A Rabu na Nikavurike
2
Lakea a maki dagi hateka a ngaru mu gu ratea i maea:
Mu nana torea a Vure ge kori e huriki a bakovi a ngatavine,
mu vasileki ne huriki,
mu kavurikea a Vure na tahuna i kori e huriki.
2 E huriki a hariki,
e huriki a bakovi dagi,
ria ranga mu vasileki mavonga ne ria,
ri gi matakari kamumu hita,
si gi made madoru na nivalemu,
si gi muri mai a Vure,
si gi togo e huriki na maki lobo si rata.
3 Ra nivasileki maea i kamumu na matana Vure,
ra viri i korimule hita.
4 I ngaru ni korimule e huriki lobo,
ri gi lohoka vona a ngava muholi,
5 a vuhuna i uka tabu tara Vure.
A Vure ia kikeri kunana.
A bakovi ala taku kunana i rata e huriki ri gi made na nivalemu turana a Vure.
Ra bakovi iea e Isu Kristo.
6 *I mate na ningaru vona,
ge konamule e huriki.
Ra ngava nga,
a Vure i ngaru si gi vakalongo e huriki vona ngane.
7 *A Vure i vulaki iau ge iau a apostolo vona,
ga vakalongo a ngava nga,
ga tovo e huriki a kabu i uka ma ria a Iuda,
ri gi luhoi torea e Kristo,
ri gi lohoka vona a ngava muholi.
Iau a ta muholi,
i uka ma a tatami.
8 I mavonga,
a ngaru e huriki a bakovi na Vure na tanga lobo ri gi vasileki vakaroro.
Na tahuna ri toto rike a limane ria,
ri gi luhoi mule a narone ria.
Nahea ri gi hini hate,
nahea ri gi vahehe.
9 *E huriki a ngatavine,
nahea ri gi rodo a maki ni rata e huriki a bakovi ri gi matanono ria.
Ri gi rodo kunana a maki i kara a ngatavine.
Nahea ri gi bagetu hateka.
Nahea ri gi huraki a gogo,
nahea ri gi rodo a maki ge rike hateka a mapana.
10 *E huriki a ngatavine ri ngaru ni muri mai a nitana Vure,
ri gi rata a naro kamumu.
A naro kamumu,
a bagetua ne ria.
11 Na tahuna e huriki a ngatavine ri longo a vinara,
ri gi made madoru,
ri gi longo kamumu a ngava,
ri gi ramai kunana.
12 *Nahea tara ngatavine ge muga,
o ge tovo e huriki a bakovi.
Na tahuna mu vapopo,
e huriki a ngatavine ri gi vulai ri gi longo kunana a ngava,
13 *a vuhuna a Vure i rata mugea e Adam,
muri i ratea e Eva.
14 *Pali e Satan i uka ma i tamia e Adam.
I tamia e Eva,
lakea e Eva i longotaroa a Vure.
15 Pali a leho ne huriki a ngatavine,
ni poda a koma.
Na tahuna ri pesi tora ni luhoi torea e Kristo,
ri ngaru e huriki,
ri laho malamala,
ri muri mai a naro i kara ria,
bara i korimule ria a Vure.