,
ánjein ñǘdün ában jádaangiñe jiláaña adímureja joun,
lasáansiraguba jagáburi.”
31 Laríñaga Abrahám lun.
“Ánjein mája jabeí jadǘgün gásu láu le laríñagubei Moisés jáma profétagu,
mafíñebañá giñe láu sun lásaarun ában jádaangiñe jiláaña lun lídin adímureja joun.”