Naha Ni Kavurike a Vure Ranga
10
*Mua e huriki a turagu,
a ngaru mu gu lohoka vona,
e huriki a gare ne hita hosi,
a bubu i matakari ria lobo na tabeke i ngeki.
Ria lobo ri laho polo na dari.
2 A bubu i matakari ria,
ri laho polo na Dari Vururu turane Moses.
A naro nga ru rata e huriki nga,
ria a tara ne Moses,
i manga mona a viri ni vahilolo,
i dili na tara ne Kristo.
3 *Ria lobo ri kani vona a maki ni kani i valai na Vure.
4 *Ri ninu vona a naru i valai na Vure,
a vuhuna ri ninu vona a naru na kedo i valai na Vure,
ra i muri mai ria.
A kedo iea,
re Kristo.
5 *A maki nga ri bele ne ria,
pali i kupo ne ria,
a Vure i uka ma i vivi ne ria,
lakea i ratapile ria na tabeke i ngeki.
6 *A maki nga ri bele,
ge a nivakasiri ne hita,
i uka ma si gi ngaru a naro hale manga ria.
7 *Nahea mu gu kavurike a vure ranga,
manga e huriki nga ri rata.
Ni here na Hinere i maea,
“Ri made puru,
ri kani,
ri ninu.
Muri ri pesi rike,
ri rehi turane huriki a ngatavine.”
8 *Nahea si gi rata a naro na molenga,
i manga ranga ne ria ri rata.
Ri rata mavonga,
e huriki ala 23,000 ri mate na parava i taku kunana.
9 *Nahea si gi tonia e Kristo,
i manga e huriki ranga ne ria ri rata.
Ri rata mavonga,
a maka mata ri kani mate ria.
10 *Naha ni deke na Vure,
i manga e huriki ranga ne ria ri rata.
Ri rata mavonga,
lakea a agelo na matenga i rabalaki ria.
11 A vuranga nga ri bele,
ge vakasiri e huriki nga i uka ma ri gi rata a naro hale.
Ni here puru na hinere,
ge tovo hita,
ra si made pali na nilobona parava.
12 I mavonga,
e rei a viri i luhoi ta i pesi tora,
ge matadoko,
ma ge boru.
13 A nitoni lobo i bele ne mua,
i manga kunana a nitoni i bele ne huriki lobo.
A Vure i rata a maki lobo i taki ge rata,
i mavonga,
na tahuna a nitoni i bele ne mua,
bara i matakari mua,
a nitoni i uka ma ge rangi a kinigaonga ne mua.
Bara i ratea tara dala mu gu malele ha vona a nitoni,
i uka ma mu gu boru.
14 I mavonga,
mua e huriki a turagu,
mu malele ha vona a naro ni kavurike a vure ranga.
15 Mu tahoka a niluhoi kamumu,
lakea a taki mua.
Mu luhoi kado a ngava a taki.
16 *A kikei si ninu vona na komunio,
si vaveru vona a darane Kristo.
Na tahuna si kevea a bret,
si vaveru vona a kakaine Kristo.
17 *A bret i taku kunana.
I mavonga,
hita lobo si vakalipopo,
hita a tara i taku kunana,
a vuhuna si vaveru vona a bret i taku kunana.
18 *Mu luhoi e huriki a Israel.
Ri manga a kabu i taku kunana,
ri kani vona a nihabi ni habi na dede,
ri vaveru vona a nihabi.
19 *I uka ma a taki a vure ranga a maki muholi.
I uka ma a taki a kania ni habi ne ria a maki muholi.
20 *Pali a nihabi ne huriki ri made na uvo,
i uka ma ri habi na Vure.
Ri habi na hanitu.
A koi mu gu vaveru turana hanitu.
21 *Mu keri ni ninu varago a kikei ne Bakovi Dagi,
a kikei na hanitu.
Mu keri ni kani varago na dede ne Bakovi Dagi,
a dede na hanitu.
22 *I navai?
Si kinigao hateka ne Bakovi Dagi?
Si gi vakarike a hatena ge bage ne hita?
A Maki Lobo Si Rata, Ge ne Vona e Bakovi Dagi Kunana
23 *Mua ranga mu ta maea,
“I uka tara naro ni gi pupukari iau ga rata.”
Pali iau a taki,
a naro ranga i uka ma ri gi kori iau.
Mu ta maea,
“I uka tara naro ni gi pupukari iau ga rata.”
Pali iau a taki,
a maki ranga i uka ma ge vakatora hita.
24 *Naha ni luhoi ni tuhori mule ioe kunana.
O luhoi e huriki ranga,
o tuhori ria.
25 A ra kania mu kona na maket,
nahea mu gu nana ria,
ri bole vai,
ni habi na nitamina vure o i uka.
Mu kani kunana,
26 *a vuhuna ni here maea,
“A malala,
a maki lobo i tabuli vona,
ne vona e Bakovi Dagi.”
27 A bakovi tara i uka ma i luhoi torea e Kristo,
ge taki ioe go kani na ruma vona,
pali o ngaru ni vano,
o vano.
A ra maki i habi vomu,
o kani kunana.
Naha ni nanea i bole vai.
28 *Pali ni gi taki ioe maea,
“A kania nga ni habi manga a nihabi na vure.”
Pali,
naha ni kani,
ma ge hale a niluhoi na viri i vakalongo ioe vona a kania nga.
29 A ta maea,
i uka ma go kori a niluhoi vomu.
A ta maea,
go kori a niluhoi na viri i taki ioe vona a kania nga i valai na roho na vure tebi.
A viri tara bara i ta maea,
“I navai a ningaru nau ni gi pupukari na niluhoi na bakovi tara?
30 *Iau a kani,
a kavurikea a Vure vona a kania iea,
pali ri gi ta hale navai nau vona a maki a kavurikea a Vure vona pali?”
31 *I mavonga,
a ra maki mu ninu,
a ra maki mu kani,
a ra maki mu ratea,
mu ratea,
e huriki ri gi togoa a Vure.