Lebélurun Jesúsu Jerusaléoun
21
1 Dan le yaráfaaña lubeí lun Jerusalén,
ába jachǘlürün ligíbugiñe fulásu le gíribei Betfajé,
le ǘnabubei libíti wǘbü le Olívos,
2 ába laríñagun Jesúsu joun biáma jádaangiñe láni disípulugu.
—Jeíba lídan liraǘraü fulásu le wagíbugiñebei,
jadáriruba ában burígü güráñu ñi láu ában liraǘraü burígü túma,
ábame jafáragaduniña,
ábame janǘgüniña nun.
3 Ánjein ñi adímurejati jun lueígiñe jadǘgüni,
ábame jaríñagun lun luágu busén lániña Jesúsu,
luágu láguyugüdübaña lan.
4 Lasúseredunbei líra lun lagúnfulirun lé meja laríñagubei proféta dan le labǘrüjanbei ítara.
5 Aríñaga jumá lun ubúrugu Sión.
“Niteín Burúeite bun láu ǘnabuni,
waríñu lanágawagu ában burígü,
waríñu luágu ában liraǘraü burígü,
anímaalu anáajati ílaü.”
6 Ába joúdin disípulugu,
ába jadǘgüni quei laríñaguni Jesúsu joun.
7 Ába janǘgünun burígü tugúya láu sun tiraǘ,
ába jíchugunun janáangun jawágu,
ába lawárirun Jesúsu.
8 Sarágu jañáti gürígia,
ába jábudunun janáangun luágu ǘma,
jíbiri,
ába jáchuajan tilímun wéwe,
ába jíchaajani luágu ǘma.
9 Dándu gürígia ja ubáraübaña quei ja árigibaña,
ába jagúmeserun agúaraja.
—¡Uweíriguni lun ladǘgawagun urúei Davíd!
¡Biníwati wügǘri le ñǘbinbei lídan líri Wabúreme Búngiu!
¡Uweíriguni lun Búngiu!
10 Dan lebélurun Jesúsu ubúrugun Jerusalén,
ába jafúudun sun ja ñíbaña,
ába jaríñagun sarágu.
—¿Cáteisan gürígia le?
11 Ába jaríñagun gürígia.
—Jesúsu le,
le Nazarétna,
fulásu le lídaanbei Galiléa.
Ligía ában proféta.
Larúmadagüdünun Jesúsu témpulu
12 Lárigiñe,
ába lebélurun Jesúsu tídoun láni Búngiu témpulu,
ába labúgaguniña sun alúgurajatiña jáma agáñijatiña ja ñíbaña.
Ába lagárabaguni dábula buri le jadábulan asáansijabaña seínsu ñi joun gürígia,
lúma jála ja alúgurajabaña únjun.
13 Ába laríñagun joun.
—Laríñajare Búngiu tídan Lerérun.
“Núban fulásu le ñí lubei gayára lan jayúmuragun gürígia nun”,
ánjein jugúya,
barǘ jumaaru quei jában jíwerutiña.
14 Ába jayábin fiú maríjintiña jáma danímaatiña lúmoun Jesúsu ñi témpulurugu,
ába lareídaguagüdüniña.
15 Dan le jaríjinbaalin jábutigu fádirigu jáma arúfudajatiña lilúrudun Moisés miláguru buri le ladáagubei,
lúma dan le jagáambuni jagúarajan irájüñü témpulurugu.
“¡Uweíriguni lun ladǘgawagun urúei Davíd!”,
ába jagáñidun.
16 Ába jaríñagun lun Jesúsu.
—¿Agáamba bumútisan le jaríñagubei ja?
Ába laríñagun Jesúsu joun.
—Ánja,
agáamba numúti.
¿Malíijan jumágili tídan Lerérun Búngiu le ñí lubei laríñawagúa lun Búngiu.
Adǘgaadibu lun jerémujan ñǘbürigiña jáma irájüñü ja machǘlaagiña,
cátei buíti buágu?
