6 “Ano, zarap e ra vwêl Israyɛl na hwo yang beraku, na berahwol, na nerɔt tanga benɛk: ‘Darwey Dagwi Darwey a ye: Ma sé ha e ji nepêp repugu hom, yaga yin a ga di reyɔm na dúsa yére bemat jey. 7 Me Darwey Dagwi Darwey ma sira, mê tɛ̀ yére bemat jey de ya gwɔrɔ hin o ye sè pyɛ dúsa.’

8 “Ko di yin, à berakû Israyɛl, cɔ́gɔt min yê nára nelang, ko yê mara a yin bemat hom BeIsrayɛl nèy, yaga yɛn a vey bagat toyo vɛ hɛn. 9 Di in a remo, ma sé mwin, mê doyo vey na yin, ko mê tɛ̀ be to how cāp min, be tus ɛ pyɛ́. 10 Mê gwɛ̌ nepyak min, mwa yin BeIsrayɛl, yin ê to sangal e bapomo min, ko yin to lɔk barin min 11 Mê gwɛ̌ nepyak bemat min mwa na yas min. Yin ê gwɛ̌ hin ko yin ê tɔs nèy pyak arɔng, ko mê tɛ̀ yin sangal sede raane, na me ra a yin pyɛ́ ryat de ya dal yê raane. Ano yin ê tɔk, me wɛ a Dagwi Darwey. 12 Mê to tɛ̀ bemat hom, BeIsrayɛl, be kyě kyè e ji min, bê sey in sede benap mɛn, ko yin ê sang to mɔbɔs nèy mɛn wɛt.

13 “Me Darwey Dagwi Darwey ma ye: A remo de bemat o bá tang in, ‘Yin a ga re bemat, ko yin a ga mɔbɔs nèy bemat min’, 14 ano, yin ê to re bemat, kɛ yin to mɔbɔs nèy bemat min wɛt. Me Darwey Dagwi Darwey ma ye ano, 15 ko mê to tîk na yin a wokos dusâ bemat wɛt, yin ê to niri na byɛ̂s bemat wɛt, ko yin ê to tɛ̀ bemat min be ye bugurɛk wɛt. Me Darwey Dagwi Darwey ma ye ano.”

16 Dagwi Darwey a ha na me, a ye, 17 “À mwasi, jeng de BeIsrayɛl bá sangal e vwel mɛn, bá tɛ̀ hɛ ligis na begwong mɛn tanga tomong mɛn. Negwɔn mɛn e bayis hom ná sè sede nevês hwā e jeng berang mɛ. 18 Yaga ano, ma shusha shom hom e ra yɛn yaga nemi de yɛn a ga lusha e ra vwel o, na yaga cī de yɛn a ga tɛ̀ mɛ hɛ ligis. 19 Ma shara hɛn e ji yére bemat, ko yɛn a kyě bere hɛn e bavwel detidetu, tyɛng na negwɔn mɛn na tomong mɛn de ma ra a yɛn shɔt e ra nɛ. 20 Ko jeng de yɛn a vey e ji yére bemat o, kahɛ kwɔn de yɛn a wɔ́ ɛ, ko yɛn a tɛ̀ reza hom rê jɛrɛ ligis. Yaga ano, bá tang ɛn, ‘Bemat Dagwi Darwey à vemo, ko mwa ano, á sè gbing-gbing na yɛn a nusu hɛn yi e vwel mɛ.’ 21 Ko pyɛ mo yá bɔrɔk me, yɛ à, reza hom rê jɛrɛ de BeIsrayɛl ba ra jɔgɔ na rɛ e tê yére bemat jey de yɛn á wɔ̀ sangal ɛ.

