A Maka Nitora na Hanu Kiripiripi
12
Mua e huriki a turagu,
a ngaru mu gu lohoka vona a maka nitora legelege a Hanu Kiripiripi i habi tavula ne hita.
2 *Hosi,
na tahuna mu made na uvo,
ni tami mua na dala ranga,
mu kavurike a hanuna vure ranga,
ra ri keri ni ta.
3 *I mavonga,
a ngaru mu gu palala vona tara maki.
E rei a viri i ta maea,
“A rudurahea e Isu!”,
a Hanuna Vure i uka ma i made turana bakovi iea.
A Hanu Kiripiripi i uka ma ge made turana viri,
bara i keri ni ta maea,
“E Isu ia e Bakovi Dagi!”
4 *A nitora a Hanu Kiripiripi i habi tavula ne hita,
ri kupo,
ri legelege,
pali a Hanu Kiripiripi i taku kunana.
5 A leho e Bakovi Dagi i habi ne hita takutaku ri legelege,
pali e Bakovi Dagi i taku kunana.
6 A naro kamumu si gi rata ri kupo,
ri legelege,
pali a Vure i taku kunana,
i habi a nitora ne hita si gi rata.
7 A Hanu Kiripiripi i vakasiri a nitora vona ne hita takutaku,
si gi vakori.
8 A Hanu Kiripiripi i habi na viri tara a ngava na niluhoi kamumu.
Pali na viri tara i habi a ngava na lohokanga.a
9 I habi na viri tara ge luhoi torea a Vure.
Pali i habi na viri tara a nitora ni vakamahuri e huriki ri giloa.
10 A Hanu Kiripiripi i habi na viri tara a nitora ni rata a nivakasiri.
I habi na viri tara a nita propet.
I habi na viri tara a nitora ni matakilaka vona a maki na Vure,
a maki na hanitu.
Na viri tara i habi ge ta na tabele tebi legelege.
Na viri tara i habi ge tuveve polo a pelegona tabele tebi.
11 *A maki lobo nga,
a Hanu Kiripiripi i taku kunana i rata,
i habi ne huriki takutaku na ningaru vona.
Hita Lobo a Kakaine Kristo
12 *A kakaine hita i tahoka a tabekena i kupo.
A tabekena i kupo hateka,
pali ri vakabele a kakaina i taku kunana.
Na naro iea kunana,
a kakaine Kristo tara.
13 *E huriki ranga a Iuda,
e huriki ranga a Grik,
e huriki ranga a vorakato,
e huriki ranga i uka ma ria a vora,
hita lobo,
a Hanu Kiripiripi i vahilolo hita,
si bele manga a kakaine Kristo i taku kunana.
Hita lobo si vaveru vona a Hanu Kiripiripi i taku kunana.
14 A kakaina viri,
i kupo a tabekena.
I uka ma i taku kunana.
15 A vaha ge ta maea,
“Iau i uka ma a lima,
lakea iau i uka ma a tabekena kakaina viri.”
A ngava iea i uka ma ge ratea ge muholi.
Ia a tabekena kakaina viri.
16 Pali a tulina ge ta maea,
“Iau i uka ma a matana,
lakea iau i uka ma a tabekena kakaina viri.”
A ngava iea i uka ma ge ratea ge muholi.
Ia a tabekena kakaina viri.
17 A kakaimu lobo ga matana kunana,
go longo navai?
Pali a kakaimu lobo ga tulina kunana,
go burongi navai?
18 Pali a kakaine hita i uka ma i mavonga.
A Vure i rata a kakaine hita,
i ru na tabekene ria takutaku a tabekena kakaine hita,
na ningaru vona.
19 A kakaina viri ge tahoka a tabekena i taku kunana,
i uka ma ge manga a kakaina viri.
20 A kakaine hita i tahoka a tabekena i kupo,
pali a tabekena nga ri vakabele a kakaine hita i taku kunana.
21 A matana viri i uka ma ge takia a limana ge uka leho.
A gina viri i uka ma ge takia a vahana ge uka leho.
22 Pali a maka tabekena kakaine hita ri mata manga i uka ma ri tora,
ri tahoka a leho dagi.
23 A maka tabekena kakaine hita si maruhu vona,
si vakabagetu,
si kavitagu.
A maka tabekena kakaine hita i uka ma ni gi matai,
si kavitagu kamumu.
24 Pali a maka tabekena kakaine hita i uka ma si maruhu vona,
i uka ma si gi kavitagu.
A Vure i ru na tabekene ria takutaku,
a tabekena kakaine hita,
i rata a maka tabeke si maruhu vona,
si matakari kamumu.
25 Lakea a kakaine hita ge taku kunana,
i uka ma ge vakalipida.
A maka tabekena kakaine hita lobo ri vamatakari.
26 A tabekena tara ge bole a nimadihi,
a tabekena lobo bara ri hatakia.
A tabekena tara ni gi vakabagetu,
a tabekena lobo bara ri vivi.
27 *Na naro iea kunana,
mua takutaku a tabekena kakaine Kristo.
28 *A Vure i ru e huriki ri gi leho pololilo na tara ne Kristo.
I ru taro e huriki a apostolo,
muri i ru e huriki a propet,
muri ru e huriki a mari ni tovo,
muri i ru e huriki ri rata a nivakasiri,
muri e huriki ri vakamahuri e huriki,
e huriki ri moro ni kori,
e huriki ri moro ni matakari a leho,
e huriki ri ta na tabele tebi legelege.
29 I uka ma ge mua lobo a apostolo.
I uka ma ge mua lobo a propet.
I uka ma ge mua lobo a mari ni tovo.
I uka ma ge mua lobo mu gu rata a nivakasiri.
30 I uka ma ge mua lobo mu gu vakamahuri a viri.
I uka ma ge mua lobo mu gu ta na tabele tebi.
I uka ma ge mua lobo mu gu tuveve polo a tabele tebi.
31 *A ngaru mua lobo mu gu ngaru ni bole a nitora na Hanu Kiripiripi ni rata a leho ge tuhori hateka e huriki.
Pali ngane ga vakalongo mua vona a naro i kamumu hateka.