Líchugun Jesúsu jadúnrun fariséogu jáma arúfudajatiña lilúrudun Moisés
23
1 Ábati laríñagun Jesúsu joun láni disípulugu jáma jíbiri gürÍgia ja ñíbaña.
2 —Gabáfutiña arúfudajatiña lilúrudun Moisés jáma fariséogu lun jafúnraanguagüdüni líla lilúrudun Moisés.
3 Agáamba jumáña lubeíti,
adǘga jumeíme sun le jaríñagunbei jun,
le jadǘgübei,
mafálara jumeí ladǘga aríñagatiña ában cátei,
jadǘga ámu.
4 Rújamuti gumádi joun gürígia queísi anǘgüni jǘrüti le siñábei lanügǘniwa,
ánjein jagía,
madǘgüntiña ni cáta lun jíderaguniña gürígia luágu buri anǘgüni lánina lúrudu le jíchugubei jawágu.
5 Jadǘgüni sun cátei lun jaríjiña gürígia.
Jínsiñeti joun lun jíchugun tirájüñü gáfu táu Lerérun Búngiu jeréberugu lúma luágu buri jarǘna,
lúma lun jadáüragun anáanguni to durúrutu.
6 Buséntiña járügüdüni lubuídun-ágei ubáraü lídan eígini lúma jalaǘ le jála weírigutiña tídan jalígilisin.
7 Buséntiña lun jabúsurun gürígia joun láu sarágu inébesei ǘmada,
lun gíñe lagúarúniwa joun,
“maésturugu”.
8 ‘Ánjein jugúya,
mígira jumá lun laríñawagúniwa jun,
“maésturugu”,
ladǘga sun jugúya ában jáu,
áni ában rügǘñein gíñe Jumaésturun,
áu le Crístubei.
9 Maríñaga jumá gíñe “núguchi” lun ni ában wügǘri uboúagu lídan ligáburi jagúaruni Búngiu le siélubei “Núguchi”.
10 Mígirun jugúyame lun laríñawagúniwa jun “ábutigu” ladǘga Crístu rügǘñein Jábuti.
11 Le esériwidubei joun jíbiri,
ligía weírigutimaabei jídan,
12 ladǘga le anáanguti lúngua weíri,
lǘnabudagüdǘwaba,
ánjein le anáanguti lúngua ǘnabu,
laweíridagüdǘwaba.
13 ‘¡Fugiábugu jugúya arúfudajatiña lilúrudun Moisés jáma fariséogu!
¡Biángua tigíbu!,
ladǘga darú jumuti lubéneri arúeijani le lánina siélu lueí jebélurun ámu,
mebélu jugúyati,
mígirun lun jebélurun ja busénbaña jebélurun.
14 ‘¡Fugiábugu jugúya,
arúfudajatiña lilúrudun Moisés jáma fariséogu!
¡Biángua tigíbu!
Gidá jumutu jában würíña ja jiláaña úmari jaweí,
lúnti ibídiñewa lan,
ába jadáagun ayúmuraguni lun Búngiu le migínaguti.
Ligía weíritimaabei lubeí jasúfurirun lueígiñe.
15 ‘¡Fugiábugu jugúya arúfudajatiña lilúrudun Moisés jáma fariséogu!
¡Biángua tigíbu!
Eíbuga jumúti múa,
áfayaja jumeí barána áluaja gürígia lun jánigume,
dánti le ibíja jumáali le jabúseerubei,
ába jadǘgüniña gürígia jagía bián weíyaasu lúntima joúdin máfiougati sügǘ jáu.
16 ‘¡Fugiábugu jugúya,
adúndejatiña maríjintiña!
Aríñagatün luágu le lan gürígia íchuguti dimúrei,
ánjein áfiñura tuágu témpulu mála lan líra,
áni ánjein lan áfiñura luágu tigóluna témpulu,
aná lan líra,
lúnti lan lagúnfulirun.
17 ¡Ibídiougua líña jáu,
maríjin!
¿Cági weírigutimaabei,
gólu ódi témpulu to adǘgüboun lun sagráubei lan gólu?
18 Aríñagatün gíñe luágu ánjein lan íchiga gürígia dimúrei lun láfiñurun luágu latárü,
mála lan líra,
áni ánjein lan áfiñura luágu cátei le adágaragüdǘwabei luágu latárü,
aná lan líra,
lúnti lan lagúnfulirun.
19 ¡Ibídiougua líña jáu,
maríjin!
¿Cági weírigutimaabei,
cátei le luágubei latárü ódi latárü le adǘgübalin cátei ligía lun sagráubei lan?
20 Le áfiñurubei luágu latárü,
máma rügǘñein luágu latárü láfiñurun,
láfiñuruña gíñe luágu sun le ligíbuagubei latárü.
21 Le gíñe áfiñurubei tuágu témpulu,
máma rügǘñein gíñe tuágu témpulu láfiñura,
láfiñuruña gíñe luágu Búngiu le aganoúbei tídan.
