A here lakene mua e huriki a Vure i vulaki mua,

mu made manga mosi na provins e Pontus,

e Galesia,

e Kapadosia,

e Asia,

e Bitinia.

2 ^*A Vure,

e Tamane Hita,

i lohoka muga pali ge vulaki mua.

A Hanuna Vure i vulaki mua,

ge mua ne vona kunana,

mu gu longototo e Isu Kristo,

a darana ge vahilolo mua,

mu gu malamala.

A Vure ge rata kamumu mua,

ge habi ne mua a nivalemu,

ge uka harena.

3 Si gi kavurikea a Vure,

e Tamane Isu Kristo,

a Bakovi Dagi ne hita!

I dodo hateka hita,

lakea i habi ne hita a nimahuri karaba.

Ngane si pasimata muholi,

a vuhuna e Isu Kristo i mahuri mule na matenga.

4 ^*Si pasimata vona a maki ni kado puru ne hita meli na hunu.

A maki nga,

ri gi tabuli vakaroro.

I uka ma ri gi hale,

i uka ma ri gi lobo.

5 ^*Mu luhoi torea pali e Kristo,

lakea a nitora na Vure i matakari mua.

Ge matakari mua ge vano ge harena na nilobona parava na tahuna ge vakasiri kavakava ne huriki a naro i korimule mua vona.

6 ^*I mavonga,

mu vivi hateka.

Pali i muholi,

ngane bara mu bole a nimadihi na nitoni legelege na parava popote kunana.

7 ^*Mu gu bole taro a nimadihi na nitoni legelege,

ge vakasiri mu luhoi tora muholi.

A gol a maki i uka ma ge tabuli vakaroro.

Pali ia tara,

ni toni na kanono.

I mavonga,

a niluhoi ne mua,

ra i dagi hateka na gol,

ni gi toni taro,

ge tabuli tabaka.

Na tahuna mu bole a nitoni,

pali mu pesi tata ni luhoi tora,

bara ni kavurike mua,

bara ni vakabagetu mua,

bara ni togo mua na tahuna e Isu Kristo i bele kavakava.

8 ^*I uka ma mu masia hosi,

pali mu ngaru hatekea.

I uka ma mu masia ngane,

pali mu luhoi tora ia,

mu vivi hateka.

A nivivi ne mua i rangi a nivivi lobo na malala,

i uka ngava ge tuvevea a nivivi ne mua,

9 a vuhuna a mapane mua mu luhoi torea e Kristo,

bara i korimule mua.

10 ^*E huriki a propet ri ta muga vona a naro a Vure ta ge rata kamumu mua vona.

Ri ngaru hateka ni lohoka vona a Vure ge korimule navai hita.

11 ^*A Hanune Kristo i leho pololilo ne ria,

ri ta muga na nimadihi ta ge bolea e Kristo,

a bagetuanga ta ge bolea muri,

lakea ri ngaru ni lohoka vona ia e rei,

pali garika ge valai?

12 Ni vakalongo ria vona a nita propet ri rata i uka ma ne vona ni korimule ria.

A nita propet ri ratea ne vona ni kori mua.

A nita propet ne ria i bele muholi na ngava ni vakalongo ne mua pali,

na tahuna e huriki ri vara ne mua a Velenga Kamumu na nitora na Hanu Kiripiripi,

ra i valai na hunu.

E huriki a agelo ranga,

ri ngaru ni lohoka vona a ngava nga.

13 I mavonga,

mu luhoi kamumu,

mu matakari a nilaho ne mua.

Mu pasimata vona a naro kamumu a Vure ge rata virihi mua vona na tahuna e Isu Kristo ge hamule valai,

ge bele kavakava ne huriki lobo.

14 ^*Naha ni longototo a ningaru hosi na kakaine mua,

ra mu ramai hosi na tahuna i uka ma mu lohoka,

a vuhuna ngane mua e huriki a tuna Vure,

mu longototoa.

15 A Viri i gale mua i malamala.

I mavonga,

mua ranga,

mu laho malamala na maki lobo mu rata,

16 ^*a vuhuna ni here hosi i maea,

“Mu ramai a naro ge kiripiripi,

a vuhuna iau a kiripiripi.”

17 ^*A Viri mu vasileki vona,

e Tamane hita,

i pelekado e huriki lobo na naro i taku kunana,

i pelekado ria i ramai a narone ria.

I mavonga,

mu mangenge na Vure,

mu laho kamumu manga a mosi koea na malala.

18 A Vure i konamule mua na maka naro tavulavula mu bole ne huriki a gare ne mua.

I uka ma i konamule mua na mahala ge lobo,

manga a silva o a gol.

19 ^*I konamule mua na mapana i dagi hateka,

ra darane Kristo.

I manga a darana tuna sipsip gavutuvutu.

20 ^*A Vure i vulaki mugea na malala ni ratarike.

Pali i bele kavakava ne mua ngane,

na nilobona parava.

21 ^*I rata mua mu luhoi torea a Vure.

Mu luhoi tora ia,

mu lohoka vona ge korimule mua,

a vuhuna i vakamahuri mulea na matenga e Kristo,

i vakabagetua.

22 ^*Naha ni tamilalu.

Mu vangaru muholi na naro kiripiripi,

i manga mua a maki tari,

a vuhuna mu longo pali a ngava muholi,

i rata a hanune mua i malamala pali.

23 Mu vangaru a vuhuna mu bole pali a nimahuri karaba.

A nimahuri karaba iea i uka ma ge lobo.

Bara i tabuli vakaroro.

I valai na nita mahuri na Vure.

A nita iea bara i tabuli vakaroro.

24 ^*I manga a ngava ni here na Hinere,

i maea,