4
*Mua e huriki a tahona vora,
mua ranga,
mu rata a naro kamumu ne huriki a vora,
a vuhuna mu lohoka vona,
mua ranga mu tahoka a Tahone mua i made na hunu.
A Naro na Nivasileki
2 *Mu vasileki vakaroro,
naha ni malo.
Na tahuna mu vasileki,
mu matadoko,
mu kavurikea a Vure.
3 *Mu vasileki na Vure ge tuhori maria,
ge kado a dala ne maria,
miri gi vakalongo tabu a nita kapiloho ne Kristo.
Ngane a made na bavi,
a vuhuna a vakalongo e huriki na nita iea.
4 Mu vasileki nau ga tovo kavakava e huriki vona ra ngava iea,
i manga a hini a Vure i ngaru ga rata.
5 *Mu luhoi kamumu,
mu rata a naro malamala ne huriki i uka ma ri luhoi torea e Isu Kristo.
Na tahuna mu made turane ria,
mu taki kunana a maki ne Kristo.
6 *Mu ta kamumu mai ria,
mu tuveve kamumu ria vona a nita muholi.
Na tahuna ri nana mua,
mu koli kamumu a ninana ne ria.
E Paulus i Rudu e Tikikus e Onesimus
7 *E Tikikus bara i vakalongo mua vona iau a made navai.
A ngaru hatekea.
I rata kamumu a leho lobo e Bakovi Dagi i habia vona,
miri leho palupu ne Bakovi Dagi.
8 *A rudu lakenea,
ge vakalongo mua vona a leho miri rata koea,
ge vakatora a niluhoi ne mua.
9 *A bakovi na tanga ne mua,
e Onesimus,
ia tara a rudua ge turane Tikikus.
E Onesimus i luhoi torea e Bakovi Dagi,
miri ngaru hatekea.
Rua varago ru gu vakalongo mua vona a maka maki i bele koea.
E Paulus i Talo e Huriki
10 *E Aristakus i dili turagu na bavi koea,
i talo rike a haro kamumu ne mua.
E Markus,
e tarine Barnabas,
ia tara i talo rike ne mua.
Hosi a vakalongo mua vona e Markus.
Na tahuna ge bele iene,
mu tagui ia.
11 A bakovi ni gale e Isu,
a rana kalale vona e Iustus,
ia tara i talo rike a haro kamumu ne mua.
Ra bakovi nga,
tou kunana a bakovi o Israel,
to leho turagu koea ni tovo e huriki na nitana Vure.
To vakatora a niluhoi nau.
12 *E Epapras ia a bakovi na tanga ne mua,
a vora ne Isu Kristo,
ia tara i talo mua.
I vasileki hateka vakaroro ne mua mu gu pesi tora na ningaru lobo na Vure,
mu gu gao ni ramai a Vure,
mu gu longo mai a ngavana Vure.
13 Iau a taki mua,
i leho hateka ni kori mua turane huriki ri made na vuhutanga e Laodisia,
e Hirapolis.
14 E Lukas,
ra dokta si ngaru hatekea,
turane Demas rua ranga ru talo rike a haro kamumu ne mua.
15 A ngaru mu gu habi a nitalo nau ne huriki a tara na Vure o Laodisia.
A haro kamumu na ngatavine e Nimpa,
turana e huriki a tara ri vapopo na ruma vona.
16 Na tahuna mu gi loboa a raukea iea,
mu vakaru lakea ne huriki a tara o Laodisia,
ria ranga ri gi gia.
Pali ra raukea tara a vakaru lakea o Laodisia,
ia tara mu bolea mu gia.
17 *Mu takia e Arkipus mu ta maea,
“Ra leho o bolea ne Bakovi Dagi,
o leho kamumu vona o vakaloboa.”
18 *Iau e Paulus a herea na limagu a ngava nitalo nga,
a talo rike a haro kamumu ne mua lobo.
Mu luhoi iau,
a tabana na nimade na bavi.
A Vure ge rata a naro kamumu ne mua.