E Paulus i Bele na Bodu e Malta
28
Na tahuna mi huru dili pali na lavu,
ni vakalongo mia vona a bodu iea ni gale e Malta.
2 *E huriki a tahotanga ri rata kamumu hateka mia.
Ri tagui mia,
ri tunua a kanono mi hua,
a vuhuna i vakatubu ni boru a vala,
mi malangangi.
3 E Paulus i popoa a galesi na kai,
i tagu rike na kanono.
A mata i hataki a harena kanono,
i ha tala,
i kara tatea a limana.
4 E huriki a tahotanga ri masia a mata i tavore na limane Paulus,
lakea ri vata,
ri ta maea,
“A bakovi iea,
a bakovi ni rabalaki a viri!
I uka ma i vurua na dari,
pali a vure ne hita,
a rana e ‘Nipelekado’,
i koi ia ge mahuri.”
5 *Pali e Paulus i puraki vurokia na limana a mata,
i voro rikea na kanono,
i uka ma i vurea a matana.
6 *E huriki a taho tanga ri davea e Paulus ge vaki a limana,
o ge boru puru ge mate.
Ri dava,
dava i uka ma ri masia tara maki ge bele vona,
lakea ri palelea a ngavane ria,
ri takia ta ia a vure.
7 A bakovi dagi tara na bodu,
a rana e Publius,
i tahoka a malala vona tabukoi na hini mi huru dili vona.
I tagui mia,
lakea mi made turana na parava i tolu.
8 E tamana i giloa i mahita na kiri,
a vuhuna i rongo a kaina,
i koko pereo.
Lakea e Paulus i gosia,
i vasileki,
i ru langa a limana vona,
i vakamahuria.
9 Muri e huriki lobo na bodu ri tuli valai ne Paulus e huriki ri giloa,
i vakamahuri ria.
10 Ri habi tavula a maka maki ne mia.
Muri,
na tahuna ta mi gi malaga,
e huriki a tahotanga ri togo mia,
ri habi tavula ne mia a maka mahala,
ri vakarike a maka maki ni kani mi gi kani laho na marava.
E Paulus i Lakea o Rom
11 Muri na keva i tolu mi rike na aga ne huriki a Aleksandria,
a rana e “Vure Boge”,
e Kastor e Poluks.
A aga iea i kapiloho vonga na bodu na tahuna na malangia.
12 Mi nunu lakea na tanga dagi e Sirakius,
mi dili vonga,
mi made na parava i tolu.
13 Mi malaga vonga,
mi vano mi bele na tanga dagi e Regium.
Na parava muri a vilu i vakatubu ni pori valai tano.
Muri na parava i taku mi bele ne Puteoli.
14 Mi matavisi vonga ranga kabukabu,
ri taki mia mi made turane ria na parava i polorua.
Muri mi lakea o Rom.
15 Na tahuna e huriki a kabukabu o Rom,
ri longo a velenga ne mia,
ri malaga rike taku,
ri valai ri gi tagui mia.
E huriki ranga ri malaga na Mada ne Apius na tanga ni gale ‘A Roho i Tolu na Mosi,’
ri valai.
Na tahuna e Paulus i matai ria,
i vivi hateka,
i kavurikea a Vure.
E Paulus i Bele o Rom
16 Na tahuna mi bele o Rom,
ni taki e Paulus ge made kikeri turana tagari ge tagaria.
17 Muri na parava i tolu e Paulus i gale palupu e huriki a matakari ne huriki a Iuda vonga.
Na tahuna ri vapopo,
e Paulus i taki ria,
i ta maea,
“Mua o huriki a turagu,
iau i uka ma ratea tara naro ge hale ne huriki ne hita.
I uka ma a longotaroa tara vilo hosi ne huriki e tubune hita.
Pali iau ni lakavu tavula o Ierusalem,
ri habi iau ne huriki a Rom.
18 *Ri nana lobo iau,
i uka ma ri masia tara naro hale ga ratea ga mate vona,
lakea ri ngaru ni vakapagitala iau.
19 *Pali e huriki a Iuda ri koi,
lakea iau a taki a ngaru ni pesi na matane Kaiser.
Pali iau a uka ngava ga padi virihi e huriki a viri nau vona.
20 *Na naro iea kunana a nana ta ga matai mua ga ta turane mua.
Iau ni kolotata maea na sen,
a vuhuna a muri ne Kristo,
ra viri e huriki a Israel ri pasimata vona ge valai.”
21 Muri e huriki a Iuda ri koli,
ri ta maea,
“Mia,
i uka ma mi bolea o Iudea tara raukea ge vakalongo mia ne vomu.
I uka tara Iuda ge valai vonga ge vakalongo mia vona tara maki,
o ge padi virihi ioe vona tara ngava.
22 *Ngane mi ngaru ni longo a ngava go taki,
a vuhuna e huriki na tanga lobo ri padimomoa ra lotu karaba vomu.”
23 Muri ri rua tara parava ri gi vapopo turane Paulus vona.
I bele a parava iea,
lakea e huriki ala kupo hateka ri valai maia a ruma i made vona.
I vara ria vona a parava iea,
i vakatubu na hatelanga,
i vano i harena na haro i puru.
I toni ni rata ria ri gi luhoi torea e Isu,
lakea i vakasiri ria na vinara ne Moses,
na Hinere ne huriki a propet,
i vakalongo ria vona a harikianga na Vure.
24 I ranga e huriki ri luhoi a ngava ne Paulus,
pali i ranga e huriki ri longotaroa.
25 Ri vahehe lae,
lakea e Paulus i ta maea,
“A Hanu Kiripiripi i ta muholi lakea ne huriki e tubune mua,
i vakalongo polo ne Isaia a propet i ta maea,
26 *‘O lakea ne huriki nga,
o ta maea,
“Bara mu longo mu longo,
pali i uka ma mu gu longokilala.
Bara mu matai,
pali i uka ma mu gu matakilala.
27 E huriki nga ri gigi tora.
A talingane ria i robo,
ri mata kopu.
Ma ri gi matai,
ri longo,
bara ri matakilaka nau
ri pulo a vilone ria,
ri valai nau bara vakamahuri ria.’
28 “I mavonga a ngaru mua mu gu lohoka vona,
a velenga na nimahuri vakaroro na Vure ni vakaru lakea ne huriki i uka ma ria a Iuda.
Ria bara ri longo mai!”
29 Muri ne Paulus i takia a ngava iea,
e huriki a Iuda ri vahehe,
ri vapida.