3 ^*Hita,

si luhoi torea a Vure i ta kunana,

i vakabele a maki lobo.

A maki lobo si matai,

a Vure i ratarike na maki i uka ma si matai.

4 ^*Hosi e Abel i luhoi torea a Vure,

i habi a nihabi vona.

A nihabi ne Abel i rangia a nihabi ne tukana,

e Kain,

lakea a Vure i bolea a nihabi ne Abel,

i galea a bakovi kamumu.

I muholi,

e Abel i mate pali.

Pali a naro i rata hosi i tabana ni tovo hita vona a naro na niluhoi torea a Vure.

5 ^*E Enok i luhoi torea a Vure,

lakea a Vure i bole sikea na hunu.

I uka ma i mate.

A podana i uka ma ni matavisi,

a vuhuna a Vure i bole sikea na hunu.

Muga na Vure i bole sikea,

i taki ia a bakovi kamumu,

i vivi vona.

6 E rei a viri i uka ma i luhoi torea a Vure,

a Vure i uka ma i vivi vona.

E rei a viri i ngaru ni lakea tabukoi na Vure,

ge lohoka vona a Vure i made,

ge luhoia a Vure ra viri i rata kamumu e huriki ri matakanea.

7 ^*Hosi e Noa i luhoi torea a Vure.

Lakea a Vure i taki mugea e Noa,

i vakalongoa na maka maki hale ri gi bele muri ma.

E Noa i mangenge na Vure,

i haea a aga rungu,

ge korimule na vuranga e huriki a kabu vona.

E Noa i rata mavonga,

a maka naro hale ne huriki lobo na malala ri bele kavakava.

A Vure i gale ia a bakovi malamala,

a vuhuna i luhoi torea a Vure.

8 ^*Hosi e Abraham i luhoi torea a Vure,

i longototoa na tahuna a Vure i takia ge pe a tanga vona,

ge lakea na tanga i ngaru ni habia vona,

ge a malala vona.

E Abraham i malaga na tanga vona,

i havai.

I uka ma i lohoka vona a tabeke ge lakea vona.

9 ^*I luhoi torea a Vure,

i vano kunana,

i made kunana na kape,

i manga a mosi na malala a Vure i ta muholi vona ge habia vona.

E tuna,

e Isak,

e tubuna e Iakop,

rua ranga ru made vonga na kape,

ru dava ni bole a malala,

ra a Vure i ta muholi ge habi ne tou.

10 E Abraham i luhoi torea a Vure,

i davea a parava ge masia a tanga dagi,

ra tanga i tahoka a vuhuna.

Ra tanga iea,

a Vure kunana i luhoi kadoa,

i kisi purua.

11 ^*Hosi e Sara i gare liu,

i keri ni vakabele a koma.

Pali i luhoi torea a Vure,

lakea a Vure i vakatorea a kakaina,

i singou.

A Vure i tuhoria,

a vuhuna e Sara i lohoka vona,

a Vure a viri i rata a maki i taki ge rata.

12 ^*Na naro iea,

e Abraham i tahoka e huriki a hamona ala kupo hateka.

Re Abraham,

i gare liu pali,

i ngalai a matenga.

Pali ngane e huriki a hamona ri ala kupo hateka,

i manga a maka hada na hunu,

a hire na lavu.

Ni keri ni gi.

13 ^*Re huriki a bakovi a ngatavine nga,

i uka ma ri bole ma a maki a Vure i ta muholi vona ri gi bole.

Pali ri vivi kunana ni lohoka vona a maki nga bara ri bele muri ma.

I uka ma ri bole a maki nga,

pali na tahuna ri mate,

ri tabana ni luhoi torea a Vure.

Ri lohoka vona,

ri made manga a mosi kunana koea na malala.

14 Si lohoka vona,

ri matakanea a malala,

ga tanga muholi ne ria,

e huriki ri taki ri made manga a mosi kunana koea na malala.

15 Bara ri luhoi kunana a tanga ri pea ri valai,

bara ri hamule lakea tabu vona.

16 Pali i uka ma ri dodoa a tanga muga ne ria.

Ri ngaru ni bele na tanga tara,

ra i rangi a tanga lobo na malala.

Ri ngaru ni bele na tanga na hunu.

I mavonga,

a Vure i uka ma i maruhu ne ria.

I vivi vona a hini ri gale ia a Vure ne ria.

I kisi puru pali a tanga dagi ne ria.

17-18 ^*Hosi e Abraham i luhoi torea a Vure.

A Vure i tonia,

i takia ge habia e tuna,

e Isak,

ge manga a nihabi na Vure.

I muholi,

a Vure i ta muholi muga ne Abraham,

i ta maea,

“E huriki e tune Isak kunana bara ni gale e huriki a hamomu.”

Pali e Abraham i longototo kunana,

i vakatubu ni habi na Vure e Isak,

ge manga a nihabi ni gutu vuro.

19 ^*E Abraham i lohoka vona a Vure,

i kara ni vakamahuri mule e huriki ri mate pali.

I muholi hateka,

bara si takia ngane e Abraham,

i manga i bole mulea na matenga e tuna.

20 ^*Hosi e Isak i luhoi torea a Vure.

I gamai e tuna ala rua,

e Iakop,

e Esau,

i vakalongo muga ne rua a ra maka maki ge bele ne rua muri ma.

21 ^*Hosi e Iakop i luhoi torea a Vure.

