Natan a gyong Davit
12
Pyɛ de Davit a ra ya kyɛ́ ɛ a Dagwi Darwey yey.
1 A tomo Natan,
zarap mɛ,
wɔ na Davit.
Jeng de a pom na yɛ,
a hwo yang ɛ,
“Bemat behak beba ba sé e ji repomo rehak,
gwining a sé darwey,
ko hwak a sé pwɛng.
2 Darwey wane a vɔk yas pyak,
berɔndɔng tanga vyēl tyimit.
3 Ko pwɛng wane a vɔk pyɛ cak wɛt sɛ̌ keshěp tyimit kining zɔng de á kana sey.
A gyeng kɛ,
ko ka ras na yɛ tanga nèy mɛ.
Ka reres pyɛ́ tanga yɛ yi e shǐ mɛ,
ka sɔrɔs nshi yi e keshi mɛ,
ko ka dyɛngɛs e ragey mɛ.
Ka vɔ̀k ke tɛ́ ɛ sede hwóng mɛ.
4 “Tuhak,
darwey wane a sɛ̀ kwɛnɛt,
ko a tik nà pat ɛ jining yi e ji tyīmit kɛ gwining yi e ji berɔndɔng,
na a yong a yɛ mɛ pyɛ́.
Ko a de wɔ̀ vo keshěp tyimit de ka sé ke pwɛng wane,
a yong a kwɛnɛt o mɛ pyɛ̂ re.”
5 Shom ya sogo a Davit sizɔng,
a yâng Natan,
“Ma sira me na Dagwi Darwey,
mwat de a ra ano,
a jam na be mɔrɔ hɛ!
6 A sé gbing-gbing a tala á pwɛng wane vyēl nyaas yaga pyɛ de a ra,
vit a di nemwishish.”
7 Ko Natan a yâng Davit,
“E hwo à mwat o!
Wok pyɛ de Dagwi Darwey,
Dagwi wo Israyɛl a ha a hwo:
‘Ma kasa hwo,
ma tɛ̀ be shushu hwo na něy,
na hwo tɛ́ o gbɔng gwɔ̀m e ra BeIsrayɛl,
ko ma to sey o yi e vwɔ̂ Saul.
8 Ma nɔng o lɔ dalɔ mo tanga beha mɛ.
Ma tɛ̀ o gbɔng gwɔ̀m e ra BeIsrayɛl tanga BeYuda arɔng.
Ka sede yane mwa ya radɛ a hwo,
ko ma yâng tɔk gwɛ̌ a hwo ɛ cak gbak.
9-10 Yaga sɛ́ de hwà kyɛ́ o nà gyeng ha hom,
na hwo ra pyɛ de ya kyɛ́ ɛ a me yey arɛt?
Hwà yong ɛ,
na BeAmɔn be mɔrɔ Uriya,
WoHiti,
ko hwà jut hwā mɛ,
a tɛ́ ɛ mwo.
Yaga ano,
bá-sinang ha rɔda gas ɛ na lɔ mō wɛt.
11 Ma sira me,
ma rɔda tɛ̀ hwak e ji nèy lɔ mō a rɔda vey na pyɛ vyes e lɔ mō.
E bayis mō,
ma rɔda jut beha mō,
ko mê nɔ̂ng mwat hwak vɛ,
yɛ a rɔda dyɛng na vɛ e tê-gwi,
bemat bé bɛrɛng.
12 Hwà ra myo e lɛrɛ,
ko ma rɔda tɛ̀ be ra yɛ e tê-gwi,
e bayîs mwa BeIsrayɛl.’ ”
13 Ko Davit a yâng Natan,
“Ma ga ra a Dagwi Darwey banɛn.”
Natan a toyo a yɛ,
a ye,
“Sede remo de hwà ga sey banɛn mō,
Dagwi Darwey a ga hala a hwo vɛ.
Hwà rɔda ku wɛt.
14 Sede remo de hwà ga byɛnɛng Dagwi Darwey yi na pyɛ́ de hwà ga ra,
ko di,
hwey de ba ga tɔ a hwo ha rɔda ku.”
15 Ko Natan a vɛ̌ tik Davit,
a kyè vɔk e lɔ mɛ.
Ba tala a Davit na pyɛ́ vyes mɛ
Dagwi Darwey a tɛ̀ hwey de hwâ Uriya a ga tɔ̀ a Davit ha royo hɛ.
16 Davit a ra won na Dagwi yaga hwey o.
A tik rê pyɛ́,
a yeles e ji duk mɛ naturuk,
ko a dyɛngɛs e vwel.
17 Bemakûk lɔ mo be sangsal e vwara mɛ,
na be tɛ̀ ɛ a sogo,
na a dyɛng e ra gwat,
ko a kyɛ́ ɛ,
a ka re pyɛ́ tanga yɛn wɛt.
