A Naro Ni Vapelekado na Ngava
6
A viri tara ne mua ge tahoka a ngava ne turana tara,
i navai ge polo taro e huriki a tara ne Kristo,
ge vano,
ge vakapesia na matane huriki a bakovi na uvo?
2 *I navai?
I uka ma mu lohoka vona?
E huriki a tara ne Kristo ri gi pelekado a narone huriki na malala muri ma.
Ge mavonga,
i navai mu keri ni vapelekado a ngava kiroko ne mua?
3 I uka ma mu lohoka vona?
Muri ma si gi pelekado a narone huriki a agelo.
I mavonga,
i kamumu si gi vapelekado a ngava ne hita koea na malala.
4 Pali na tahuna mu tahoka a ngava,
i navai mu vakapesi a bakovi,
i uka rana na tara ne Kristo,
ge pelekado a ngava ne mua?
5 A ta maea,
ga vakamaruhu mua.
I navai?
I uka tara viri ne mua ge tahoka a niluhoi kamumu,
ge longo,
ge pelekado a ngava i bele na koropalane mua?
6 Pali mua mu vakapesi e turane mua na matane huriki i uka ma ri luhoi torea e Kristo.
7 Ra hini mu vagege,
mu vakapesi mua na matana bakovi ni pelekado a ngava,
i vakasiri manga mu velu pali na vilo ni muri mai e Kristo.
A viri tara ge rata hale mua,
mu kaloho kunana.
A viri tara ge tami mua,
ge radi a maki ne mua,
mu kaloho kunana.
8 Pali i uka ma mu rata mavonga.
Mua kunana a viri mu rata hale,
mu tami e turane mua,
mu radi a maki ne ria!
9 *I navai?
I uka ma mu lohoka vona?
E huriki ri rata a naro hale i uka ma ri gi dili na harikianga na Vure.
Naha ni tami mule mua.
E huriki ri mole,
e huriki ri kavurike a vure ranga,
e huriki ri tuli e girihina viri tara,
e huriki a bakovi ri radi a bakovi,
10 e huriki a panaho,
e huriki ri muma,
e huriki ri ninu a naru vagole ri manga,
e huriki ri ta padimomo,
e huriki ri radi a maki na viri tara,
re huriki a bakovi a ngatavine maea i uka ma ri gi dili na harikianga na Vure.
11 *Ranga ne mua,
hosi mua a viri maea.
Pali a rane Isu Kristo a Bakovi Dagi,
a Hanuna Vure ne hita ru vahilolo mua,
ru rata mua mu malamala,
ru rata mua mu uka ngava na matana Vure.
Naha Ni Mole
12 *Ranga ne mua mu ta maea,
“I uka tara naro ni gi pupukari iau ga rata.”
Pali iau a ta maea,
a naro ranga i uka ma ri gi kori iau.
Mu ta maea,
“I uka tara naro ni gi hatekakari iau ga rata.”
Pali iau i uka ma ga matataro tara naro ge vakavora iau.
13 *Mu ta maea,
“A maki ni kani ne vona ni vakavonu a kavutu.
A kavutu ne vona ni tahoni a maki ni kani.”
I muholi,
pali muri ma a Vure ge vakalobo varago a maki ni kani,
a kakaine hita.
A kakaine hita i uka ma ne vona ni mole.
A kakaine hita ne vona e Bakovi Dagi.
E Bakovi Dagi ne vona a kakaine hita.
14 *A Vure,
na nitora vona,
i vakamahuri mule na matenga e Bakovi Dagi.
I mavonga,
hita ranga,
bara i vakamahuri mule a kakaine hita.
15 *Mu luhoia.
A kakaine mua takutaku ri manga a tabekena kakaine Kristo.
I mavonga,
i kamumu ni gi rata a tabekena kakaine Kristo ge madoko na kakaina ngoi?
I uka liu!
16 *Mu luhoia.
A bakovi i mahita turana ngoi,
a kakaine rua i bele taku kunana,
a vuhuna ni here na Hinere maea,
“A kakaine rua ge taku.”
17 *Pali a viri i rihi e Bakovi Dagi,
a hanune rua ru madoko.
18 Mu malele ha vona a naro na molenga.
A naro hale lobo ni rata polovavo na kakaina viri.
Pali a viri i mole i rata hale virihi mule a kakaina.
19 A kakaine mua a roho na Hanu Kiripiripi,
ra i valai na Vure,
i made pololilo ne mua.
Ngane a Vure a tahone mua,
i uka ma mua a tahone mua,
20 *a vuhuna i kona pali mua na mapa dagi.
I mavonga,
a maki lobo mu rata na kakaine mua ge rata e huriki ri gi kavurikea a Vure.