6 Yirmiya a ye, “Dagwi Darwey a ha na me, a ye: 7 ‘Di Hanamɛl hwêy Shalum gwasha mo ê vey na hwo, ko ê yang o: Sey hwiri hom e Anatot, yaga e hwo de hwô tɔk viri gwɛ.’ ” 8 Ano kwong, tyɛng sede remo de Dagwi Darwey a ha, gwà hom Hanamɛl a vey na me, e kwɔn banga e lala bemat gyeng, ko a ye, “Sey hwiri hom e Anatot e vwel Bɛnyamin, yaga e hwo de hwô tɔk viri gwɛ, sey gwɛ.” Yi ano, ma tɔk a sé hâ Dagwi Darwey mwin. 9 Ma sey hwiri mo na Hanamɛl, gwà hom wo Anatot ko ma masa a yɛ dyâm gwɛ, dyām o ya wul shɛkɛl kuru na vɛ betaama. 10 Ma tɛ̀ vwɔ, na tô gwɔ̀m e ra byɛ mo, bemat nuha ba tɛ̀sɛ vɔ arɔng, ko ba masa dyām o e ra pyɛ masâ nedirik. 11 E bama mo, ma jut bebok-jɛ̂k byɛ mo mwa vɛ, bwok-jɛk gwo tô gwɔ̀m de ba jɛk ɛ badu sêy hwiri mo — na gwomo de gwa vɔk ɛ tô gwɔ̀m wɛt, 12 ko ma nɔ̂ng Baruk Neriya Maseya vɛ. Ma nɔng ɛ vɛ e bayis Hanamɛl, na bemat nuha de ba tɛ̀ vɔ e bebok-jɛk vè sey o, tanga bemat de bá se sangal e lala mo. 13 E nuyel mɛn mwa ma nɔng Baruk nu hemo, 14 “Dagwi Darwey, Da Jey Mwa, Dagwi Israyɛl a ga nɔng o nu na hwo sey bebok-jɛk o, mwa gwo sey o gwo tô gwɔ̀m, na gwo sana tô gwɔ̀m, na hwo tik vɛ e ji tsûng secwem, yaga na be tik vɛ gyat neshey de ne kyè vey. 15 Yaga Dagwi Darwey, Da Jey Mwa, Dagwi Israyɛl a ga ye: Ba rɔda to ba seres nelɔ, na hiri, tanga bě anap e vwel hemo.”

16 Bama de ma ga nɔ̂ng Baruk Neriya bebok-jɛk ve sêy hwiri mo, ma hwo ra won, ma ye, 17 “À Darwey Dagwi Darwey! Hwo wɛ hwà yong jey na lagwi na gbɔng reto mo, na gap mo. Pyɛ cak ya dal gap mo wɛt. 18 Hwà ga dura tɛ̂ yey mo de he sege hɛ wɛt na bemat gu kpɛɛ, ko hwó tabak bemat arɔng yaga banɛ̂n beda mɛn. Hwà sé gbɔng Dagwi wo reto sizɔng, reza mo a Dagwi Darwey, Da Jey Mwa. 19 Hwó yong pyɛ́ de hwô ra na netsitsɛng, ko hwó ra pyɛ́ ryey o tyɔng wɛt. Hwó bɛrɛng kayɛ pyɛ de bemat be ra, ko hwó tala hɛn tyɛng na tom mɛn. 20 Raane hwá ra pyɛ̂ bes na pyɛ̂ langat e Misra, ko hwà sé re nuyel na ragas yɛ pere vey e yunung, e ji Israyɛl na mwa e ji bwang bemat yére jey, yi ano ba tɔk o kagwa a remo. 21 Yi na râ pyɛ̂ langat na yê bes de ya nɔ̂ng bemat repugu mot bengyip, hwà ra fwom na reto mo na gap mo na hwo pat mɛ̀ bemat mo yi e Misra. 22 Hwà nɔng ɛn vwel rat de ha siri ko ha vɔk pyɛ́ shɛrɛk, sede remo de hwà kana sira a bedabeda mɛn. 23 Ko jeng de yɛn á vey e vwel o ko yɛn á sey ɛ nedanelɔ hɛ, yɛn á gyeng Badu mo kɛ ba sangal tyɛng na basa mo wɛt. Yɛn á ra pyɛ cak de hwà nɔng ɛn nu be ra wɛt. Yaga ano, hwà vey na gawey hemo mwa e ra yɛn.

24 “BeBabilɔn ba ga tula bagwɔt fongol, ba gwɔrɔ mɛ gbɔng repomo mo na be re rɛ, ko yɛn a sé tó como arɔng. Como, na vyong tanga tumbang bê tɛ̀ gbɔng repomo mo re gaba e vɔ mɛn. Hwà di de kayɛ pyɛ de hwà kana ha ya ga sila. 25 Ko di, à Darwey Dagwi Darwey, e hwo wɛ hwà nɔng me nu na me sey hwiri e bayîs bemat nuha, mwa ano de BeBabilɔn ba vey bagat re gbɔng repomo mo.”

