A Leho na
Apostolo
E Lukas i Here Tabua Tara Puhu na Raukea
1
*O Tiopilus,
bakovi dagi.
A puhu na raukea nau a here mugea,
a tuverei a maka maki e Isu i vakatubu ni rata,
ni tovo e huriki,
2 *i vano i harena na tahuna e Isu ni bole sike na hunu.
Muga ne ia ni bole sike na hunu,
na nitora na Hanu Kiripiripi i vakalongo e huriki a apostolo vona,
i vulaki pali ria na leho ri gi ratea.
3 *Muri ne Isu i mate,
i luve ne ria,
i vakasiri kavakava ria,
ne ia i mahuri mule pali.
Na parava i ravulu va,
i bele balaka kupo ne ria,
i tovo ria na harikianga na Vure.
4 *Na parava tara,
na tahuna i kani turane ria,
i vakuku ria,
i ta maea,
“Naha ni pea e Ierusalem.
Mu davea a Viri e Tata i ta muholi vona muga ge rudu lakene ne mua,
ra a vakalongo mua vona pali.
Jesus Ascends to Heaven (Apostolo 1:4-11)
6 *Na parava tara ri vapopo,
lakea e huriki a apostolo ri nanea,
“Bakovi Dagi,
ngane go ratea e Israel ge matakari tabu e huriki a robo ranga?”
7 *E Isu i koli,
i ta maea,
“E Tata i ru pali a parava ge bele a maki nga.
Ia kikeri i tahoka a nitora ni ru a parava iea.
I uka ma a maki mua mu gu lohoka vona.
8 *Pali na tahuna a Hanu Kiripiripi i valai ne mua,
bara mu bole a nitora ni vakalongo a velenga nau o Ierusalem,
o Iudea,
o Samaria,
na tabeke lobo na malala.”
E Isu i Sike na Hunu
9 Muri e Isu ni bole sike na hunu na matane ria.
I sike lakea,
i kavitagua a bubu,
i uka ma ri matai tabua.
10 Na tahuna ri tababana ni mata rike,
a bakovi ala rua ru rodo a varakia keakea,
ru bele vakaturutu.
Ru pesi turane ria,
11 *ru ta maea,
“Mua o huriki a bakovi o Galili,
i navai mu pesi mu mata rike na hunu?
E Isu,
ra ni bole tala ne mua,
ni bole sike na hunu,
bara i hamule valai i manga a hini mu masia i sike na hunu.”
E Rei Ge Bole a Murine Iudas?
12 *Muri ri pea a lolo e Oliva,
ri hamule lakea o Ierusalem.
A lolo e Oliva i tabukoi o Ierusalem,
a maravana a kilomita i taku.
13 *Na tahuna ri bele o Ierusalem,
ri lakea na ruma ri made vona,
ri rike polomeli.
E huriki ri bele vonga ra nga:
e Petrus,
e Ioanes,
e Iakop e Andreas;
e Pilip rua e Tomas;
e Bartolemeus rua e Mateo;
e Iakop tune Alpius,
e Simon a tara ne huriki a Silot;
e Iudas tune Iakop.
14 Ri tahoka a niluhoi i taku.
Ri vapopo vakaroro ri vasileki.
E huriki a ngatavine,
e Maria e kinane Isu,
e huriki e tarine Isu,
ria ranga ri bele,
ri vasileki turane ria.
15 Na tahuna iea e huriki ri luhoi torea e Isu ri ala 120.
Ngane e Petrus i pesi rike na matane ria,
i ta maea,
16 *“Mua o huriki a turagu,
i bele muholi pali a ngava ni here puru hosi na hinere.
A ngava iea a Hanu Kiripiripi i ta polo ne Davit,
i vakalongo muga ne Iudas,
ra bakovi i vakasiri a dala ne huriki a bakovi ri lakavua e Isu.
17 Re Iudas,
a turane hita hosi,
ni vulaki ge leho turane hita.”
18 *Rira,
na tahuna e Iudas i bole a moni na naro hale vona,
i konea a hania.
I vonga i boru mapasiri,
i mapoda a kavutuna,
i mahali tala a tamudina.
19 E huriki lobo o Ierusalem ri longoa a velengana,
lakea ri galea na nitane ria a hania iea,
e Akeldama.
I manga ‘a hania na dara’.
20 *Muri e Petrus i ta maea,
“I bele mavonga,
a vuhuna a ngava ni here puru hosi na puhu na Linge i maea,
‘Ge ngeki a ruma vona,
i uka tara viri ge made vona.’
Ni here puru tabu i ta maea,
‘A viri tara ge bole a murina.’
21 I mavonga,
i kamumu hateka si gi vulakia tara bakovi,
ra i turane hita na parava vakaroro na tahuna e Isu i laho turane hita,
22 *i vakatubu na tahuna e Ioanes i vahiloloa,
i valai i harena na tahuna e Isu ni bole sike na hunu.
Si gi vulakia tara bakovi i matai a maka naro nga i bele,
ge turane hita,
ge vakalongo a ngava ne Isu i mahuri mule na matenga.”
23 Lakea ri vakapesi a bakovi ala rua:
e Iosep Barsabas,
a rana tara e Iustus,
turane Matias.
24 Muri ri vasileki,
“Bakovi Dagi,
o lohoka vona a hatene huriki lobo.
O vakasiri mia vona e rei ne rua o ngarua,
25 ge ratea a leho na apostolo,
ge bole a muri ne Iudas,
ra viri i pe a leho vona,
i bole a mapana.”
26 Muri ri voro a satu,
lakea e Matias i mulangi.
Ri bole dilia ge leho turane huriki a apostolo ala ravulu a polona i taku.