\id 1PE \h 1 Pedro \toc2 1 Pedro \mt1 Tson Navejndyee Na Tji Pedro \c 1 \s Incyaa Pedro tsꞌon ꞌnaanꞌ jon ndëë nnꞌan na jndë tycya \p \v 1 Ja Pedro macüji tsonva. Condui ja tsꞌan na iꞌua Jesucristo tsꞌian nnön na jöncya jñꞌoon naya ꞌnaanꞌ jon ndëë nnꞌan. ꞌOꞌ ntyjë na vantyja nꞌonhoꞌ jon, matscüenön tsonvahin ndëëhoꞌ xengꞌe juu naviꞌ na coquenonhoꞌ na jndë tycyahoꞌ, ndoꞌ naneinhin veꞌ mꞌan yahoꞌ ndyuaa Ponto, yo Galacia, yo Capadocia, ndoꞌ Asia yo ninꞌBitinia. \v 2 Vitjachen na tquen tyëëhë Tyoꞌtsꞌon tsoñꞌen, ndoꞌ ntyjii ya jon na ncüji jon ꞌoꞌ na nnduihoꞌ cüentaaꞌ nquii jon. Ndoꞌ neinhin, majndë conduihoꞌ cüentaaꞌ jon ngꞌe nquii Espíritu Santo ityiiꞌ jon ꞌoꞌ ntyja ꞌnaanꞌ Tyoꞌtsꞌon. Condui na nndaꞌ chaꞌ nnanꞌquindëhoꞌ tonnon jon ndoꞌ na ntsintjuꞌ jon ñuaanhoꞌ yo neoonꞌ Jesucristo. Macꞌan nnon Tyoꞌtsꞌon na juu naya na tsixuan jon, jndyentyichenhanꞌ cyꞌonhoꞌ cüenta yo ninꞌjuu na conduihin na tajñuaanꞌ tsꞌonhin. \s Ncya ya Tyoꞌtsꞌon juu na contyja nnꞌönhin vandoꞌhanꞌ \p \v 3 Nquii Tyoꞌtsꞌon na conduihin tye nquii Jesucristo na juu jon conduihin na ityeꞌntjon jon jaa, cüitꞌmaanꞌhin. Juu jon taquintyja na tꞌman vaa na ntyꞌia ro jaa ntyjii jon. Ntyja ꞌnaanꞌ juuhanꞌ, joꞌ jndë tyincyaa jon na tui xco jaa ngꞌe na tandoꞌ xco Jesucristo. Ngꞌe na nndaꞌ, joꞌ juu na contyja nnꞌön, mantyi vandoꞌhanꞌ. \v 4 Na ntyja ꞌnaanꞌ juuhanꞌ ninncyaa Tyoꞌtsꞌon na nndahoꞌ ncüii naya na vavehanꞌ quiñoonꞌndue na ncyꞌonhoꞌ cüentahanꞌ. Juu na ntsiquindaaꞌ jonhoꞌ, jeꞌquintycüiihanꞌ, min jeꞌcüiꞌndaaꞌhanꞌ, ndoꞌ juu na nanncooꞌ tsixuanhanꞌ, manchaꞌ xjen mꞌanhanꞌ. \v 5 Ngꞌe na vantyja nꞌonhoꞌ Jesucristo, joꞌ ivantyjeeꞌ Tyoꞌtsꞌonhoꞌ yo maninjuu najndei na conduihin. Ngꞌe na ntyja ꞌnaanꞌhanꞌ, ntsinꞌman jon ñuaanhoꞌ. Ntsiꞌman jon na ntsꞌaa jonhanꞌ juu xuee na matsꞌia. \p \v 6 Mangꞌe na ngiohoꞌ na ntsinꞌman jon ñuaanhoꞌ, joꞌ tꞌman incyaahanꞌ na neinhoꞌ, min na chjo ro xjen itsichjooꞌhanꞌ nꞌonhoꞌ ngꞌe jndye nnon naviꞌ na coquenonhoꞌ. \v 7 Ee juu na vantyja nꞌonhoꞌ itsijonhanꞌ juuhanꞌ chaꞌxjen tsꞌian na condui yo sꞌon ijan. Conanꞌco