A Raukea Ni Here Lakea ne Huriki a
Hibru
A Tuna Vure i Rangi e Huriki a Agelo
1
Hosi a Vure i habi a ngava ne huriki a propet,
muri ri taki polo ne huriki a gare ne hita hosi.
I rata mavonga balaka kupo,
na naro legelege.
2 *Pali ngane,
na tahuna a nilobona parava i tubu,
a Vure i habi a ngava ne Tuna,
lakea e Tuna i taki polo ne hita.
Ne Tuna kunana,
a Vure i ratarike a hunu,
a malala,
a maki lobo.
A Vure i rata a maki lobo nga ge ne vona e Isu.
3 *E Tuna i vakasiri a bagetuanga na Vure.
I manga muholi a Vure.
A nitana i tahoka a nitora.
Na nitana kunana i rata a maki lobo ri tabuli tora.
I vakaloboa a leho vona ni bole a nimadhi na naro hale ne huriki,
ge rata ria ri gi malamala na matana Vure.
Muri i made na limana kanena Vure,
ra Viri Dagi na hunu,
a rana i dagi hateka,
i tahoka a nitora dagi.
4 *I rata mavonga,
i vakasiri manga i rangi liu e huriki a agelo.
I manga a rana Tuna Vure i rangi a rane huriki a agelo.
5 *Hosi a Vure i uka ma i takia tara agelo ge ta maea,
“Ioe e tugu.
Ngane Iau e Tamamu.”
O ge ta maea,
“Iau ge Iau e Tamana,
Ia ge Ia e Tugu.”
6 *Na tahuna a Vure i rudu vilia na malala e Tuna a tabua,
i ta maea,
“E huriki a agelo lobo ri gi kavurike ia.”
7 *A Vure i luhoi e huriki a agelo,
lakea i ta maea,
“A Vure i rata e huriki a agelo vona ri manga vilu.
I rata e huriki a vora vona ri manga hubena kanono.”
8 *Pali a Vure i luhoia e Tuna,
lakea i ta maea,
“Ioe,
a Vure,
go matakari vakaroro,
o matakari e huriki na naro kiripiripi.
9 O ngaru a naro kamumu.
O marikoi a naro hale.
I mavonga a Vure,
a Vure vomu,
i rata ioe o vivi,
a nivivi vomu i rangi a nivivi ne huriki e turamu.”
10 *A Vure i taki tabu e Tuna,
i ta maea,
“Ioe,
o Bakovi Dagi,
o ratarike a malala hosi na nitubuna maki lobo.
A hunu tara,
o ratarikea.
11 A malala a hunu bara ru lobo,
pali ioe bara o made vakaroro.
A malala a hunu bara ru ropo manga a varakia.
12 Go pilu rua i manga a varakia,
o vuroki rua.
Bara o kuloi rua,
i manga a viri i kuloi a varakia vona.
Pali ioe bara o made mavonga kunana.
O uka ma go mapulo.
Go made vakaroro.”
13 *A Vure i uka ma i takia tara agelo ge ta maea,
“O valai o made na limagu a kanegu,
ge harena na tahuna ga ru na tarumu e huriki a pile vomu.”
14 *E huriki a agelo a hanu kunana.
A Vure i rudu ria ri gi tuhori e huriki a bakovi a ngatavine a Vure i korimule ria.