E Bakovi Dagi Ge Valai
3
Mua o huriki a turagu,
a raukea iea,
a ruana raukea a here lakene mua.
A raukea varago nga,
a vakalohoka tabu mua vona a ngava mu lohoka vona pali.
A ngaru mu gu luhoi kado kamumu.
2 *A ngaru mu gu luhoi tabu a ngava ne huriki a propet hosi,
ri vakalongo muga vona a ra maki ge bele muri ma.
Mu luhoi tabu a ngava i vakuku mua vona a Bakovi Dagi ne hita,
a Viri i korimule hita.
Mia e huriki a apostolo mi vakalongo mua vona pali.
3 *A ngava iea i maea:
Muga na nilobona parava,
a ngava e Isu Kristo ge hamule valai,
bara ni nongo vaki.
E huriki bara ri ramai kunana a ningaru hale na kakaine ria.
4 *Bara ri ta maea,
“I ta muholi,
ta ge hamule valai.
Pali vai?
Hosi e huriki a gare hosi ne hita ri mate.
I uka tara maki ge bele.
A maka maki lobo i palupulupu kunana,
i vakatubu hosi na malala ni ratarike,
i valai i harena mona.”
5 *Ri ta mavonga,
a vuhuna ri marikoi ni luhoi kamumu,
ri mata kepa vona a maki nga:
Hosi a Vure i ta kunana,
i vakabele a hunu.
I ratarike na naru a malala na kurukuruna naru.
6 *Muri a Vure i takia a naru,
i kavitagu a malala.
A maki lobo i tabuli pololilo vona ri pasiri,
ri mate.
7 I mavonga muri ma,
a nitana Vure bara i ratapile tabu a hunu a malala.
Na parava a Vure ge pelekado e huriki lobo,
bara i rungani a hunu,
a malala,
bara i ratapile e huriki ri ngalahere na Vure.
8 *Mua e huriki a turagu,
naha ni longo kaburungi a ngava iea:
Na matane Bakovi Dagi,
a parava i taku i manga a pida i 1,000.
Pali a pida i 1,000 i manga a parava i taku kunana.
9 *E huriki ranga ri takia a Vure,
ta i leho kemi kemi hateka ni rata a maki i ta muholi vona ge ratea.
Pali i uka ma i mavonga.
Ia a mari ni hatenono.
I marikoi vona tara viri ge velu.
I ngaru e huriki lobo ri gi pulo a vilone ria.
A Malala a Hunu Bara Ru Lobo
10 *A Parava ne Bakovi Dagi bara i bele vakaturutu kunana,
i manga a bakovi ni panaho.
Na parava iea a hunu bara i tangi pahumu dagi,
i marakavelu.
A maka maki na hunu,
a Vure bara i gutu parina ria na kanono,
ri gi lobo liu.
I mavonga,
a naro lobo ni rata koea na malala ri gi bele kavakava.
11 Mu luhoi kamumu.
A Vure ge ratapile a maki lobo na naro iea.
I mavonga,
i vai a naro kamumu mu gu ratea?
Mu laho na naro malamala,
a naro na Vure.
12 Mu pasimata vona a Parava na Vure ge valai,
mu toni ni ratea ge bele malaviriri.
Na Parava iea,
a hunu bara i nono,
i lobo liu.
A maki lobo na hunu bara ri gutu hateka,
ri bele manga a naru.
13 *Pali hita,
i ta muholi ne hita ge ratarike a hunu a malala karaba,
e huriki a bakovi a ngatavine malamala kunana bara ri made vonga.
A Nilobona Ngava
14 I mavonga,
mua e huriki a turagu,
mu toni a bulune mua ni laho malamala,
ge uka ranga naro hale mu gu rata,
lakea bara mu made na nivalemu.
Muri ma,
na tahuna a Parava iea ge valai,
ra mu davea,
e Bakovi Dagi bara i matai mua mu laho kamumu.
15 *Mu luhoia:
ra hini a Bakovi Dagi a mari ni hatenono,
i rata mavonga,
a vuhuna i ngaru ni korimule hita.
E turane hita,
e Paulus,
ia tara i here mavonga,
a vuhuna a Vure i habi a lohokanga vona.
16 A raukea lobo ne Paulus,
i here,
i ta mavonga.
A ngava ranga vona i gutu popote ni longokilala a pelegona.
E huriki ri uka a lohokanga ri pulo lae a ngavana,
lakea a Vure i habi a nimadihi ne ria.
I uka ma ri rata mavonga na ngava ne Paulus kunana.
Ri rata mavonga tabu na Hinere ranga.
17 *Mua e huriki a turagu,
mu lohoka vona pali a narone ria.
Mu matadoko ne huriki a bakovi ri longotaro a vinara na Vure.
Ma ri gi tami mua,
mu gu loho rua.
18 Mu koru rike na naro kamumu ne Isu Kristo,
a Bakovi Dagi ne hita,
a Viri i korimule hita.
Mu koru rike na lohokanga vona.
Si gi kavurikea a rana mona,
na parava vakaroro.
I muholi.