nnꞌan juuhanꞌ quityquiiꞌ chon na jminꞌntyichen chaꞌ ntsixuan sꞌonꞌñeen na njonntyichenhanꞌ. Majoꞌ juu na covantyja nnꞌön Cristo xjen na covenön ꞌnan na ninꞌquenhanꞌ xjen ꞌnaanꞌhanꞌ jaa, juuhanꞌ njonntyichen tsixuanhanꞌ na tonnon Tyoꞌtsꞌon, chichen sꞌon ijan, ꞌnan na ndëë ntycüii na njonhanꞌ. Juu na vantyja nꞌonhoꞌ Jesús, vi na jndë covityincyooꞌ na ya jnduiꞌ ꞌoꞌ quityquiiꞌ joo naviꞌminꞌ na coquenonhoꞌ, juu xjen na ncüjeeꞌ ntcüeꞌ Jesucristo, ntsiquinjon Tyoꞌtsꞌon ꞌoꞌ, ndoꞌ ntsꞌaa jon na nnanꞌjonhoꞌ yo Cristo naijon conditꞌmaanꞌ jon. \p \v 8 Nquii Jesucristo, min na tacojntyꞌia ndëëhoꞌhin, majoꞌ conanꞌviꞌngiohoꞌhin. Ndoꞌ min nanein tacojntyꞌiahoꞌhin, mancüiixjen covantyja nꞌonhoꞌhin, ndoꞌ juuhanꞌ incyaahanꞌ na nein jndyihoꞌ ngiohoꞌ ata ndicüijndaꞌ nchu vaa nquii jñꞌoon na nnduehoꞌ na ntyja ꞌnaanꞌ joꞌ ntsiꞌmanhanꞌ na taquintyja na njon jndyihin ngiohoꞌ, ndoꞌ nditꞌmaanꞌhin ntyja ꞌnaanꞌhanꞌ. \v 9 Ee ngꞌe juu na vantyja nꞌonhoꞌ Jesucristo, joꞌ na coyꞌonhoꞌ cüenta juu na itsinꞌman Tyoꞌtsꞌon ñuaanhoꞌ. \p \v 10 Ntyja ꞌnaanꞌ juu jñꞌoonꞌñeen, nque nnꞌan na tomꞌan ndyu na toxenꞌchen na toninncyahan jñꞌoonꞌ jon ntyja ꞌnaan ꞌnan na nguaa, tojooꞌ yantyi nꞌonhan na ninꞌcüaaꞌ nꞌonhinhanꞌ ntyja ꞌnaanꞌhanꞌ. Chen jndyi tonanꞌjnꞌaanhan jñꞌoonꞌ Tyoꞌtsꞌon na jndui na nincüaaꞌ nꞌonhan ntyja ꞌnaanꞌ juu na itsinꞌman jon ñuaan nnꞌan. \v 11 Nquii Espíritu na condui nquii Cristo na itscüenon jonhin quiiꞌ nnꞌön, tomꞌaan jon yo nanꞌñeen. Mantyi totsiꞌman jon ndëëhan joo naviꞌ tꞌman na ngenon Cristo, ndoꞌ mantyi yo ntyja ꞌnaanꞌ na ndëcya nditꞌmaanꞌ nquii jon. Tonanꞌchon jndyi nanꞌñeen na ninꞌcüaaꞌ ya nꞌonhan nin tsꞌan tsiꞌmanhanꞌ na ntsixuan juu tsꞌianꞌñeen ndoꞌ cüan na nnduihanꞌ. \v 12 Majoꞌ totsiꞌman Tyoꞌtsꞌon ndëë nanꞌñeen na joo jñꞌoon na toninncyahan, tyíꞌvacüjaꞌhanꞌ joohan. Joo jñꞌoonꞌñeen na jndë macondyehoꞌhanꞌ nanein, macüenta nquehoꞌhanꞌ. Nque nnꞌan na jndë tonanꞌneinhan jñꞌoon naya ntyja ꞌnaanꞌ Cristo ndëëhoꞌ, tonanꞌquindyihan ꞌoꞌ ntyja ꞌnaan jñꞌoonminꞌ yo maninjuu najndei na tsixuan nquii Espíritu Santo. Joo