Na tahuna i popote ge mate,

i gamai e tune Iosep ala rua,

i doga rike na kodo vona,

i kavurikea a Vure.

22 ^*E Iosep i luhoi torea a Vure.

Na tahuna i popote ge mate,

i vakalongo muga ne huriki a Israel bara ri ha taroa e Egipto.

I taki ria ri gi bole turane ria a tuhana,

na tahuna ri vano.

23 ^*Hosi e tamane kinane Moses ru luhoi torea a Vure.

A hariki ne huriki a Egipto i taki ni gi vakapasiri e huriki e tune Israel a bakovi ri gi mate.

Pali na tahuna e Moses ni poda,

i uka ma ru mangenge ni putu puru a ngava na hariki.

Ru ruhuloloa e Moses na keva i tolu,

a vuhuna ru masia i mata kamumu hateka.

24 E Moses i luhoi torea a Vure.

Na tahuna i koru rike pali,

i marikoi ni gi gale ge ia e tubune Parao.

25 I marikoi ni pitei na naro hale,

a vuhuna a nipitei iea i tabuli popote kunana.

I ngaru ni bole taro a maregoa turane huriki a tara na Vure.

26 E Moses i luhoi maea,

i kamumu e huriki ri gi biu ia,

a vuhuna i luhoi torea e Kristo.

Pali bara i hale i uka ma ge luhoi tora,

pali ge bole a mahala i kupo o Egipto.

27 E Moses i luhoi torea a Vure,

i ha taroa e Egipto.

I uka ma i mangenge na hariki o Egipto,

a vuhuna i masia a Vure,

ra Viri i uka tara viri ge masia.

28 ^*E Moses i luhoi torea a Vure,

i longototoa a ngavana na tahuna i takia ge ramai a naro na Nipagepolo.

I rabalakia a tuna sipsip,

i kalu na logo a darana.

I rata mavonga,

a agelo na matenga ge masia,

i uka ma ge rabalaki e huriki a koma tabua ne huriki a Israel.

29 ^*E huriki a Israel ri luhoi torea a Vure,

ri laho page poloa a Dari Vururu,

ri laho langa na malala i vu pololilo na dari iea.

Na tahuna e huriki a nugumaheto o Egipto ri tonia,

ria lobo ri pasiri,

ri mate.

30 ^*E huriki a Israel ri luhoi torea a Vure,

lakea ri laho haluia na parava i polorua a nure o Ieriko.

Muri,

a nure dagi iea i mapuka puru tavula.

31 ^*A ngatavine a ngoi e Rahap i luhoi torea a Vure,

i kori a Israel ala rua,

ru kasisi a tanga vona.

Lakea,

i uka ma i vurua turane huriki ri putu puru a nitana Vure.

32 ^*Pali a ra ngava ga taki tabua?

I ola hateka ga tuverei kado tabu a narone Gidion,

e Barak,

e Samson,

e Iepta,

e Davit,

e Samuel,

e huriki a propet.

33 ^*Ria lobo ri luhoi torea a Vure,

ri mulangi na vabinga,

ri ratapile a robo i kupo.

Ri vakamadihi e huriki a bakovi,

a maka tanga ri gegea a Vure.

Ri bole a maka maki a Vure i ta muholi ge habi ne ria.

Ri nugu pupu a ngavana maka laion.

34 ^*Ri tutu mate a kanono dagi.

Ri ha,

i uka ma ri bole a vuranga na bainat ne huriki a pile.

Ri uka a nitora,

pali a Vure i vakatora ria.

Ri gao hateka na vabinga,

ri ratapile e huriki a pile.

Ri valili vona e huriki a tara dagi na pile ne ria,

ri ha.

35 ^*E huriki ri mate pali ni vakamahuri mule,

lakea e kinane ria ri bole mule ria.

E huriki ranga ni vakamadihi hateka.

A viri i vakamadihi ria i taki ria,

bara ri lohopilea a Vure,

bara ri voro taparaki ria.

Pali i uka ma ri lohopilea a Vure,

a vuhuna ri ngaru ni bole a nimahuri kamumu na Vure na tahuna i vakapesi mule ria na matenga.

36 ^*E huriki ranga ri luhoi torea a Vure,

ni harogi pile,

ni lagu,

ni kolotata na sen,

ni ru dili na bavi.

37 ^*E huriki ranga ri luhoi torea a Vure ni padimate na kedo,

ni palakudu ria bale rua na so,

ni padimate na bainat.

E huriki ranga ri luhoi torea a Vure,

ri uka varakia,

ri rea kunana na kulina sipsip,

a meme.

Ri uka ruma,

ri matasia,

ri bole a maregoa,

e huriki ri ratapile ria.

38 Ri kamumu hateka.

E huriki a bakovi a ngatavine na malala,

i uka ma i kara ria ri gi made turane huriki nga.

Ri laho lae na tabeke i ngeki,

na lolo.

Ri mahita na dupi na malala,

ri mahita na babe.

39 Re huriki lobo nga,

ri luhoi torea a Vure,

a Vure i taki ria,

ri kamumu.

Pali i uka ma ri bole a maki a Vure i ta muholi vona ge habi ne ria,

40 a vuhuna a Vure i kisi purua hosi tara maki i kamumu hateka ne vona e hita lobo.

I koi vona e huriki hosi ri gi malamala muga ne hita mona.

I ngaru si gi malamala palupu turane ria.