A Nihabi ne Huriki a Tara ne Kristo
16
*Ngane ga taki tabu mua vona a naro na ni ru kadolu a moni ni kori e huriki a tara ne Kristo o Ierusalem.
Mu rata manga a hini a taki e huriki a tara ne Kristo o Galesia.
2 Na Sande lobo,
mua takutaku mu ru kadolu ranga moni mu bole na parava takutaku.
Mu rata mavonga,
na tahuna a lakene i uka ma mu gu papahari ni matakana a moni ni vakaru lakea ne ria.
3 Na tahuna a bele iene,
mu vulaki ranga bakovi,
ga rudu ria,
ri gi taparakia o Ierusalem a kinori ne mua.
Ga herea a raukea to go vakasiri o Ierusalem,
ri gi matakilala tou,
tou a bakovi kamumu.
4 Pali iau ga masia ge kamumu ga vano,
bara to laho turagu.
A Nihavai ne Paulus
5 *Iau bara lakea taro na tabeke ne Masedonia,
ga laho taro vonga.
Muri bara lakene,
bara gosi mua.
6 *A ngaru ni made tabaka turane mua.
Bara made turane mua na tahuna na malangia.
Muri,
ga pe mua,
ga lokovai,
bara mu kori iau na nilaho nau.
7 Iau bara lakene ngane,
i uka ma ge kamumu,
a vuhuna bara laho polopolo kunana.
E Bakovi Dagi ge ngaru,
a ngaru ga made tabaka turane mua.
8 Pali ngane ga made taro o Epesus,
ge lobo taro a habu na Pentekos,
9 *a vuhuna a Vure i kado puru pali a dalagu ga rata a leho dagi vona,
ga vakabele a kanena dagi.
Ri ala kupo hateka ri gege iau koea.
10 *Na tahuna e Timoti i bele iene,
mu rata kamumua,
i uka ma ge mangenge.
I rata a leho ne Bakovi Dagi manga iau.
11 *Nahea tara viri ge biu ia.
Mu tuhoria na tahuna i ngaru ni hamule valai nau,
ge pe mua na nivalemu.
A pasimata vona e Timoti ge hamule valai turana e huriki e turane hita.
12 *E Apolos,
e turane hita,
a taki torea ge vano turana e huriki a turane hita,
ri gi matai mua.
Pali i uka ma i ngaru.
Muri ma,
ia ge malopi,
bara i lakene,
ge matai mua.
A Nilobona Ngava
13 Mu matadoko.
Mu pesi tata na niluhoi tora.
Naha ni mangenge,
mu kinigao.
14 A maki lobo mu rata,
mu rata na naro na nivangaru.
15 *Mu lohoka vona a kabu ne Stepanas.
Ri pulo a narone ria muga ne huriki lobo na tabeke ne Akaia.
Ri habi a hatene ria ni tuhori e huriki a tara ne Kristo.
Mua e huriki a turagu,
a ngaru mu gu
16 longototo e huriki a bakovi maea,
turana e huriki ri rata a leho ne Bakovi Dagi.
17 A vivi vona e Stepanas,
e Portunatus,
e Akaikus to valai koea,
to matai iau.
To valai na murine mua,
18 to vakakamumu a hategu.
Mua ranga,
to vakakamumu a hatene mua.
Mu togo e huriki a bakovi maea.
19 *E huriki a tara ne Kristo na tanga lobo na tabeke ne Asia ri talo rike a haro ne mua.
E Akuila rua e Prisila,
e huriki a tara ne Kristo ri vapopo na ruma ne rua,
ri talo rike na rane Bakovi Dagi a haro kamumu ne mua.
20 E huriki e turane hita ri talo mua.
Mu vatagui na naro kamumu.
21 Iau,
e Paulus,
a herea na limagu a nitalo nau i lakene mua.
22 *E rei a viri i uka ma i ngarua e Bakovi Dagi,
a Vure ge rudurahea.
O valai,
Bakovi Dagi ne mia!a
23 E Isu,
a Bakovi Dagi,
ge rata kamumu mua.
24 A ngaru hateka mua,
ra mu rihi e Isu Kristo.
I muholi.