A Raukea e Paulus i Here Lakea ne
Pilemon
A Mugana Nita
1
Iau e Paulus,
ni ru dili iau na bavi,
a vuhuna a ramai e Isu Kristo.
Maria e Timoti,
a turane tarua,
miri here lakene vomu o Pilemon.
Miri ngaru hateka ioe,
te leho palupu.
2 *Miri here tabu lakea na tara na Vure ri vapopo na ruma vomu,
e kurabane hita e Apia,
turana e Arkipus i leho turane maria na leho na Vure.
3 A Vure e Tamane hita,
rua e Isu Kristo a Bakovi Dagi ru gu rata kamumu mua,
ru gu habi a nivalemu ne mua.
E Paulus i Vivi, i Vasileki
4 Na tahuna a luhoi ioe,
a kavurikea a Vure,
5 a vuhuna a longo ta o luhoi torea e Isu Kristo,
o ngaru hatekea,
o ngaru e huriki a tara vona.
6 A vasileki vona na tahuna o taki e huriki a niluhoi vomu ne Kristo,
bara i vakabele a kanena,
ri gi lohoka kamumu vona a maki kamumu lobo si gi bole a vuhuna si rihi e Kristo.
7 *O vakasiri manga o ngaru hateka e huriki a tara na Vure,
o rata kamumu hateka ria,
o vakatora a niluhoi ne ria.
Na naro iea kunana,
o vakatora a niluhoi nau,
o rata iau a vivi.
E Paulus i Nana Vona e Onesimus
8 I uka ma a mangenge ni vakuku ioe go rata a naro kamumu tara,
a vuhuna tarua varago a viri ne Kristo.
9 Pali a vuhuna tu vangaru,
a koi ni vakuku ioe.
Iau,
a gare,
a made na bavi,
a vuhuna a ramai e Isu Kristo.
Lakea a ngaru ni taki kunana ioe.
10 *A ngaru go rata kamumua e tugu,
e Onesimus.
A bele manga e tamana na tahuna a made na bavi.
11 Hosi ia a vora tavula,
i uka ma i kori kamumu ioe.
Pali ngane i tahoka a leho ne tarua.
12 Ngane ga rudua,
ge hamule lakene vomu.
Ia a hategu.
13 Bara vivi ge made turagu koea,
ge bole a murimu,
ge tuhori iau koea na bavi,
a made vona a vuhuna a taki tala a Velenga Kamumu.
14 Pali a koi ge made koea,
i uka ma ga nana taro ioe.
Na naro iea,
ioe bara o ngaru ge made koea ge kori iau,
bara i ramai a ningaru vomu,
i uka ma ge ramai a hini ga taki tuhare ioe.
15 I uka ma tu palala,
ma ge ha taro muga ioe,
ge made turagu popote,
lakea muri a Vure ge ratea ge hamule,
ge made liu turamu.
16 *I muga ia a vorakato vomu.
Pali ngane ia e turagu,
a ngarua.
Ngane ia e turamu o ngaru hatekea,
i manga e turamu na malala,
e turamu ne Bakovi Dagi.
17 I mavonga,
ioe go luhoi iau,
ga manga a viri tu leho palupu,
o taguia,
o bole mulea e Onesimus,
i manga kunana a hini bara o tagui iau.
18 Ia ge rata hale muga ioe,
o ge panaho ranga moni vomu,
o here puru,
bara koli.
19 Iau,
e Paulus,
a here na limagu ra ngava iea.
Ioe bara o ngaru,
bara koli a mapana maki i bole muga.
Pali ga ta maea tabu,
ioe tara bara o koli a maki tara o bole hosi nau,
ra a nimahuri na hanumu.
20 I muholi,
o turagu.
A ngaru go kori iau na rane Bakovi Dagi.
O vakatora a niluhoi nau na rane Kristo.
21 A lohoka vona bara o longototo.
A here lakene vomu,
a lohoka vona a naro go rata virihi e Onesimus vona bara i rangi a hini a taki ioe vona.
22 *Ga taki tabua tara maki.
O pelekadoa a roho vomu.
A luhoia a Vure bara i longo a nivasileki ne mua,
bara lakene,
a made turane mua.
E Paulus i Tarulu e Huriki
23 *E Epapras i talo mua.
I made na bavi turagu,
a vuhuna i ramai e Isu Kristo.
24 *E Markus,
e Aristakus,
e Demas,
e Lukas,
ra ri leho turagu,
ria ranga ri talo mua.
25 E Isu Kristo a Bakovi Dagi ge rata kamumu mua.