22 Le gíñe áfiñurubei luágu siélu,
láfiñuruña gíñe luágu lála Búngiu,
lúma gíñe luágu Búngiu le añúurubei luágu jalaǘ ligía.
23 ‘¡Fugiábugu jugúya arúfudajatiña lilúrudun Moisés jáma fariséogu!
¡Biángua tigíbu!
Adǘgatün díisi fáreinti láu jíduru le ménta,
anísi,
lúma comíno lun jíchugun ában fáreinti lun Búngiu,
áni mebéresentün láu arúfudajani le weírigutimaabei lídan lilúrudun Búngiu,
queí buri lun jadǘgüni sun cátei láu úaraguni,
lúma lun jagúdemedun gürígia jun,
lúma lun jagúnfulirun lúma Búngiu.
Ligía buri cátei le lúnbei jadǘgüni,
mígirunga jumeíme jadǘgüni le líbiri.
24 ¡Jugúya,
adúndejatiña maríjintiña jugúya le,
áseija jumúti ában minímini áni julútün ában caméyu!
25 ‘¡Fugiábugu jugúya arúfudajatiña lilúrudun Moisés jáma fariséogu!
¡Biángua tigíbu!
Adǘgatün lun jarítagun gürígia luágu buídu lan jigáburi.
Ítara jíña quei wéru lúma asíedu le jachíbubei boúgudigiñe libíti,
ánjein múnadagiñe jibíti,
buin jíña láu buri luweínamu-águu lúma íweruni.
26 Fariséogu maríjintiña.
jarúmagüda jumeí wéru lúma asíedu lurágeirugugiñe furúmiñe,
ábame gíñe larúmadun boúgudigiñe libíti.
27 ‘¡Fugiábugu jugúya arúfudajatiña lilúrudun Moisés jáma fariséogu!
¡Biángua tigíbu!
Ítara jíña quei umúajaü le afeíndijoúti láu jarúti boúgudigiñe libíti,
buídumeraüti larijín,
ánjein lurágeirugugiñe,
buín líña láu jábu jiláaña lúma sun luwúyeri iwíyei.
28 Ítara jíña,
boúgudigiñe jibíti,
ma lubuídun jarijíniwa jagíbugiñe gürígia,
ánjein múnadagiñe,
buín jíña láu iyéerejabuni lúma wuríbani.
29 ‘¡Fugiábugu jugúya arúfudajatiña lilúrudun Moisés jáma fariséogu!
¡Biángua tigíbu!
Rújumuti dǘbü arítaguagüleime luágu jamúaja profétagu,
wéndegüda jumeí umúajaü le jáni gürígia já meja buídubaña.
30 Ábati jaríñagun.
“Lun jamúga meja awánjeinjadiwa lan le jadáani binádu wagǘbürigu,
míderagun wamútiña jamúga áfaraguaña profétagu.”
31 Láu líra,
subúdiguatün júngua luágu jádaangiñetün lan ja áfaragubaliña profétagu jagía.
32 ¡Gumújumeiti jadǘgüni lé meja jagúmeserubei binádu jagǘbürigu adǘga!
33 ‘¡Jéwegu!
¡Jarásan jéwegu!
¿Ída lubásan jeséfurun lueí asúfuriruni le lánina máfiougati?
34 Ligía noúnajaba lubeí profétagu,
jáma ja chúbaña áu,
jáma arúfudajatiña,
jun.
Áni jugúya,
jáfaragubaña jádaangiñe,
dágua jumáñame jíbiri luágu gurúwa,
bei jumáñame jíbiri tídan jalígilisin juríu,
eíbaaja jumáñame lídan sun fulásu.
35 Ítara lúba láburujan dúru juágun luágu sun jítaü le áwiyurubei jádaangiñe sun wügǘriña buítiña ja jáfarawagúbaña,
lúmagiñé meja Abél le richáguabei darí lúmoun Zacarías,
liraǘ Berequías lé meja jáfarubei tabádinagua témpulu lúma latárü.
36 Ninárün jáu luágu láburujaba lan dúru jawágun gürígia ja lánina dan le luágu buri sun cátei le.
Layájun Jesúsu jawágu lílana Jerusalén
37 ‘¡O jugúya Jerusalénna!
¡Áfaragua jumáaña profétagu,
chǘgua jugúya dǘbü jawágun ja loúnajabaña Búngiu láu ugánu buíti jun!
¡Sarágu weíyaasu nálugun natoúnigirunün quei tatoúnigiruniña gáyu tirájüñü lábugiñe tarǘna,
májatün!
38 Ígira láadün Búngiu,
39 áni naríñajare jun luágu maríjindügüya jumáadina lan queísi jasálbaragüle daríme lachǘlürün dan lun jaríñagun.
“Biníwati le ñǘbinbei lídan líri Wabúreme Búngiu.”