UGÁNU BUÍTI LE LABǗRÜJABEI LÚCAS LUÁGU JESÚSU
Labǘrüjani Lúcas lé meja asúseredubei
1
1 Lun Teófilo le weírigubei.
Gíbeeña gürígia oúchutiña jabǘrüjani cátei lé buri luáguti wasálbarun lé meja asúseredubei wagánagua lídan lúaragun,
2 áfaaguatiña jabǘrüjani ítara quei jarúfudajani ja aríjubalin buri cátei ligía lúmagiñe lagúmeserun,
apúrichija jagía luágu,
woun.
3 Áu gíñe,
álügüdajaadina gíñe buídu buídu libǘgürü sun cátei le asúseredubei lúmagiñe lagúmeserun,
áni afíñetina luágu maríban lan lun nabǘrüjanun gárada to bun quei lubúdubu,
4 subúdi bámugei linárün cátei le arúfudúaalibei bun buídu buídu.
Niján le asúseredubei.
Lasúbudiragüdüni ában ánjeli luáguti lagǘriajoún Juan le abásteragüdajabei
5 Dán meja le Heródes lan urúeibei Judéa,
ñíñein meja ában fádiri lánina jafíñen juríu,
gíriti Zacarías,
jádaangiñeti fádirigu ja lánigu Abías.
Elisabét tíribei lúmari,
jádaangiñetu giñe ladǘgawagun Aarón.
6 Biángubei jagía,
richáguatiña ligíbugiñe Búngiu,
gúnfulitiña lúma,
adǘga jameí sun le lubeíbei darí lun siñá lan laríñawagún ni cáta wuríbati jawágu.
7 Masáanigutiña ladǘga siñá lan tagáragüdün Elisabét,
áni derébugugaaña gíñe jagía biángubei.
8 Luágu ában wéyu,
lídan lidáani jesériwidun lánigu Zacarías quei fádirigu ligíbugiñe Búngiu,
9 ába jabúdujan según jagáburi fádirigu juríu,
lun jasúbudiruni cába lan ebélura lídoun fulásu le sándutimaabei témpulurugu águdaja cupáli ligíbugiñe Búngiu,
ába láburujan luágun Zacarías.
10 Sun niján lan cupáli águdajoúa,
añája gürígia boúgudi ayúmuragua lun Búngiu.
11 Ábati lasáliragun ában láni Wabúreme ánjeli lun Zacarías,
rára lueígiñe loúnwenren latárü le ñí lubei cupáli.
12 Dan le laríjini Zacarías ánjeli ligía,
ába laweíridun lanígi,
ába lebélurun anúfudei lídoun.
13 Ába laríñagun ánjeli ligía lun.
—Manúfudebá,
Zacarías,
ladǘga agáamba láali Búngiu bayúmuragun,
tagáraüduba búmari ában irájü,
ábame bíchuguni líri Juan.
14 Tabuínchuba banígi láu ugúndani luágu,
áni sarágujaba gíñe agúndaarutiña láu lagǘriajoún,
15 ladǘga weírigubei biraǘ ligíbugiñe Búngiu.
Mátunbei diweín ni bínu,
áni ñíbei Sífiri Sándu lúma lúmagiñe lubáragiñe lagǘriajoún lun ladúndejani lídan sun cátei.
16 Ladǘgüba lun jagíribudun sarágu jádaangiñe Israelítagu lun jagáambuni Jabúngiute,
17 lesériwiduba lun Búngiu láu sarágu ubáfu queí meja ladǘgüni Elías.
Laráansejaba lubá Jesúsu láu laráandaragüdüniña agǘbürigu jáma isáanigu,
láu gíñe larúfudajan joun ja magáambadibaña lun Búngiu lun júaradun lúma queísi gürígia richáguatiña.
Ítara lúba laráanseruniña lubá jerésibiruni Jabúreme Jesúsu.
18 Ába laríñagun Zacarías lun ánjeli ligía.
—¿Ída lubági nachoúruni cátei le?
Áu táu sun númari,
derébugugaadiwa.
19 Ába laríñagun ánjeli ligía lun.
—Gabriél áu,
áni nesériwiduña lun Búngiu,
ligía oúnajabalina adímureja bun lun níchuguni ugánu buíti le bun.
20 Guetó,
quei mafíñerun bubeí luágu le naríñagubei bun,
berédera merérunga,
siñábei badímurejan daríme lagǘriajoún biraǘ.
Lagúnfuliruba cátei le lídan lidáani.
21 Sun dan le,
añájati buga gürígia boúgudi agúrabajei Zacarías,
weírititi janígi luágu lílü témpulurugu.
22 Dan le láfuridunbei,
siñá ladímurejan joun,
ábati jasúbudiruni luágu salígua lan som cátei lun,
témpulurugu.
