A herea a raukea iea i lakene ne mua e huriki a bakovi a ngatavine a Vure i rata mua mu luhoi torea e Kristo,

i manga mia.

Si luhoi torea e Isu Kristo,

ra viri i korimule hita,

ia a Vure,

i malamala liu.

2 A Vure ge rata kamumu vakaroro mua,

ge habi vakaroro a nivalemu ne mua,

a vuhuna mu lohoka kamumu na Vure,

rua e Isu a Bakovi Dagi ne hita.

3 Ia a Vure.

Na nitora vona,

i habi pali ne hita a maka maki ge vakatora a nimade ne hita,

ge tuhori hita na ni laho mala­mala.

I habi ne hita a maka maki nga,

a vuhuna si lohoka vona a Vure i gale hita si gi tahoka a bagetua manga ia,

si gi malamala liu manga ia.

4 Na naro iea,

i ta muholi ne hita ge kori hita na naro kamumu legelege,

si gi ha taro a naro hale na ningaru hale na malala,

si gi malamala manga ia.

5 I mavonga,

a niluhoi ne mua,

mu toni a bulune mua ni vakatorea na naro kiripiripi.

A naro kiripiripi,

mu vakatorea na lohokanga.

6 ^*A lohokanga,

mu vakatorea na naro ni pahadanu a ningaru hale na kakaine mua.

A naro iea,

mu vakatorea na naro na ni hatenono na maregoa.

A naro iea,

mu vakatorea ni rata a naro na Vure.

7 A naro na Vure mu rata,

mu vakatorea na naro ni ngaru e huriki a tara na Vure.

A naro iea,

mu vakatorea na naro na ni vangaru.

8 Na tahuna mu ramai vakaroro a naro nga,

a leho na Vure mu ratea bara i tahoka a kanena.

A hini mu lohoka vona e Isu Kristo,

a Bakovi Dagi ne hita,

ia tara bara i tahoka a kanena.

9 Pali e rei a viri i uka ma i ramai a naro nga,

i kepa vona a hini a Vure i puga vuroki pali a naro hale lobo vona.

10 I mavonga,

mua e huriki a turagu,

a narone mua ri gi vakasiri manga a Vure i gale mua,

i vulaki mua.

Bara mu ramai a maka naro kamumu nga,

i uka ma mu gu boru.

11 Mu ramai a maka naro nga,

muri a Vure bara i vivi hateka ni tagui mua na tahuna mu dili na harikianga ne Isu Kristo,

a Bakovi Dagi ne hita,

a Viri i Korimule hita.

A harikianga vona i uka nilobona.

12 I muholi,

mu lohoka vona pali a maka maki nga.

Mu bolea pali a ngava muholi,

mu pesi tora vona.

Pali a koi mu gu longokaburungi,

lakea a ngaru ni vakalohoka mua tabu vona.

13 Na tahuna iau a tabana ni mahuri,

a luhoi i kamumu ga taki mua tabu.

Ga vakarike a hatene mua,

mu gu luhoi tabu a maka maki nga,

14 ^*a vuhuna a lohoka vona pali,

i popote bara mate.

E Bakovi Dagi ne hita,

e Isu Kristo i taki iau pali.

15 I mavonga,

ga vakalohoka bala mua.

Muri ma,

na tahuna a mate pali,

bara mu luhoi mule vakaroro a ngavagu.

16 ^*Hosi,

mi vakalongo mua vona e Isu Kristo,

a Bakovi Dagi ne hita,

ge hamule valai na nitora.

A ngava mi vakalongo mua vona,

i uka ma a nuverei tavula mi rata kunana na lohokanga ne mia.

A nitora dagi ne Isu,

mi masia na matane mia,

mi vakalongo mua vona.

17-18 ^*Hosi,

mete made turane Isu na lolo na Vure,

mi longoa a Vure,

e Tamane hita,

i ta valai na hunu,

i vakabagetua,

i kavurikea a rane Isu,

i ta maea,

“A Bakovi iea e Tugu,

a hategu.

A vivi hateka vona.”

19 A ngavane huriki a propet hosi,

ri ta virihi mai e Isu vona,

i muholi hateka.

I kamumu mu gu longo kamumu.

A ngavane ria i manga a kanono i para na uvo,

i vakasiri a dala.

Mu loho doko vona,

ge vano ge harena na tahuna a nipara ne Kristo ge parai a hatene mua,

i manga a hini i malaharere,

i rike a hada e Lagavago.

20 A maki dagi mu gu lohoka vona i maea:

a pelegona nita propet na Hinere i uka ma i tavore na lohokanga na viri,

21 ^*a vuhuna a nita propet i uka ma i luve na ningaru na bakovi.

A Vure i ta polo ne ria na tahuna a Hanu Kiripiripi i habi a niluhoi ne ria.