jñꞌoonminꞌ, nque ángeles ninꞌcüaaꞌ jndyi nꞌonhinhanꞌ. \s Iqueenꞌ Tyoꞌtsꞌon jaa na quinanꞌxuan ñuan nquiiꞌ na tonnon jon \p \v 13 Ngꞌe na nndaꞌ vaa ntyja ꞌnaan jñꞌoonminꞌ, quitquen xoncüehoꞌ ꞌnan na mꞌaanꞌ nꞌonhoꞌ yo na jndaꞌ nquenhoꞌ. Juu na cotsamꞌanhoꞌ, quitquen nquehoꞌ xjenhanꞌ. Xiaꞌntyi cꞌonhoꞌ na cüendooꞌ tcüihoꞌ juu naya na ntsiquindaaꞌ Tyoꞌtsꞌon ꞌoꞌ xjen na nndyo nndaꞌ Jesucristo. \v 14 Ndoꞌ ngꞌe na conduihoꞌ ntsinda Tyoꞌtsꞌon, joꞌ quitaꞌngueeꞌhoꞌ na tonnon jon. Min tyiꞌnanꞌjonhoꞌ yo joo ꞌnan tyia na tonanꞌjontohoꞌ yohanꞌ juu xjen na tyíꞌquitajnꞌaanhoꞌhin. \v 15 Nquii Tyoꞌtsꞌon na tqueenꞌ jon ꞌoꞌ, conduihin ñuan nquiiꞌ. Mangꞌe na nndaꞌ, tsoñꞌen ntyja na cotsamꞌanhoꞌ, mantyi ꞌoꞌ quinanꞌxuanhoꞌ ñuan nquiiꞌ na tonnon jon. \v 16 Ee jndui jñꞌoonꞌ jon na itsohanꞌ: “Ngꞌe na condui Ja ñuan nquiiꞌ, mantyi ꞌoꞌ quinanꞌxuanhoꞌhanꞌ.” \p \v 17 Ya na conanꞌneinhoꞌ nnon Tyoꞌtsꞌon, conduehoꞌ tyehoꞌhin ndoꞌ na ngiohoꞌ na cüejon ntcoꞌxen jon ncüii cüii tsꞌan nchu vaa na itsꞌaa juu. Mangꞌe na nndaꞌ, xuee na tonnonchen na veꞌ mꞌan yahoꞌ ncüii cüii tyuaa naijon jndë tycyahoꞌ, joꞌ cꞌonhoꞌ na cüincyaaꞌ nꞌonhoꞌ jon. \v 18 Ee mangiohoꞌ na nque ndochihoꞌ tonduehan jñꞌoon nchu vaa ꞌnan na quintꞌahoꞌ chaꞌ ntsiquindyaa Tyoꞌtsꞌon ñuaanhoꞌ. Majoꞌ juu jñꞌoonꞌñeen tyiꞌcüijntꞌue jonhanꞌ, veꞌ jnꞌaanhanꞌ. Ee mangio yahoꞌ na chito sinꞌman jon ñuaanhoꞌ yo sꞌon ijan oo yo sꞌon xuee, joohanꞌ contycüii na njonhanꞌ. \v 19 Sinꞌman jon ñuaanhoꞌ yo juu neoonꞌ nquii Cristo, na taquintyja na njon conduihanꞌ. Nquii jon conduihin Quitsman Chjo na jnanꞌcueeꞌ nnꞌanhin na minꞌncüii jnaanꞌ jon, minꞌncüii nnon taꞌnan itsꞌaahanꞌ na tyiꞌntjuꞌ conduihin. \v 20 Vitjachen na ntquen Tyoꞌtsꞌon tsonnangue, ndoꞌ jndë tꞌua jon tsꞌian nnon Cristo na ngenon jon na nndaꞌ. Majoꞌ ata ndyumin na matsꞌia, tyincyaa jon na jndyo Cristo na ntejndei jon ꞌoꞌ. \v 21 Naneinhin ntyja ꞌnaanꞌ jon na vantyja nꞌonhoꞌ Tyoꞌtsꞌon. Nquiintyi jon tyincyaa jon na vandoꞌ xco Cristo vi na jndë tueꞌ jon ndoꞌ sijndaꞌ Tyoꞌtsꞌon na cüitꞌmaanꞌhin. Ndoꞌ ngꞌe na sꞌaa jon