22 “Yang BeIsrayɛl, Darwey Dagwi Darwey a ye, ‘A sé yaga yin wɛt, à BeIsrayɛl de ma sé kyè wɔ̀ ra pyɛ cak, ko yaga reza hom rê jɛrɛ de yin a ra jɔgɔ na rɛ e tê yére bemat jey de yin a wɔ̀ sangal na yɛn. 23 Mê tɛ̀ gbɔng reza hom jɛrɛ, de ha ga kana tɛ́ ɛ ligis e tê yére bemat jey, reza de yin a ra jɔgɔ na rɛ e tē mɛn, ano de yê tɔk, me wɛ a Dagwi Darwey. Me Darwey Dagwi Darwey ma ha ano, jeng de ma dura nejɛrɛ hom e bayis mɛn yi na yin. 24 Mê paa in yi e yére bemat jey o, na me tula hin yi e bavwel mwa, na me vey na yin e vwel min. 25 Mê zagat nshi nerat e ra yin, ko yin ê sè haalal yi e mwa negbiridik min, na me kus in haalal yi e mwa pyɛ̂ sekwit min. 26 Mê nɔng in yey pyas, ko mê tɛ̀ gabik pas e ji min, mê pat yi e rebek min yey de ya sé kashalang sede gwofwa, ko me nɔng in yê norok sede nama. 27 Mê tɛ̀ gabik hom e ji min, na me tɛ̀ yin raa Badu hom, na yin tē naka e de gyêng mwa nu hom. 28 Ano, yin ê sangal e vwel de mà nɔng bedabeda min, yin ê sè bemat hom ko mê sè Dagwi min. 29 Mê sey in yi e mwa negbiridik, ko mê nɔng in pyɛ̂ yéneng na ye sè á yin polos, mê to tɛ̀ vyong ye hwo e ra yin wɛt. 30 Mê tɛ̀ nèy cɔ́gɔt na pyɛ̂ hiri min ye sè shɛrɛk, yaga na yin sang to sɔ rekyên vyong e tê yére bemat jey wɛt. 31 Ano yin ê bare na begwong beves na negwɔn min de ná sè kís. Ano arɔng yin ê di neves banɛn min na tomong min de ba sé byɛm-byɛm. 32 Darwey Dagwi Darwey a ye, tik na yin a tɔk, a sé yaga yin de mê ra pyɛ́ yemo wɛt. Me simo yin vo rekyen na a yang in yɔɔt na begwong min, à yin BeIsrayɛl!’ ”

33 Darwey Dagwi Darwey a ye, “Jeng de mê tɛ̀ o haalal yi e mwa banɛn mo, mê tik o hwo to sangal e bapomo mo, ko me tɛ̀ be to lɔk barin mo. 34 Vwel de há sè gbingiring bê to how hɛ e tô hemo de ha sé hal de bemât kweres e gwong bá bɛrɛng hɛ. 35 Bemat o bê ye, ‘Vwel hemo de há sè gbingiring ha ga tɛ́ ɛ sede bwî Ɛdɛn, ko bapomo de ba ga kana tɛ́ ɛn barin, ba ga gabsa, ba ga to lɔk vɛ, bemat ba to sé sangal e ji vɛ, ko ba ga gwɔrɔ vɛ na jwa arɔng.’ 36 Ano, yére bemat jey de ba tɛt ɛ̀ e bapomo de ba gwɔrɔ hin bê tɔk, e me Dagwi Darwey de ma ga to lɔk nekwɔn de na ga kana gabsa, ko ma to tus pyɛ́ e nekwɔn de ná kana sè hal. Me Dagwi Darwey ma ha ano, ko mê ra ano.”

37 Darwey Dagwi Darwey a ye, “Mê tik BeIsrayɛl be rangal me na me ra a yɛn pyɛ yemo: Mê tɛ̀ nepyak mɛn ne gwɛ̌ hɛn sede kwarâ vyēl. 38 Sede kwarâ vyēl de be nása nɔrɔ̂ yɛ̄ vɔk na Dagwi, bê to sè sede kwarâ vyēl e Yɛrusalɛm e jeng yére nzem de yɛn a vɔk, ano de bapomo de bá kana sè barin bê sila na bemat. Ano, yɛn ê tɔk, me wɛ à Dagwi Darwey.”