Lásaarun Jesúsu lídaangiñe oúweni
28
1 Dan le lásügürünbei luwéyuri eméraaguni áni arúgadeina líña dimáasu,
ába joúdin María Magdaléna túma to ában María aríjei umúajaü.
2 Sódini,
ába ladágarun ában járabaganáli jéreti óra ligía láu larárirun ában láni Wabúreme ánjeli siélugiñe,
ába liábin luágun umúajaü,
ába lagídaruni dǘbü le áubei ladaurúa,
ába lañúurun luágu.
3 Miríti ánjeli ligía quei ában labírijanoúga,
tiábin lanáangun,
jarú jarú.
4 Dan le jaríjinbalin súdaara,
ába jadádagarun láu anúfudei,
ába jeréderun camá jiláguaaña.
5 Ábati laríñagun ánjeli ligía joun würíña jagía.
—Manúfude jumá.
Subúsiti nun luágu jáluajañein lan Jesúsu le ádarawagúbei luágu gurúwa.
6 Úati ya,
saráali quei laríñaguni.
Jigoúgu jaríjei fulásu le ñíjin lubeí líchugúa,
7 ábame jídin furése,
ábame jaríñagun joun láni disípulugu luágu saráali lan,
luágu níngiran lan jubá jubá Galiléoun,
ñíba jaríjei.
Niján ugánu lé buga lúnbei naríñaguni jun.
8 Ába joúdin würíña jagía oúfudagueina,
láu anúfudei lúma sarágu ugúndani,
ába joúdin eíbaagueina aríñagei joun disípulugu.
9 Súnti añája lan luágu ǘma,
ligía larúfudagun Jesúsu lúngua joun,
ába labúsurun joun.
Ábati jayárafadun lun,
ába jájuduragun lun,
ába joúburuni lugúdi.
10 Ába laríñagun joun.
—Manúfude jumá.
Jeíba awísaraña nánigu lun joúdin Galiléoun,
luágu ñíba lan jaríjana.
Cátei le jabájüdagubei súdaara
11 Dan le joúdiña lubeí würíña,
ligía joúdin jádaangiñe súdaara ja oúnigirubaña,
ába joúdin ubúrugu,
ába jabájüdaguni le asúseredubei joun jábutigu fádirigu.
12 Ába joúdin ábutigu ja adímureja jáma wügǘriña weírigutiña lídan jafíñen juríu lun jebélurun jáma lídoun ában úarani,
ába jíchugun sarágu seínsu joun súdaara,
13 ába jaríñagun joun.
—Jaríñagame luágu dan lan le anjǘnja lan arúmuga áriebu,
ába lan jayábin láni Jesúsu disípulugu,
ába jíwerujani lúgubu.
14 Ánjein lasúbudira gumádimati cátei le,
wadímurejaba luágu jáni fuleísei lúma lun madügǘn lan ni cáta jáu.
15 Ábati jerésibiruni súdaara jagía seínsu,
ába joúdin adǘgei le uágubei laríñawagúa joun.
Ítara liñáti jaríñaguni juríu chülǘ lúmoun dan le.
Líchugun Jesúsu jadásin disípulugu
16 Ába lubeíti joúdin únsu disípulugu Galiléoun luágu wǘbü lé meja uágubei laríñaga Jesúsu joun lun joúdin.
17 Dánti le jaríjinbalin Jesúsu,
ába jájuduragun lun,
láu sun añájein lan jádaangiñe,
loúguati jafíñen luágu ligía lan.
18 Ába liábin Jesúsu jawágun,
ába laríñagun joun.
—Rúaali sun ubáfu nun siélu lúma uboúagu.
19 Jeíbati jabǘgürü gürígia ja lílana sun fulásu,
adǘga jumáña nánime disípulugu,
badíseigüda jumáña lídan líri Búngiu Úguchili,
Búngiu Irájü,
lúma líri Sífiri Sándu.
20 Arúfudaja jugúyame joun lun gagáambadi jamá lun sun le uágubei naríñaga jun.
Subúdi jumeí luágu anájein lan júma ságü wéyu daríme lagúmuchun uboú.
Ítaralá.