A Bakovi ala Rua Ru Vakalongo a Ngava
11
*Muri ni habi nau a lebo ne vona ni rovai a maki,
i manga a kodo na nilaho,
lakea i taki maea iau,
“O vano o rovai a niolana,
a nibolana roho na Vure turana dede na nihabi.
O gi palupu e huriki ri vasileki vonga.
2 *Pali naha ni rovai a mataruma,
polovavo na Roho na Vure.
Naha ni rovai,
a vuhuna a tabeke iea ni habi ne huriki i uka ma ria a Iuda,
ri gi paha katoa a tanga na Vurea na keva i ravulu va a polona i rua.
3 *Ga rudu a bakovi ala rua nau,
ru gu taki tala ne huriki a ngava nau.
Ru gu rea na varakia katokato,
ru gu rata a nita propet na parava i 1,260.”b
4 *A bakovi ala rua nga,
rua a kai a oliv i rua,
a butu na nipara i rua,
ra ri pesi na matana Vure,
re Bakovi Dagi na tanga lobo na malala.
5 *E rei a viri i ngaru ni rata hale rua,
a kanono bara i pagitala na ngavane rua,
bara i gutu parina e huriki a pile ne rua.
E huriki ri ngaru ni rata hale rua bara ri mate vona a naro iea.
6 *Ru tahoka a nitora ni tukaria a hunu,
i uka ma ge boru a vala na parava lobo ru rata a nita propet.
Ru tahoka a nitora ni rata a maka naru ri gi mapulo manga a dara.
Ru tahoka a nitora ni ratapile a malala na vuranga legelege,
na ningaru ne rua.
7 *Na tahuna ru vakalobo a leho ne rua ni ta propet,
e Livoa bara i sike valai na lovo i marangeo,
bara i vaubi turane rua.
Bara i mulangi,
i rabalaki rua,
8 *lakea a podane rua ru gu tabuli na rosi na tanga dagi,
ra ni ta vakakika vona e Sodoma,
e Egipto,
na tanga ni paditata na kai tavalavala a Bakovi Dagi ne rua.
9 E huriki a bakovi a ngatavine na kuli lobo,
na kabu lobo,
na tabele lobo,
na robo lobo na malala ri gi matanono a podane rua na parava i tolu,
a kalavana.
Ri gi hate kari,
nahea ni gi tanu rua.
10 E huriki lobo na malala ri gi vivi hateka na matenga ne rua.
Ri gi rata a habu dagi,
ri gi vahabi a maki,
a vuhuna a propet ala rua nga ru habi a nimadihi dagi ne huriki na malala,
ru mate pali.
11 *Pali muri na parava i tolu,
a kalavana,
a Vure i bango dili ne rua a bangona na nimahuri,
ru pesi rike.
Lakea e huriki lobo ri matai rua,
ri mangenge hateka.
12 *Muri ru longoa a lohona viri na hunu i ta dagi,
i taki rua,
i ta maea,
“Muru sike valai!”
Lakea ru sike na hunu turana bubu,
pali e huriki a pile ne rua ri matanono kunana.
13 *Na tahuna iea kunana a vuruke dagi i pori.
A tanga dagi ni nagi na tabeke i ravulu.
A tabekena tara,
a roho lobo ri mapuka puru.
A bakovi a ngatavine ala 7,000 ri mate na vuruke iea,
pali e huriki ri tabana ri mangenge hateka,
ri vakabagetua a rana Vure na hunu.
14 *A ruana vuranga i lobo ngane.
A toluna vuranga i popote ge valai.
A Poloruana Tavure
15 *Muri,
a poloruana agelo i vakia a tavure vona.
Lakea a longo e huriki ri ta dagi meli na hunu,
ri ta maea,
“A harikianga na malala ngane ne vona e Bakovi Dagi ne hita,
turana e Kristoc vona.
Ge matakari na parava vakaroro,
i uka nilobona.”
16 Lakea e huriki a nupesi ala ravulu rua a polona i va,
ra ri made na matana Vure na gula hariki ne ria,
ri tabuli puru na matane ria,
ri kavurikea a Vure,
17 ri ta maea,
“O Bakovi Dagi,
Vure Tuhaka Hateka,
mi kavurike ioe.
O made ngane.
O made hosi.
O vakasiri a nitora dagi vomu,
o vakatubu ni matakari.
18 *E huriki i uka ma ria a Iuda,
i madihi a hatene ria,
pali a rongova vomu i bele.
A parava i bele pali,
go pelekado e huriki ri mate pali,
go rata kamumu e huriki a vora vomu,
re huriki a propet,
e huriki a tara na Vure,
e huriki lobo ri togoa a ramu,
e huriki a bakovi tavula,
e huriki a bakovi dagi.
A parava i bele pali go ratapile e huriki ri ratapile a malala.”
19 *Muri a Roho na Vure meli na hunu,
ni tala.
A Tava na Ngava Dagi ni matai i tabuli pololilo na Roho vona.
A vila i maravila,
i kururu,
i pelaka,
a vuruke i pori,
a vala kedo dagi i boru.