Jémpulu jawáguti díisi würíña irájüñü
25
1 Ába laríñagun Jesúsu.
—Ítara lubáti arúeijani le lánina siélu quei díisi würíña irájüñü ja anǘgübaña jalámpun le gálati gási,
ába jáfuridun lun jadúnragun lúma adári,
ñǘdün jamámuga úara lúma maríeirugun.
2 Seíngü jádaangiñe,
maráanseruntiña,
seíngü aráansetiña.
3 Ja maráanserunbaña,
dan le janǘgünbalin jalámpun,
manǘgüntiña ámu gási lueí le lídaanbei jalámpun,
4 ánjañati ja aráansebaña,
barǘtiña jabúdein láu gási boúgudin lueí le lídaanbei jalámpun.
5 Queísiti ladárasarun adári,
ába ladábudunga jágu súngubei,
ába jarúmugun.
6 Queí buri luágu amídi áriebu,
ligía lagaambúniwa agúaraguni.
“Niteín adári,
furíjuma adúnraguei.”
7 Sun würíña irájüñü jagía,
ába jásaarunga,
ába jagúmeserun aráansejei jalámpun.
8 Ába jaríñagun ja maráanserunbaña joun ja aráansebaña.
“Rújuma murúsun lídaangiñe jigásin woun,
ladǘga léñeguchuña walámpun.”
9 Ába jaríñagun ja aráansebaña joun.
“Siñáti,
ladǘga loúguabei woun,
loúguame jun.
Jeíbagubei le ñí lubei lalúgurajoúa agáñija jumámuga júngua.”
10 Léti añángüra lan ja maráanserunbaña agáñija gási,
ligía liábin adári.
Játi aráansebaña,
ába jebélurun lúma maríeirugun,
ába ladaurúniwa béna.
11 Lárigiñe,
ligía jachǘlürün jíbiri würíña irájüñü jagía,
ába jaríñagun.
“¡Wabúreme,
wabúreme,
darábei béna wabá!
12 Ába laríñagun joun.
“Ninárün jáu,
ibídiñetün nun.”
13 Ábati laríñagun Jesúsu joun.
—Agágudúañu jumá,
ladǘga ibídiñeti jun cába lan wéyu,
ni cába lan óra nagíribudun,
áu le Wügǘri Garaǘwarügüti,
uboúagun.
Jémpulu luáguti seínsu
14 ‘Ítara líña arúeijani le lánina siélu quei ában wügǘri le dan lébei laráansejan lun ladǘgün weíyaasu lídoun ámu fulásu,
ába lagúarun joun lumúsuniña,
ába líchuguni liseínsun lábugiñoun jaríaajan.
15 ‘Lun ában jádaangiñe,
rúti queí buri seíngü-mílu fiádürü,
queí buri bián-mílu lun ában,
queí buri mílu lun ában.
Lafánreinjani joun quei jabáfu lun jawádigimariduni.
Ábati lídin luágu luweíyasun.
16 Le músu le erésibirubei seíngü-mílu fiádürü,
ába luwádigimariduni,
ába lagáñeirun seíngü-mílu fiádürü ligíbuagun.
17 Ítara méme le erésibirubei bián-mílu,
gáñeiti bián-mílu lánwoun.
18 Ánjeinti le erésibirubei mílu,
ába lídin,
ába lachígin ában júyu,
ába larámuduni liseínsun liyúbudiri ñi.
19 ‘Sarágu dan lárigiñe,
ába lagíribudun iyúbudiri,
ába lagúmeserun aráanseja jáma luágu seínsu.
20 Furúmiñe,
ába liábin le erésibirubei seíngü-mílu fiádürü,
ába ledéregeruni lun liyúbudiri láu seíngü-mílu le lagáñeirubei ligíbuagun,
ába laríñagun lun.
“Niyúbudiri,
seíngüñein-mílu fiádürü bíchugun nun,
niján seíngü-mílu nagáñeirun ligíbuagun.”
21 Ába laríñagun iyúbudiri lun.
“Buíti,
ában músu buíti amǘrü,
úaragua,
quei úaragua bubeí lídan le murúsunrügüti,
níchiga gíbetimaati lábugiñe baríaajan.
Queímoun,
gúnda amǘrüme úara núma.”
22 Lárigiñe,
ába liábin le erésibirubei bián-mílu fiádürü,
ába laríñagun.
“Niyúbudiri,
biámañein-mílu fiádürü bíchugun nun,
niján bián-mílu nagáñeirun ligíbuagun.”
23 Ába laríñagun liyúbudiri lun.
“Buíti,
ában músu buíti amǘrü,
úaragua,
quei úaragua bubeí lídan le murúsunrügüti,
níchiga gíbeti lábugiñe baríaajan.
Queímoun,
gúnda amǘrüme úara núma.”
24 Ligía liábin le erésibirubei mílu fiádürü,
ába laríñagun lun liyúbudiri.
