Bemât ragâs nejwang e tê bemat-raa
5
Be tē,
behak e ji min be ragas nejwang.
Ko yerê nejwang o na shɛsh ne bemat de ba tɔk Dagwi mwa wɛt,
na sé wɔgɔ,
mwat a vɔk hwâ da mɛ.
2 Kée!
Ko yin e dak kaa wɛt a?
A yâng sé naka na yin a vɔk lashê yey e negya,
na yin a pat yerê mwat de a ra pyɛ yane yi e nesa min.
3-4 Mwa ano de ma sé na yin e rebek hom wɛt,
ko ma sé tanga yin e yey hom tyɛng sede ma yâng sè e hane.
Ko ma ga kana gang mwat de a ra pyɛ yane na shɔt à me e ji rezâ Darwey mot Yɛsu.
Pyɛ de yin ê ra a yet ngan:
Tula hin e dem tula min,
ko me,
mê sè ɛ̀ tanga yin e yey hom,
ko retô Darwey mot Yɛsu rê sè ɛ̀ tanga yin arɔng.
5 Pat in mwat wane mo,
na yin a nára hɛ e vwɔ̂ Shetan,
yaga na be bin wey na rebek mɛ rê banɛn,
na be ba sey neken mɛ tuk de Darwey a rɔda ba vɛ̄ hɛ.
6 A jam na yin a dak kaa wɛt.
Yin a tɔk há hemo de be ye,
“A sé e kegéy-sing tyɔng zɔng de ke pere tɛ̀ nemuk kpam-tuk de ba ga bɔrɔk nɛ ne puu mwa.”
7 Yaga ano,
pat in banɛn de ba sé e tē min sede géy-sing roso,
na yin a sè jɛrɛ.
Ko ano,
yin a rɔda sè sede nemuk kpam-tuk de ba bɔrɔk nɛ vit a géy-sing.
Ey,
yin a sé jɛrɛ,
yaga ba ga nára Kristi sede nɔrɔ̂ yas de be yɛt vɔk na Dagwi yaga wot.
Yɛ Kristi mo a sé sede ketyimit de ba ga nára e jeng Nzem Gyilsit Nelɔ BeIsrayɛl.
8 Tik na wot a pat kanɛ nengyas na neves yi e ji mot,
sede BeYuda de be pat géy-sing roso ano e jeng nzem o.
Ko tik na negwɔn mot ne sè jɛrɛ,
na ne to sè ne tsak o arɔng.
Ko ano,
wot ê ra nzem o na kpam-tuk sana géy-sing.
9 Ma ga kana jɛk a yin e ji bwok-rwang hom wɔgɔ,
pyɛ min cak ye kwon sè na bemat de be ragas nejwang.
10 Ma kana bare e ra bemât jey wɛt vemo de be ra nejwang,
kɛ vemo de be vɔk gananâng pyɛ́,
kɛ vemo de be mɔt bemat,
kɛ vemo de be sap cī.
Ka sede yin e simo na yin a wuna hin na yɛn wɛt,
ka a yâng sè gbing-gbing na yin a hàla jey yemo e gùna mo.
11 Ko ma kana bare,
pyɛ min cak ye kwon sè na kawɛ mwat de e tâng tó mɛ,
a sé gwà min e ji raa,
ko mwa ano,
e ragas nejwang,
kɛ e vɔk gananâng pyɛ́,
kɛ e sap cī,
kɛ e ha há ves e ra bemat,
kɛ e feng siring,
kɛ e mɔt bemat.
Yin ka re pyɛ́ na yerê mwat wane wɛt.
12-13 Sɛ́ hom ya sé na me ra a vemo de ba sé bemat-raa wɛt shɔt arɛt?
E Dagwi de a rɔda ra a yɛn shɔt.
Ko a sé e vemo de ba sé e ji ekilisiya de yin ê ra a yɛn shɔt wɛt arɛt?
Sede remo de bà jɛk e Bwok-basa Dagwi wɔgɔ,
“Ró in mwat vwes wane yi e tē min.”