Ladímurejati joun láu seíni,
meréngadijaali.
23 Dan le lagúmuchun dan le lúnbei lesériwidun Zacarías témpulurugu,
ába lídin lúbiñoun.
24 Lárigiñe cátei le,
ába tadágeinadun Elisabét,
to lúmari,
ába máfuridun tan jábiñegiñe luágu seíngü játi,
teréngati túnguarügü.
25 “Ladǘgüñein Búngiu lubuídun cátei le nun guelé lun lagídaruni nibúsigari jagíbugiñe gürígia.”
Lasúbudiragǘdüni ában ánjeli luáguti lagǘriajoún Jesúsu
26 Sísi játi lárigiñe,
ába loúnajani Búngiu ánjeli Gabriél lídoun ában ubúrugu láni Galiléa,
gíriti Nazarét,
27 lun lídin bisídoun ában wǘri irájügiru,
gíritu María.
Wǘri tugúya,
gadáraduñoun lúma ában wügǘri gíriti José lun tamárieidun lúma,
wügǘri ligía,
linébaanfan urúei Davíd.
28 Ába lebélurun ánjeli ligía le ñíjin tubeí,
ába laríñagun tun.
—¡Báfaguagüle,
María!
Níjein Búngiu búma,
binílaadibu sügǘ jáu sun würíña.
29 Dan le tagáambuni ánjeli ligía,
ába tájüchürün láu le laríñagubei,
ába tálügüdagun túngua ca lan uágu labúsura tun ítara.
30 Ábati laríñagun ánjeli ligía tun.
—Manúfudebá María,
fuleísei láadibu Búngiu,
31 badágeinada,
ábame bagǘriajan ában irájü,
ábame bíchuguni líri Jesúsu.
32 Weírigubei,
Liraǘ Búngiu le íñubei lúba lagúarúniwa,
áni larúeigüdübei Wabúreme Búngiu quei larúeigüdüni Davíd,
le binádu lidúje.
33 Lagúmadirubei linásiñun Israél lun sun dan,
áni magúmuchadibei lagúmadijan.
34 Ábati taríñagun María lun ánjeli ligía.
—¿Ída lubági lasúseredun cátei le,
mámarigidinagu?
35 Ába laríñagun ánjeli tun.
—Liábinba Sífiri Sándu buágun,
ábame loúburagunibu lubáfu Búngiu.
Ligía sándubei lubeí irájü le lúnbei bagǘriajani,
Liraǘ Búngiu lúba lagúarún.
36 Tiábin bidúje to Elisabét,
dageínaaru gíñe lau sun weíyaaru lan,
tagáraüdüba ában wügǘri irájü,
ítara líña lubeíti,
tó meja uáguboun jaríñaga luágu siñá lan tagáraüdun,
níjein sísi játi dageínaü tuágu.
37 Úati ni cáta siñáti lun Búngiu.
38 Ábati taríñagun María.
—Lidámun Nabúreme Búngiu nugúya,
adǘgaleí le baríñagubei náu.
Lárigiñe,
ába lídin ánjeli.
Tídin María bisídoun Elisabét
39 Lídoun dan ligía,
ába tídin María furése lídoun ában ubúrugu le labádinaguabei buri wǘbü Judéa,
40 ába tebélurun lúbiñoun Zacarías,
ába tabúsurun tun Elisabét.
41 Dan le tagáambuni Elisabét tabúsurun,
ába lánjingichagun tiraǘ turágeirugu,
ába liábin Sífiri Sándu tuágun.
42 Ábati taríñagun láu umálali le jéreti.
—Binílaadibu Búngiu sügǘ jáu sun jiñáriñu,
binílaali gíñe biraǘ.
43 ¿Cátanañadina lun tiábin lúguchu Nabúreme bisídana?
44 Láu nagáambuni babúsurun,
ába lánjingichagun niraǘ nurágeirugu láu ugúndani.
45 Gúndaatibu bugúya le afíñerubei,
luágu lagúnfuliruba lan cátei le laríñagubei Wabúreme bun.
46 Ábati taríñagun María.
Rútu nuwáni uweíriguni lun Nabúreme,
47 gúndaagua tugúya nanígi luágu Búngiu le Nasálbaragüle,
48 lugúndun gudémejabujaali nun,
nugúya le lidámun.
Lúmagiñe guelé,
jaríñaguba sun gürígia luágu fuleíseiwaadina lan,
49 ladǘga adǘgaali Búngiu,
le Súnti Gabáfu,
cátei weínamuti nun,
sánduti líri.
50 Súnwandan gudémebaña lan ja inébejabúbaña lun,
lun.
51 Adúgaali oúnwenbun buri cátei,
adǘgaali lun ni cáta jamá ja barǘguabaña joúngua.