18 E tuk hê taama,
hwey o ha ku.
Bemât fwôm Davit ba wok bengyip nà ha a yɛ hâ rekû hwey o,
yaga yɛn a bare,
jeng de hwey o há sè rɔngɔl ken,
bá ha na yɛ,
ko á ka tɛ̀ tong na yɛn wɛt.
E rɛ̌ de yɛn ê tɔk ha a yɛ rehâ rekû hwey o arɛt?
Gyeng rɔ̌ ê wɔ mǎ hɛ.
19 Jeng de Davit a di bemât fwom mɛ ba sé kyě ha show-shi-show na bemɛn,
a pere wɔ̀ tɔk,
hwey o ha ga ku.
A rangal hɛn,
“Hwey o ha ga ku a?”
Yɛn a yang ɛ,
“Ey,
ha ga ku.”
20 Ko Davit a vɛ̌ sogo yi e vwel,
a kus ɛ,
a mɔmɔ hɛ na něy,
a sege berugu mɛ,
a kyè vɔk e duk rê fongol,
ko a re a Dagwi Darwey fongol.
E bama mo,
a toyo vɔk e lɔ mɛ,
a rangal be nɔng ɛ pyɛ́,
ba tik a yɛ yɛ̄,
ko a re.
21 Bemât fwom mɛ ba rangal hɛ,
ba ye,
“E sɛ́ a yane de hwà ra ano ɛ?
Jeng de hwey o há rɔngɔl ken,
hwá kyɛ́ o pyɛ́,
ko hwá tosho,
ko remo de hwey o ha ga ku,
hwà ga de sogo,
hwà re pyɛ́ kē a!”
22 Ko a toyo a yɛn,
a ye,
“Jeng de hwey o há rɔngɔl ken,
ma kyɛ́ me pyɛ́ ma tosho.
Ma bare,
wa a tɔk ɛ?
Gyeng Dagwi Darwey ê tosho reyɔm hom,
na a tik hwey o ken!
23 Ko remo de ha ga ku,
yaga sɛ́ de mê kyɛ́ me pyɛ́ ɛ?
Mê tɔk toyo na hɛ ken a?
E me,
mê ba wɔ̀ sɛ̀ hɛ,
ko e hɛ de hê to toyo ba sɛ̀ me wɛt.”
24 E bama mo,
Davit a wɔrɔk hwā mɛ Batsheba,
a dyɛng na yɛ,
ko a tɔ hwey wen.
A vo a hɛ rezâ Sɔlɔmɔn.
Dagwi Darwey a tɛ̀ yey na yɛ,
25 ko a tomo Natan,
zarap mɛ na yɛ,
na a wɔ̀ ha a Davit,
na a vo a hɛ rezâ Yɛdidya wɔgɔ,
womo de Dagwi Darwey a tɛ̀ yey na yɛ.
Davit a re Raba na como
26 E ji jeng yane,
Yowap a tó como na Raba wo BeAmɔn,
ko a re bak repomo mo de gbɔng gwɔ̀m a sangal ɛ.
27 A hwo tomo betom vɔk na Davit wɔgɔ,
a ga tó como na repomô Raba,
ko a ga wɔ̀ vo kwɔ̂n lwêl nshi mɛn.
28 Tik na Davit a tula bwâng bemât como mwa,
a wɔ̀ rɔnɔ mɛ repomo mo,
na a re rɛ.
Ka ano wɛt,
ko yɛ Yowap ê re rɛ,
ko bê yila rɛ na reza mɛ.
29 Ano kwong,
Davit a tula bwâng bemât como mwa,
a kyè mɛ,
a wɔ̀ tó mɛ como e Raba,
ko a re repomo mo.
30 A jut kpin negwɔm yi e ratô dagwi pyɛ sekwit mɛn Milkɔm.
Nedirik kpin o na wul kilo kuru batat na vɛ betungun (35) vê dyam shinang,
ko ba tɔrɔ wɛ na gwodyengere gworwat,
ko ba tɛ̀ gwɛ e rato Davit.
A to hashe pyɛ̂ jugu pyak sizɔng yi e repomo mo.
31 A paa bemat de ba sé e hwomo,
a tɛ̀ ɛn be ra fwom sesam gwô yɛ̂t cɔ́gɔt na bewal yìn,
kɛ dâk pyɛ́ na begele dyam,
kɛ tow pyɛ́ na tyém,
kɛ yông bagat bwos lɔk.
Davit a ra ano e mwa bapomo BeAmɔn.
E bama mo,
yɛ tanga mwa bemât como mɛ ba toyo vɔk e Yɛrusalɛm.