26 E bama mo, Dagwi Darwey a yang me, 27 “Di, ma sé Dagwi Darwey, Dagwi bemasi mwa. Pyɛ cak ya dal gap hom a? 28 Ma sé kyè wɔ nɔng BeBabilɔn gbɔng repomo remo e vwɔ̂ Gbɔng Gwɔ̀m Nɛbukadnɛzar wo Babilɔn na bemat como mɛ, yɛn ê re rɛ, 29 ko bê dak kya e rɛ. Yɛn ê rangas rɛ buruk mwa na nelɔ sangal bemat de ba nɔngɔs me shom yi na rangas a Baal pyɛ̂ nesang hyɔɔlɔl e ra belarop beduk o, na shusha a bedagwi behak nenɔrɔ̂ nshi anap arɔng. 30 Yimo yi e newen mɛn, BeIsrayɛl na BeYuda ba ga sǎ e de lashe a me yey, be tɛ̀sɛ me wok shom na pyɛ de yɛn e ragas. 31 Bemat gbɔng repomo remo ba ga tɛ̀ me wok shom, ko me lashe yey sizɔng yimo yi e tuk de ba lɔk rɛ. Ma ga yong ɛ na me wey na rɛ e bayis hom, 32 yaga mwa neves de BeYuda na BeIsrayɛl ba ga ra, na be tɛ̀ yey hom ye beseng, yɛn mwa na begbɔng begwɔ̀m mɛn, na bemat nuyel mɛn, na bepiris mɛn, na bezarap mɛn, na BeYuda tanga bemât Yɛrusalɛm. 33 Yɛn a doyo a me mā, ko bayis mɛn wɛt, ko mwa ano de ma re nuyel na basa a yɛn, yɛn a tɛ̀ tong na be sey yong o wɛt. 34 Yɛn a pere wɔ tɛ̀ pyɛ̂ sekwit mɛn de ye lɔ́l a me yey e Gbɔng Duk Re Fongol de ba lɔk yaga re a me fongol, ko yɛn a ga tɛ̀ wɛ ligis. 35 Yɛn a ga lɔk nekwɔn nása nenɔrɔ pyɛ̂ rangas vɔk na Baal e Nɛk Hinɔm, na yɛn a nása ɛ nèy mɛn bewen na behwong vɔk na dagwi mɛn Molek. Ma nɔng ɛn nu be ra ano wɛt, ko ma ka bare, yɛn ê ka ra pyɛ́ yere yane, na be tɛ̀ BeYuda be ra renɛn wɛt.

36 “Di, a remo pyɛ de me Dagwi Darwey, Dagwi Israyɛl ma ye e ra gbɔng repomo remo de hwà ye, ‘Ba ga nɔng rɛ e vwɔ̂ gbɔng gwɔ̀m Babilɔn na como, na vyong tanga tumbang.’ 37 Ma sé kyè wɔ tula bemat o yi e bavwel de ma kana shara hɛn ɛ, e jeng shom hom, na lashe yey hom ding-ding, ko ma rɔda toyo na yɛn e kwɔn hemo, na me tik ɛn be sangal ɛ tyang. 38 Ano yɛn ê se bemat hom, ko mê se Dagwi mɛn. 39 Mê nɔng ɛn pyɛ ra jining e neyey mɛn: Be nɔng me nerey kayɛ jeng, yaga nerat mɛn pyɛ mɛn, tanga ne yére mɛn arɔng. 40 Mê wuna me na sira na yɛn gbak-gbak. Mê sang tik nà ra a yɛn pyɛ́ ryat wɛt, ko mê tɛ̀ yɛn a wok bengyip hom na yey mɛn mwa, yaga na yɛn a sang doyo yi na me wɛt. 41 Ma rɔda vɔk yey pyɛng e de râ pyɛ́ ryat yaga yɛn, ko mê tus ɛn ting-ting e vwel hemo na yey hom mwa na neken hom.

42 “Sede remo de ma ga vey na rezot remo e ra bemat o, ano de me kyè wɔ nɔng ɛn mwa pyɛ́ ryat de ma ga sira a yɛn e ra yɛ. 43 Bemat be tē, vwel hemo ha rɔda sè sede hey gbingiring de bemat na ngyāma ye sangal ɛ wɛt, ko bê nɔng BeBabilɔn hɛ. Ko bê to hwo seres hiri e vwel o. 44 Bemat bê seres vɛ, bê tɛ̀sɛ vɔ e bebok-jɛk ve row o, bê tɛ̀ tô gwɔ̀m, ko bemat nuha be tɛ̀sɛ vɔ arɔng. Pyɛ́ yemo yê té e yɛnɛ vwel Bɛnyamin, na e nebapomo de na gwɔrɔ Yɛrusalɛm, na e bapomo Yuda, na e bapomô vwel berahwol, na e nɛk berahwol tanga e bapomo Nɛgɛf. Mê toyo a bemat o na sevwel mɛn. Me Dagwi Darwey ma ha ano.”