“Niyúbudiri,
subúdigubei numúti luágu wügǘri ban jéreguti,
alúbaja ban le ñí lumuti mábunagun ban,
abúdaja amǘrü le ñí lumuti machágarun ban ni cáta.
25 Ligía nanúfudedunbei,
ába nídin arámudei biseínsun lábugiñe múa.
Niján le báni.”
26 Ába laríñagun iyúbudiri lun.
“Músu wuríbati,
moúnti.
Subúdigubei bíñein luágu alúbaja nan le ñí lubei mábunagun nan,
abúdaja áu le ñí lubei machágajan nan ni cáta.
27 Ligía lúnti lubeí jamúga bíchuguni niseínsun báncürugun lun dan lan jamúga nagíribudun,
nerésibiruni le náni láu agáñeiruni.”
28 Ába laríñagun joun ja ñíbaña.
“Gidájumei seínsu le lúmabei lueí,
rújumei lun le láubei díisi-mílu,
29 ladǘga le adǘgübei buíti láu le lúmabei,
líchugúba lánwoun lun,
ábanme lígiragun lun,
ánjein le madǘgübei buíti láu murúsun le lúmabei,
lagídarúaba lueí.
30 Músuti moúnti le,
fíjumei lídoun lubúriga le boúgudibei,
le ñíba lubeí layájuaja,
acǘnrijame lári.”
Jagúseragüdǘniwa sun gürígia
31 ‘Dánme nagíribudun,
áu le Wügǘri Garaǘwarügüti,
uboúagun,
niábinba quei urúei geyégu ánjeligu náu,
ábame nañúurun luágu nála láu uweíriguni lun nagúseragüdüniña sun gürígia.
32 Ábame joúndaragun gürígia ja lílana sun fulásu nigíbugiñe,
ábame nafánreinraguniña jawáriuagua quei lafánreinraguniña joúniri mudún,
mudún jádaangiñe gábara.
33 Ja richáguabaña ligíbugiñe Búngiu,
ábame níchuguniña lueígiñe noúnwenren,
ja wuríbabaña ligíbugiñe Búngiu,
lueígiñebaña nubaǘna.
34 Naríñagame joun ja lueígiñebaña noúnwenren.
“Jigoúgu,
jugúya le biní laalíbei Núguchi,
resíbi jumeí arúeijani le aráanserúbei jubá lúmagiñe ladǘgüni Búngiu uboú.
35 Ladǘga dan le nalámachunbei,
rútün eígini nun,
dan le namágürabudunbei,
rútün dúna nun,
dan le eíbugañaja nubeí quei chülǘdügüti,
rútün múna nun.
36 Dagáti manáanguni nuágu,
rútün anáanguni nun,
dan le nasándirunbei,
ñǘdüntün aríjana,
dan le nadaürǘnbei,
ñüdǘntün aríjana.”
37 Ábameti jaríñagun richáguatiña jagía nun.
“Wabúreme,
¿ída bugagí waríjabu láu ilámaü,
ába wíchugun eígini bun?
¿ída bugagí waríjabu láu mágürabu,
ába wíchugun dúna bun?
38 ¿Ída bugagí waríjabu quei chülǘdügüti,
ába wíchugun múna bun?
¿o manáangunga,
ába wíchugun anáanguni bun?
39 ¿Ída bugagí waríjabu láu sándi o furísunrugu,
ába woúdin aríjabu?”
40 Ábame naríñagun joun.
“Ninárün jáu,
furúmieguarügü cátei le jadǘgübei lun ában jádaangiñe namúlenu,
ca lan lǘnabunbei,
nun méme jadǘgei.”
41 ‘Naríñagameti joun ja lueígiñebaña nubaǘna.
“Díse jumá nueí,
jugúya le lúnbei jasúfurirun lun sun dan,
jeíba lídoun wátu geméti le méñeguchadibei,
le aráanserúbei lubá Máfia jáu lánigu.
42 Ladǘga dan le nalámachunbei,
míchutün eígini nun,
dan le namágürabudunbei,
míchutün dúna nun.
43 Eíbugatina quei chülǘdügüti,
míchutün múna nun,
mégeitina anáanguni,
míchutün nun,
sánditina,
daǘwa áu,
mídintün aríjana.”
44 Ábame jaríñagun wuríbatiña jagía nun.
“Wabúreme,
¿ída bugagí waríjabu láu ilámaü o mágürabu,
o quei chülǘdügüti,
o manáangunga,
o láu sándi,
o furísunrugu,
míderagun wamútibu?”
45 Naríñagame joun.
“Ninárün jáu,
luágu furúmieguarügü lan cátei le madǘgün jubeí joun gürígia,
ca lan lǘnabunbei,
madǘgün jumúti gíñe nun.”
46 Ábameti joúdin ja máfiougatin lun jasúfurirun ñi lun sun dan,
jámeti richáguabaña ligíbugiñe Búngiu,
ábame joúdin siélun lun jagúndaarun ñi lun sun dan.