na nndaꞌ, ninnquiiꞌchen ntyja ꞌnaanꞌ Cristo mꞌanhoꞌ na vantyja nꞌonhoꞌ Tyoꞌtsꞌon ndoꞌ na tꞌman qui nꞌonhoꞌhin. \p \v 22 Nein na coꞌndyiihoꞌ na juu jñꞌoon na mayuuꞌ coꞌxenhanꞌ ꞌoꞌ, juuhanꞌ jndë tquenhanꞌ na ntjuꞌ ñuaanhoꞌ na conanꞌvengiohoꞌ ntyjehoꞌ na vantyja nꞌonhan Jesucristo, joꞌ cjooꞌ yaya nꞌonhoꞌ na cüivengiohoꞌhin yo na xoncüii nꞌonhoꞌ. \v 23 Ee chito jndë tui xcohoꞌ ntyja ꞌnaanꞌ ncüii nnon tsjan na contycüiihanꞌ. ꞌOꞌ ntyja ꞌnaanꞌ juu jñꞌoonꞌ Tyoꞌtsꞌon na vandoꞌhanꞌ na jeꞌquintycüii na mꞌaanhanꞌ, ntyja ꞌnaanꞌ juuhanꞌ jndë tui xcohoꞌ. \v 24 Chaꞌna jñꞌoonꞌ jon na tji Isaías na itsohanꞌ: \q Itsijonhanꞌ ncüii cüii tsꞌan chaꞌvijon tsco jndëë. \q Ndoꞌ tsoñꞌen ntyja ꞌnaanhan na njon conduihanꞌ itsijonhanꞌ juuhanꞌ chaꞌvijon ntjaaꞌ jndëë, \q ee vi na jndë tꞌuaa tsco jndëë, \q cocyaa ntjaaꞌ ꞌnaanhanꞌ. \q \v 25 Majoꞌ juu jñꞌoonꞌ Tyoꞌtsꞌon, \q tyiꞌjon quintycüi mꞌaanhanꞌ. \p Ndöꞌ vaa itsiquindyi jñꞌoon na tji Isaías. Ndoꞌ majuuntyi jñꞌoonꞌñeen, conduihanꞌ jñꞌoon na toninncya nnꞌan ndëëhoꞌ na ntyja ꞌnaanꞌhanꞌ na itsinꞌman Tyoꞌtsꞌon ñuaanhoꞌ. \c 2 \p \v 1 Mangꞌe joꞌ, tsoñꞌen nnon natyia yo ninꞌtsoñꞌen na itsiviꞌnnꞌanhanꞌ nnꞌan, quinanꞌtcyaaꞌhoꞌ ntyja ꞌnaanhanꞌ. Mꞌan nnꞌan na contꞌa nquehan na conanꞌtꞌmaanꞌhan Tyoꞌtsꞌon chaꞌ quitscuꞌhanꞌ ncüii nnon natyia na contꞌahan, majoꞌ ꞌoꞌ tavintꞌahoꞌhanꞌ. Tyiꞌnanꞌtëëꞌ nꞌonhoꞌ joo nnꞌan na min ꞌnaan, ndoꞌ ꞌoꞌ na taꞌnanhanꞌ. Quitsacüentyjeeꞌhoꞌ na conanꞌneinhoꞌ jñꞌoonviꞌ nacjo nnꞌan. \v 2 Yoꞌndaa na xe jnda xco na tuihin, ninnquiiꞌchen ndaatsu ndyee yoꞌñeen na ninꞌquiteiꞌ joo. Juu jñꞌoonꞌ Tyoꞌtsꞌon conduihanꞌ ndaatsu ninnquiiꞌ. Quitquen yantyihoꞌ na cüijntꞌuehoꞌ juu jñꞌoonꞌñeen chaꞌ ngaquehoꞌ ntyja na itsinꞌman jon ñuaanhoꞌ. \v 3 Quintꞌahoꞌ na nndaꞌ xe na aa mayuuꞌ cotquen yahoꞌ cüenta na nquii jon na conduihin na ityeꞌntjon jon ꞌoꞌ, tꞌman vaa na ntyꞌia rohoꞌ nchjii jon. \s Condui Cristo tsjöꞌ na vandoꞌ \p \v 4 Ninnquiiꞌchen quinanꞌndyooꞌhoꞌ na mꞌaan Jesucristo, nquii jon na conduihin tsjöꞌ na vandoꞌ. Nque nnꞌan tjiꞌhan cüenta na tyíꞌcüijntꞌue jon, majoꞌ nquii Tyoꞌtsꞌon tji jonhin na conduihin tsjöꞌ na njon jndyi. \v 5 Mantyi nquehoꞌ na vantyja nꞌonhoꞌ Cristo, conduihoꞌ ntjöꞌ na cotaꞌndoꞌ. Ngꞌe joꞌ ncyahoꞌ na nquii Tyoꞌtsꞌon ninjntꞌue jon ꞌoꞌ na ntsia jon vꞌaa naijon na ncꞌoon nquii jon. Quityquiiꞌhanꞌ iꞌua jon tsꞌian ndëëhoꞌ na conduihoꞌ ntyee na jiꞌua nanꞌxuanhan na xiaꞌntyi nnon jon na cotyeꞌntjonhoꞌ, yo na ninncyahoꞌ na nquii Espíritu Santo ntcoꞌxen jon ꞌoꞌ yo ntyja ꞌnaanꞌ na cotsamꞌanhoꞌ. Joo tsꞌianminꞌ na caveeꞌ ntyjii Tyoꞌtsꞌon ngꞌe Jesucristo. \v 6 Mangꞌe joꞌ nacjooꞌ jñꞌoonꞌ Tyoꞌtsꞌon na tji Isaías vaa jñꞌoon na itsiquindyihanꞌ: \q Quitquenhoꞌ cüenta, quityquiiꞌ juu tsjoon Sión, joꞌ maquën tsjöꞌ naijon na tjiꞌhanꞌ nqui tsjaanꞌ vꞌaa, ncö tji tsjöꞌñeen ntyja njan, ndoꞌ njon jndyi conduihin. \q Minninchen tsꞌan na vantyja tsꞌon juu jon, tyiꞌjeꞌquitsꞌaahanꞌ na ncüjiꞌ tsanꞌñeen cüenta na veꞌ jnꞌaanhanꞌ. \p \v 7 Ntyja ꞌnaan ꞌoꞌ na vantyja nꞌonhoꞌ, nquii jon na conduihin tsjöꞌvaꞌ, njon jndyihin ngiohoꞌ. Majoꞌ ntyja ꞌnaan joo nnꞌan na tyiꞌcovantyja nꞌon, itsiquindëhanꞌ ncüiichen jñꞌoonꞌ Tyoꞌtsꞌon na itsohan: \q Nque nnꞌan na conanꞌva vꞌaa, tyqueꞌhan tsjöꞌ, jnduehan na tyiꞌjeꞌcüijntꞌuehanꞌ. \q Majoꞌ nquii Tyoꞌtsꞌon tquen jon na conduihin tsjöꞌ nqui tsjaanꞌ vꞌaa. \m \v 8 Ndoꞌ mantyi vaa ncüiichen jñꞌoon ntyja ꞌnaanꞌ joꞌ na itsohanꞌ: \q Juu tsjöꞌvahin conduihin ncüii na ntyja ꞌnaanꞌ jon itscyaahanꞌ nnꞌan. \m Ee jnaanꞌ na tyíꞌcantyja nꞌonhan nchu vaa na itso juu jñꞌoonꞌ Tyoꞌtsꞌon ntyja ꞌnaanꞌ nquii jon na conduihin juu tsjöꞌñeen, joꞌ na itscyaahanꞌhin. Nndaꞌ vaa na sijndaꞌ jon na ntquenonhan ngꞌe tajnanꞌquindëhan chaꞌxjen juu jñꞌoon na tquen jon. \s Nnꞌan na condui cüentaaꞌ Tyoꞌtsꞌon \p \v 9 Majoꞌ ꞌoꞌ conduihoꞌ nnꞌan na icüji Tyoꞌtsꞌon cüentaaꞌ nquii jon. Ndoꞌ mantyi conduihoꞌ ncüii tmaanꞌ ntyee na cotyentjon nnon nquii jon na taquintyja na conintquehin, joꞌ nquii Cristo. Ndoꞌ mantyi conduihoꞌ ncüii tmaanꞌ nnꞌan na iquen Tyoꞌtsꞌon na nanꞌxuan ñuan nquiiꞌ. Conduihoꞌ nnꞌan na sijnda jon cüentaaꞌ nquii jon. Nquii jon na tqueenꞌ jon ꞌoꞌ, nanꞌminꞌ itsꞌaa jon yohoꞌ chaꞌ quitjiꞌ jndyoyuhoꞌ ndëë nnꞌan na taquintyja nquii jon tꞌman conduihin. Nquii jon tqueenꞌ jon ꞌoꞌ na jnduiꞌhoꞌ ntyja ꞌnaanꞌ najaan na tsixuan jnan ndoꞌ na saqueꞌhoꞌ ntyja ꞌnaanꞌ juu naxuee na condui nquii Cristo na taxjen ya jndyi conduihanꞌ. \v 10 Ndyu na toxenꞌchen tyíꞌconduihoꞌ nnꞌan cüentaaꞌ Tyoꞌtsꞌon, majoꞌ naneinhin manquehoꞌ conduihoꞌ nnꞌan cüentaaꞌ nquii jon. Toxenꞌchen tyíꞌquindiohoꞌ na ntyꞌia rohoꞌ ntyjii jon, majoꞌ naneinhin covaaꞌ nꞌonhoꞌ na nndaꞌ vaa nchjii jon yo ꞌoꞌ. \s Ndö vaa cꞌonhoꞌ tondëë nnꞌan na tyiꞌcꞌonhan nacje ꞌnaanꞌ Tyoꞌtsꞌon \p \v 11 ꞌOꞌ ntyjë na vantyja nꞌonhoꞌ Cristo na viꞌntyji ꞌoꞌ, conduihoꞌ nnꞌan na veꞌ mꞌan yahoꞌ ndyuaaminꞌ naijon jndë tcyahoꞌ. Matsꞌa tyꞌohoꞌ na taninncyahoꞌ xjen ndëë joo ꞌnan na tyia na ntꞌue jndyi nꞌon nnꞌan. \v 12 Juu na cotsamꞌanhoꞌ quiiꞌ ntꞌan nnꞌan na tyiꞌcꞌonhan nacje ꞌnaanꞌ Tyoꞌtsꞌon, quintꞌahoꞌ chaꞌxjen na chuhanꞌ chaꞌ min na aa conanꞌneinhan jñꞌoon tsanꞌ ntyja ꞌnaanhoꞌ, joꞌ mancüiixjen ntquenhan cüenta na cotsamꞌanhoꞌ ntyja ꞌnaanꞌ na ityeꞌntjon Tyoꞌtsꞌon, ndoꞌ na nndaꞌ, juu xuee na ntcoꞌxen jon nnꞌan ntyja ꞌnaanꞌ jnanhan, nnanꞌtꞌmaanꞌ nanꞌñeen jon xengꞌe na jndyoyu na totsamꞌanhoꞌ quiiꞌ ntꞌanhan. \s Quitjueꞌcje jaa ndëë nanmꞌannꞌian \p \v 13 Ngꞌe na conduihoꞌ cüentaaꞌ ta Jesús, joꞌ quitjueꞌcjehoꞌ ndëë tsoñꞌen nnꞌan na conduihan nanmꞌannꞌian. Navejndyee nnon nquii tsanmꞌaantsꞌian tꞌman, ee nquii jon taquintyja tꞌman conduihin na icoꞌxen jon. \v 14 Ndoꞌ mantyi nque nnꞌan na coꞌontyja na iꞌua jon tsꞌian ndëëhan na mantyi conduihan nanmꞌannꞌian yo jon. Ee iꞌua jon tsꞌian ndëëhan na quitꞌueviꞌhan joo nnꞌan na tyiꞌya contꞌa, ndoꞌ nnanꞌneinhan jñꞌoon ya ntyja ꞌnaan nnꞌan na cotsamꞌanhan chaꞌxjen na chuhanꞌ. \v 15 Ee Tyoꞌtsꞌon ntꞌue tsꞌon jon na quintꞌahoꞌ chaꞌxjen na chuhanꞌ chaꞌ ntyja ꞌnaanꞌhanꞌ ntsichenhanꞌ jndyue nnꞌan na tyiꞌjndaꞌ nquen na veꞌ jñꞌoon tsanꞌ na conduehan cjohoꞌ. \p \v 16 ꞌOꞌ conduihoꞌ nnꞌan na jndë siquindyaa Tyoꞌtsꞌon quityquiiꞌ juu ꞌnan natyia. Majoꞌ tyiꞌntjiꞌhoꞌ cüenta na sꞌaa jon na nndaꞌ chaