Banɛn bahak tanga nenɔrɔ̂ fûng vɛ
5
Be simo na mwat a nára nɔrɔ̂ fûng banɛn,
ka sede a ra pyɛ cak e ji pyɛ́ yemo ngan:
Ka sede ba yila mwat na a wɔ̀ nɔng nuha e duk shɔt,
ko a kyɛ́ ɛ nà wɔ̀ ha pyɛ de a di kɛ a wok e ra yɛ,
a ga ra renɛn à rane,
ko ba rɔda kaba hɛ na rɛ.
2 Kɛ mwat a ra pyɛ́ cak de ya sé ligis — kɛ gyeng a ra revîn ngyama kɛ rê yas kɛ rê pyɛ gabaga,
mwa ano de yɛ a tɔk wɛt,
a ga tɛ́ ɛ ligis,
ko buru hane mo ha sé e ra to mɛ.
3 Kɛ mwat a ra pyɛ cak ye kayɛ yerê pyɛ ye mwasi de ya sé ligis,
mwa ano de yɛ a tɔk wɛt,
ko bama de a tɔk pyɛ de a ra,
buru hane mo ha sé e ra to mɛ.
4 Kɛ gyɛng rɔ̌ mwat a pere sira e ra kayiyɛ pyɛ de be tɔk sira e ra yɛ,
kɛ pyɛ cak ryat kɛ vyes o ow,
sana bare hywɛ,
ko bama de a tɔk pyɛ de a ra,
buru hane ha sé e ra to mɛ.
5 Ka sede mwat hwak a ga di buru mɛ e ra kayɛ pyɛ e ji pyɛ́ yemo,
a rɔda kulu renɛn o.
6 Ko tik na a vey na shep vyel pyɛng kɛ shi mo yaga talâ renɛn o,
na a nára a Dagwi Darwey yɛ.
Ko piris a rɔda ra pyɛ de ya dura talâ-nɛn yaga yɛ.
7 Ko ka sede mwat o a tɔk vey na vyel wɛt,
ê tɔk vey na bewǔtut beba kɛ bebôt wunung beba vɔk na Dagwi Darwey yaga talâ renɛn de a ga ra.
Bê nára gwining yaga renɛn o,
ko gwining o,
yaga nɔrɔ̂ pyɛ rangas burang.
8 Mwat o a rɔda wɔ na vɛ na piris de ê tanga nára gwining yaga nɔrɔ̂ fûng banɛn.
A rɔda tsipta fwɔ gwɛ,
ko de a pat to mo wɛt.
9 A rɔda zagat nemi mo nehak e ra hagât gàgbang rangâs yas,
ko a piri bwang nemi mo e retîs hɛ.
Hemo ha sé nɔrɔ yaga fûng banɛn.
10 Ko gwonon o gwo neba,
a rɔda nára gwɛ nɔrɔ̂ pyɛ rangas burang e ra badu de ba nɔng.
Ko piris a rɔda ra pyɛ de ya dura talâ-nɛn yaga renɛn de mwat o a ga ra,
ko Dagwi a rɔda hala a yɛ rɛ.
11 Ko ka sede yɛ mwat o a tɔk vey na bewǔtut beba kɛ bebôt wunung beba mo wɛt,
ko tik na a vey na shǐ masa hê nemuk alkama nerat yaga nɔrɔ̂ halâ renɛn mɛ mo.
A kwon tɛ̀ něy kɛ pyɛ̂ nesang hyɔɔlɔl e ra nɛ wɛt,
yaga na sé nɔrɔ̂ fûng banɛn.
12 A rɔda wɔ na nemuk o na piris,
ko yɛ piris o a rɔda vɛ nɛ pyak e vwɔ e tô mwa nɔrɔ de ha sé hê Dagwi Darwey,
ko a wɔ̀ rangas nɛ̀ e ra gàgbang rangâs yas tanga bwang nenɔrɔ̂ pyɛ̂ re de be nása vɔk na Dagwi Darwey.
Hemo ha sé nɔrɔ yaga fûng banɛn.
13 Ko piris a rɔda ra pyɛ de ya dura talâ-nɛn yaga yɛ,
ko Dagwi a rɔda hala a yɛ vɛ.
Bwang nemuk nɔrɔ mo nê tɛ́ ɛn ne piris o,
tyɛng sede remo de be ra e nɔrɔ̂ nemuk.
Nenɔrɔ talâ banɛn
14 Dagwi Darwey a to ha a Mose badu vemo ngan:
15 Ka sede mwat hwak a nɔ̂ng Dagwi Darwey dyām kɛ pyɛ́ de ya sé myɛ wɛt,
ko a ga ra renɛn,
mwa ano de a tɔk,
a ra renɛn wɛt,
ko tik na a vey a Dagwi Darwey na turuk de wa vɔk rām kɛ pyɛ cak vyes wɛt,
na a tala mɛ renɛn rane mo.
Ba rɔda sege wɛ na dyam pyɛng tyɛng na masâ dyâm bûk sangal Dagwi.
Wa rɔda sè wo nɔrɔ yaga talâ banɛn.
16 Ko a rɔda gwɛ̌ dyām kɛ pyɛ́ yane de a ra renɛn e ra yɛ mo,
ko a to gwɛ̌ zang hining e ji zang tungun hê dyâm pyɛ mo.
A rɔda nɔ̂ng piris mwa pyɛ́ mo.
E bama de piris o a ra pyɛ de ya dura talâ banɛn yaga mwat o,
ko Dagwi a rɔda hala a yɛ renɛn mɛ.
17 Ka sede mwat hwak a ra renɛn sana tɔk,
a ra pyɛ de Dagwi Darwey a yâng yɛ kyiri,
mwa ano de a ra rɛ sana tɔk,
ko a ga ra renɛn à rane,
ko ba rɔda kaba hɛ na rɛ.
18 Tik na a pat turuk de wa vɔk rām kɛ pyɛ cak vyes wɛt,
kɛ a vey na dyam pyɛng de ya sé tyɛng na dyâm wɛ,
ko a wɔ̀ nɔ̂ng piris yaga nɔrɔ̂ talâ-nɛn.
Ko piris o a rɔda ra pyɛ de ya dura talâ banɛn de mwat o a ra sana tɔk mɛ,
ko Dagwi a rɔda hala a yɛ renɛn o.
19 Hane ha sé nɔrɔ̂ talâ banɛn yaga renɛn de a ra a Dagwi Darwey.