17 Ába lígiruniña,
ába lídin ubúrugugiñe lun Betánioun,
ába lásügürüni áriebu ñi.
Líñaragunun Jesúsu tídibu ígo to míinboun
18 Larúgan bináafin,
dan le lagíribudun Jesúsu ubúrugun,
ába lalámachun.
19 Ába laríjin ában tídibu ígo láru ǘma,
ába lídin tuágun,
madáriti ni cáta tuágu lueídügüya ubánaü.
Ába laríñagun tun tídibu ígo tugúya.
—¡Magíindadügüyabá!
Lídan óra ligía ába tásaürün.
20 Dan jaríjini disípulugu cátei le,
ába laweíridun janígi,
ába jaríñagun lun Jesúsu.
—¿Ída liñásan tásaürübei tídibu ígo to ítara oúfun?
21 Ába laríñagun Jesúsu joun.
—Ninárün jáu,
ánjaün afíñe le gumúti,
mámarügübei líbe le nadǘgübei tun tídibu ígo to gayára jumá adǘga,
gayáraabei jaríñagun lun wǘbü le.
“Gidába yágiñe,
dabúba baránajoun”,
ábame lasúseredun.
22 Súnme gíñe cátei le jamúriajan lúma Búngiu,
ánjein afíñe jubeí,
jibíjubei.
Lubáfu Jesúsu
23 Ábati lebélurun Jesúsu témpulurugun,
dan niján lan arúfudaja ñi,
ába jayábin jábutigu fádirigu jáma wügǘriña ábutigu lídan jafíñen juríu,
ába jaríñagun lun.
—¿Aríñagabeí woun ca lan biríchabei lun badǘgüni cátei le?
¿Ca íchugubalin ubáfu le bun?
24 Ába laríñagun Jesúsu joun.
—Nálügüdaadün gíñe ában cátei,
ánjein joúnaba nun,
ábame naríñaguni jun ca lan áu ubáfu nadǘgei buri cátei le.
25 ¿Ca oúnajabalin Juan abásteragüdaja?
¿Búngiu,
ódi wügǘriña?
Ába jagúmeserun adímureja jámagua,
ába jaríñagun.
—Ánjawa aríñaga luágu Búngiu lan oúnajabalin,
laríñaguba woun ca lan uágu mafíñerun wabeí lun.
26 Ánjawa aríñaga luágu joúnajan lan wügǘriña,
joúserubadiwa gürígia wuríba ladǘga súngubei afíñetiña luágu proféta lán.
27 Ábati jaríñagun lun Jesúsu.
—Ibídiñeti woun.
Ába giñeti laríñagun joun.
—Maríñagun nubeí giñéti jun ca lan áu ubáfu nadǘgei buri cátei le.
Jémpulu jawáguti bián isáanigu
28 Ába laríñagun Jesúsu joun.
—Nabájüdaguá ában cátei jun,
jaríñageime nun ída líña lan jaríjin lun.
Ñíñein ában wügǘri,
biámañanu lisáanigu.
Ába laríñagun lun ában jádaangiñe.
“Niraǘ,
beíba ñadágimein ugúñe lídan talúbajoún ninádirigu.”
29 Ába laríñagun lisáani lun.
“Mabúseeruntina nídin.”
Lárigiñe,
ába lasáansiragun larítagun,
ába lídin ñadágimein.
30 Lárigiñe,
ába lídin úguchili aríjei le ában,
aríñageinaleí le méme laríñagubeí buga lun le furúmiñeti lun.
Ába loúnabun le.
“Ánja,
nídiba.”
Mídinti.
31 Aríñaga jumeí nun,
¿cági jádaangiñe biángubei adǘgübalin le labúseerubei úguchili?
Ába jaríñagun.
—Le furúmiñebei.
Ábati laríñagun Jesúsu joun.
—Ninárün jáu luágu choúrutima lan jebélurun agúburajatiña liseínsuna gumádi jáma jórugu lídoun larúeijan Búngiu sügǘ jáu,
32 ladǘga ñǘbinti Juan le abásteragüdajabei arúfudaja jun ída lúba lan ligáburi jabágaridun,
mafíñeruntün lun,
ánjañati ja agúburajabaña liseínsuna gumádi jáma jórugu,
afíñeratiña lun.
Jugúya,
láu sun aríja jumáni sun líra,
masáansiragunti jigáburi lun jafíñerun lun.
Jémpulu jawáguti ñadágimeintiña ja wuríbabaña
33 ‘Agáamba jumeí ábaya jémpulu le.
Luáguti ában wügǘri labúreme ában ichári,
ában lábunagun tídibu beíbei lichárirugu,
ába ladǘgün baríeru láu,
adǘga ligía ában ágei lun laríbichawagún tíra beíbei lídoun lúma ában wáyelesi lun gayára lan loúnigiruni sun cátei.
‘Ába lájayajani ichári joun ñadágimeintiña,
ába lídin adǘga weíyaasu.
34 Dan le lachǘlürün dan lun alúbajani,
ába loúnajan jádaangiñe lumúsuniña amúriajei lufánran jámagiñe ñadágimeintiña.
35 Ábarüga járügüdüniña ñadágimeintiña músu jagía,
buleísei jameí ában,
áfara jameí ában jilágubei,
rúgua jagía dǘbü luágu le ában.
36 Ábaya loúnajan labúreme ichári gíbetimaajaña sügǘ jáu ja loúnajabaña furúmiñe,
ligía méme jadǘga ñadágimeintiña joun.
37 ‘Agúmujoúni,
ába loúnajani liraǘ,
ába laríñagun lúnguarügü.
“Inébebei niraǘ joun.”
38 Dan le jaríjinbaalin ñadágimeintiña liraǘ,
ába jaríñagun jámagua.
“Nijánba le erésibirei alágan,
wáfaraali jilágubei,
reídei wamámuga láu alágan.”
39 Ábati járügüdüni,
ába jaságaruni lídaangiñe ichári,
ába jáfaruni jilágubei.
40 Ába lálügüdajan Jesúsu.
—Dánmeti liábin labúreme ichári,
¿cábagi ladǘga jáu ñadágimeintiña ja?
41 Ába jaríñagun lun.
—Láfaragubaña wuríbatiña jagía jilágubei,
magúdemedagúnbaña lun,
ábame lájayajani ichári joun ámu ñadágimeintiña ja lúntiña jedéregeruni lufánran lun lídaangiñe alúbajani lídan dan.
42 Ábati laríñagun Jesúsu joun.
—¿Malíijañaja jumágiru Lerérun Búngiu?
Taríñajare nuágu.
Le meja dǘbü le mabúseerun jabeí ábunagutiña,
ligíaali furúmiñeti.
Wabúreme Búngiu adǘgübalin lun furúmiñebei lan,
áni aríja wamúti quei ában cátei weíriguti.
43 Ligía naríñagunbei jun luágu lagídarúaba lan larúeijan Búngiu jueí,
jugúya le weírigubei lídan jafíñen juríu,
ábame líchugúniwa joun gürígia ja edéregeruti alúbajani le láni larúeijan Búngiu.
44 Ánjeinti áu,
le dǘbü ligía,
furúmieguarügü le eíguaduti nuágun lañaǘrudagúba,
léti uáguti leíguada nigáñi,
lagúmuchaguagüdübei.
Ligíaba asúsereda joun gürígia ja májabaña nun.
45 Dan le jagáambunbalin jábutigu fádirigu jáma fariséogu jémpulu buri le líchugubei Jesúsu,
ába jasúbudiruni luágu jawágu lan ladímureja.
46 Ábati jabúseerún yebe járügüdüni,
madǘgün jamúti ladǘga janúfude jaweí gürígia,
ladǘga afíñe jamá gürígia luágu proféta lan.