52 Gidálaaña ja gabáfubaña lídaangiñe jaweírigun,
ja ǘnabubaña,
ába ladǘgüniña lun weírigu jamá.
53 Já buga lamábaña,
quimúlegüda lumútiña,
ánjeinti ja rísibaña,
míchugunti ni cáta joun.
54 Íderagua lumútiña linásiñun Israél,
ja esériwidubaña lun,
mabúlieidun lumúti lun gudémejabu lan,
55 queí meja lidáradun jáma binádu wagǘbürigu—
Abrahám jáma ladǘgawagun—lun gudémejabu lan joun lun sun dan.
56 Ába teréderun María ǘrüwa játi ñi,
lárigiñe,
ába tagíribudun jábiñoun.
Lagǘriajoún Juan le abásteragüdajabei
57 Ába lagúnfulirun dan lun tagǘriajan Elisabét,
ába tagǘriajan ában wügǘri irájü.
58 Dan le jagáambun tubésinanigu jáma tidújeñu luágu lubuídun cátei le ladǘgübei Búngiu tun,
ába jagúndaarun úara túma.
59 Luágu liwídün wéyu,
ába lerésibiruni circuncisión,
le liseíni luágu láni lan Búngiu irájü ligía.
Buséntiña yebéti jíchuguni líri lúguchi luágu,
le Zacarías,
60 ába taríñagun lúguchu.
—Uá,
Juánba líri.
61 Ába jaríñagun tun.
—¿Cági uágu?
Úati ni ában jádaangiñe binébaanfaangu gíriti Juan.
62 Ába jálügüdüni lúguchi irájü láu seíni ca lan íri labúseerubei líchugun luágu.
63 Ába lamúriajan ában murúsun fuláansu,
ába labǘrüdün luágun.
“Juan líribei.”
Ába laweíridun janígi súngubei láu cátei le.
64 Lídan méme óra ligía,
ába gayáraajaali lan ladímurejan Zacarías,
ába líchugun uweíriguni lun Búngiu.
65 Ába laweíridun janígi besínagu láu cátei le,
ába labájüdawagún cátei le lídan sun fulásu geyégua jáu.
66 Sun ja agáambubalin,
ába jeréderun asáminara,
ába jálügüdagun jámagua,
jaríñaga.
—¿Cáteibeí funasan irájü le?
Ladǘga biní lumútija Búngiu le tímatimaati.
Lerémujan Zacarías
67 Ába liábin Sífiri Sándu luágun Zacarías,
le lúguchi irájü ligía,
ába ladímurejani Zacarías dimúrei le laríñagubei Búngiu lun,
ába laríñagun.
68 Buídulá ladímurejoún luágu Wabúreme le Jabúngiutebei gürígia ja Israelítagu,
ladǘga ñǘbinjali woun,
wagía le lánigu,
áni sálba láadiwa.
69 Rújali ában Asálbaragülei le gabáfuti woun jádaangiñe linébaanfaangu Davíd,
lé meja esériwidubei lun.
70 Ítara líña meja laríñaguni Búngiu jádaangiñe láni profétagu ja edéregeragubaña joúngua lun,
lúmagiñe meja binádu dan,
71 luágu lasálbarubádiwa lan jaweí wáganiñu lúma jaweí sun ja iyéreejabúbaña woun.
72 Ítara líña gudémejabu lan Búngiu joun binádu wagǘbürigu,
arúfudaleí luágu mabúlieidagun lan lueí lidáradun le sándubei jáma.
73 Niján lé meja laríñagubei lun wáguchi Abrahám.
74 luágu leséfurubadíwa lan jaweí wáganiñu,
lun gayáraabei lan wesériwidun lun manúfudeiga,
75 láu úarani,
derégeguñu wagía woúngua lun,
sun dan le wabágaridubei.
76 Áni bugúya nisáaniraü,
láni Búngiu le íñubei proféta lúba bagúarúniwa,
ladǘga baráansejaba lubá Wabúreme,
77 subúdi lámuga ǘma lánina asálbaruni joun lánigu,
le áubei ferúdunawa lan jafígoun.
78 Wabúngiute,
láu lísiñejabu lúma lugúdemejabu,
loúnajabei Crístu wámoun siélugiñe
79 lun larúgoungadágüdün jáu ja lídaanbaña lubúriga lúma jáu ja luágubaña ǘma le oúwenibei lébeja,
lúma lun ladúndejani wapásun lídoun ǘma le anǘgübaliwa lídoun darángilaü.
80 Aweírideina ligíati irájü ligía,
afáragadagueina gíñe lídan láni espíritu.
Ába laganoún lídan fulásu mageírawati darí lúmoun wéyu le lagúmeserun luwádigimari lun Búngiu jagánagua lumútuniña Búngiu ja Israelítagu.