Nɔrɔ̂ pyɛ́ de ya tanga vel
26
Mose a yâng BeIsrayɛl,
a ye:
“E bama de yin a ga sey ɛ sevwel de Dagwi Darwey,
Dagwi min a sé nɔng in na yin sangal ɛ,
2 kawɛ e ji min a rɔda tɛ̀ pyɛ́ de ya tānga vel yê kayɛ pyɛ de a yɛt bwal o e ji shap,
ko a kyè mɛ vɔk e kwɔn de Dagwi Darwey,
Dagwi min ê kasa na be re a yɛ fongol.
3 A rɔda wɔ na piris de a ra fwom e jeng o,
a yang ɛ,
‘Yunung,
ma sé ha e nuyel Dagwi Darwey,
Dagwi mō,
ma ga yel e sevwel de a kana sira a beda mot na a nɔng ot.’
4 “Piris o a rɔda sey shap o yi na yɛ,
ko ê tik yɛ e nuyêl gàgbang rangâs yas vɔk na Dagwi Darwey,
Dagwi min.
5 Ano,
mwat de a vey na shap o a rɔda ha e nuyêl Dagwi Darwey,
Dagwi min a ye,
‘Dâ beda hom á sè WoAram de á kyě kyè,
ko á jut belɔ mɛ a wɔ̀ sangal mɛ e Misra.
Yɛn á sè bemat tyɔng zɔng,
jeng de yɛn á kyè vɔk e hwomo,
ko yɛn á wɔ̀ tɛ́ ɛn yere ryey,
ye gap arɔng.
6 Ko BeMisra bá midra hot tyɔng wɛt,
ko bá tɛ̀ ot wot a ra fwom pwep.
7 E bama mo,
wot á tosho a hwo à Dagwi Darwey,
Dagwi wo bedabeda mot,
na hwo sɛlɛ hot.
Hwà wok ot,
ko hwà di yerê neves de ba ra a wot,
na negbang de wot á sɔ,
tanga begwong de bá tak a wot.
8 Hwà nusu na wot yi e Misra na gbɔng reto mō na gap mō arɔng.
Hwà ra pyɛ̂ langat na pyɛ̂ bes,
ko hwà tɛ̀ pyɛ́ vyes detidetu ye té.
9 Hwà vey na wot e ngamo,
hwà nɔng ot vwel de ha siri,
ko he nɔngɔs pyɛ́ shɛrɛk.
10 A remo,
ma vey na pyɛ́ de ya tānga vel e hiri de hwo à Dagwi Darwey hwà nɔng me.’
“Ano kwong,
mwat o a rɔda tik shap o e nuyêl gàgbang rangâs yas o,
na a re a Dagwi Darwey fongol e hwomo.
11 Ko a rɔda vɔk yey pyɛng na mwa pyɛ́ ryat de Dagwi Darwey,
Dagwi min a ga nɔng ɛ na belɔ mɛ.
Ko tik in BeLevi na bemât yére dyuk de ba sé sangal na yin be ra nzem o tanga yin.”
Pyɔlɔ̂ shey hê netat
12 Mose a re nuyel,
a ye:
“E kahɛ shey hê netat,
nɔng in pyɔlɔ,
yɛ a pyɛ jining e ji pyɛ́ kuru yê pyɛ̂ hiri min.
Yin ê nɔ̂ng BeLevi,
na bemât yére dyuk,
na nehyɛn tanga bekuma pyɛ́ mo,
yaga na yɛn a bin sɛ̀ pyɛ́ de yɛn ê re e bapomo min.
Jeng de yin a ga ra ano,
13 ko yin yâng Dagwi Darwey,
‘Vit a pyɛ de ya sé myo de ya tɛ́t ɛ e lɔ hom.
Ma ga nɔ̂ng BeLevi,
na bemât yére dyuk,
na nehyɛn tanga bekuma yɛ tyɛng na pyɛ de hwà nɔng nu na me ra.
Ma ga tik nà gyeng kɛ ma ye bam a redu mō rehak e ra rehâ pyɔlɔ wɛt.
14 Ma ga re pyɛ́ mō cak e jeng de má sè sesin wɛt.
Jeng de má sè ligis,
ma ra yɛ wɛt,
ko ma nára cak nɔrɔ vɔk na mwat de a ga ku wɛt.
À Dagwi Darwey,
ma ga gyeng ha mo myak.
Ma ga ra kayɛ pyɛ de hwà nɔng nu e ra yɛ.
15 Bɛrɛng hot yi e kwɔ̂n jɛrɛ mō e lagwi,
na hwo tɛ̀ nerat e ra wot,
bemat mō BeIsrayɛl.
Tɛ̀ nerat e ra vwel de hwà nɔng ot,
hemo de ha siri,
ko he nɔngɔs pyɛ́ shɛrɛk,
sede remo de hwà kana sira a bedabeda mot.’ ”
BeIsrayɛl ba sé bemât Dagwi Darwey
16 Mose a re nuyel,
a ye:
“Yunung,
Dagwi Darwey,
Dagwi min a ga nɔng in nu,
na yin gyeng badu mɛ mwa.
Gyeng in vɛ na yey min mwa,
na simo min mwa.
17 Yunung,
yin a ga ha wɛshɛrɛk,
Dagwi Darwey a sé Dagwi min,
ko yin a ga sira,
na yin a raa ha mɛ,
yin gyeng badu mɛ mwa,
na yin ra kayɛ pyɛ de a nɔng in nu e ra yɛ.
18 Ko yunung,
Dagwi Darwey a ga ha wɛshɛrɛk,
yin a se bemat vê yey mɛ,
sede remo de a sira a yin,
ko a nɔng in nu,
na yin a gyeng badu mɛ mwa.
19 Yɛ Dagwi Darwey a yong mwa yére bemât jey,
ko a rɔda tɛ̀,
yin vɔk reza de ra dal rê bwang o mwa.
Bê somo hin,
bê nɔng in nerey de na dal mwa.
Yin ê se vê Dagwi Darwey,
Dagwi min yɛ nju mɛ,
tyɛng sede remo de a ga sira hɛ.”