3 ^*Maria e Timoti miri vasileki vakaroro ne mua,

miri kavurikea a Vure,

e Tamane Bakovi Dagi ne hita,

e Isu Kristo,

4 a vuhuna miri longo mua mu luhoi hatekea e Isu Kristo,

mu ngaru e huriki a tara na Vure.

5 ^*Mu rata mavonga,

a vuhuna mu pasimata na tahuna e Isu ge bole mua,

mu gu made turana vakaroro na hunu.

Mu vakatubu ni pasimata mavonga na tahuna mu longo a ngava muholi,

a Velenga Kamumu.

6 Ra Velenga Kamumu ne Isu Kristo ni tovo e huriki vona na tanga lobo na malala,

lakea i rata ranga e huriki ri pulo a vilone ria.

I manga kunana a naro i bele ne mua na tahuna mu longo muga a Velenga Kamumu,

mu matakilalea a rabu muholi na nidodo na Vure.

7 ^*E Epapras a viri i tovo mua vona a Velenga Kamumu.

Miri ngaru hatekea a bakovi iea.

Ia tara a vora ne Kristo,

i tuhori maria.

I rata kamumu a leho lobo e Kristo i habi vona.

8 I vakalongo maria vona mu longototoa a Hanuna Vure,

mu ngaru e huriki lobo.

9 ^*Na tahuna miri longo a nuverei ne mua,

miri vasileki vakaroro ne mua.

Miri nana vakaroro a Vure ge rata mua,

mu gu gao na maki na Vure,

ge habi a lohokanga ne mua,

mu gu lohoka na ningaru vona.

10 Miri vasileki mavonga,

a vuhuna miri ngaru mu gu laho na naro e Bakovi Dagi i ngaru mu gu laho vona,

ge vivi ne mua,

a leho kamumu ne mua ge tahoka a kanena,

mu gu lohoka kamumu tabu na Vure.

11 ^*A Vure ge vakatora hateka mua na nitora dagi lobo vona,

lakea i uka ma mu gu tuha malulu,

mu gu hatenono,

12 ^*mu gu vivi ni kavurikea e Tamane hita,

ra i rata mua mu kara ni bole a tabeke na maka maki i kisi puru pali meli na hunu,

ne huriki a bakovi a ngatavine vona.

13 ^*A Vure i korimule hita na nitora ne Satan,

i bole hita lakea na harikianga ne Tuna a hatena.

14 ^*Ia a viri i korimule hita,

i puga vuroki a naro hale ne hita.

15 ^*A Vure,

i uka tara viri ge masia.

Pali e Tuna i manga kunana a Vure,

i vakasiri hita na Vure.

E Tuna a Tabua i dagi hateka na maki lobo ni ratarike,

16 a vuhuna na limane Kristo kunana,

a Vure i ratarike a maki lobo.

I ratarike a maka maki na malala,

a maka maki na hunu.

I ratarike a maka maki si matai,

a maka maki i uka ma si matai.

I ratarike e huriki a hanitu,

e huriki a agelo ri tahoka a nitora dagi turana maka maki ranga ri tahoka a nitora,

ri matakari koea na malala.

A Vure i rata na limane Kristo a maki lobo ge ne vone Kristo.

17 ^*Na tahuna a maka maki i uka ma ni ratarike ma,

e Isu Kristo i made muga pali.

Na nitora vona,

a maki lobo i tabuli kamumu.

18 ^*E Kristo i muga ne huriki a tara na Vure.

Ia a vuhuna maki lobo,

ia a viri i muga i pesi rike mule na matenga,

ge muga na maki lobo,

19 ^*a vuhuna a Vure i ngaru a rabuna lobo ge tabuli vona.

20 ^*Na nimatene Kristo na kai tavalavala,

a Vure i rata a maki lobo koea na malala,

meli na hunu,

ri made kamumu tabu turana na nivalemu.

21 ^*Muga mu marava basi na Vure.

Na niluhoi ne mua,

mua a pile na Vure.

A vilone mua i hale.

22 ^*Na nimatena,

e Kristo i rata mua ngane mu made turana Vure na nivalemu.

I rata mavonga a vuhuna i ngaru mu gu valai tabukoi na Vure,

mu gu made malamala na matana,

i uka ma ge pelekado mua.

23 A maka ngava nga i muholi na tahuna mu nugutata,

mu pesi tora na niluhoi ne mua,

ma ge turari mua a maki tara bara mu vorotaparaki a maki si pasimata ni matai na Velenga Kamumu.

Iau e Paulus a vora ni vakalongo a Velenga Kamumu iea,

ra mu longoa pali,

ni vakalongo lae ne huriki lobo na malala.

24 Ngane a vivi,

a vuhuna a bole a ni­madihi ga kori mua,

ga tuhori mua e huriki a tara na Vure,

mua a kakaine Kristo.

A nimadihi a bole na kakaigu na rane Kristo,

i uka ma ge lobo mala­viriri.

Bara i tabana.

25 ^*A Vure i vulaki iau,

ge iau a vora ni vakalongo a Velenga Kamumu ne mua,

mu gu lohoka kamumu vona.

26 ^*Muga,

a ngava iea i kapiloho ne huriki e tubune hita,

pali ngane ni pukatala ne huriki a tara na Vure,

ni vaka­lohoka ria vona.

27 Na ningaru vona kunana,

a Vure i puka talea a niluhoi kapiloho vona ne ria.

I ngaru ri gi lohoka vona a niluhoi kapiloho.

Ra niluhoi kapiloho vona i kamumu hateka,

i habi a nipara dagi ne huriki i uka ma ria a Iuda.

A niluhoi kapiloho i maea:

a Vure i ngaru e Kristo ge made pololilo ne mua e huriki i uka ma mua a Iuda.

Ngane mu malamala bara mu pasimata vona a Vure ge bole dili mua na hunu.

28 Miri vakalongo mua vona a Velenga Kamumu ne Isu Kristo.

Miri tovo e huriki na lohokanga lobo,

miri taki ria ri gi muri mai a nitana Vure,

a vuhuna miri ngaru e huriki lobo ri gi malamala,

ri gi lakea na Vure.

Na tahuna ri gi bele na Vure,

miri ngaru ria ri gi bele manga e Kristo.

29 ^*Iau a leho hateka i valai i harena mona.

Ra nitora na Vure i tabuli nau,

a habi loboa na leho iea.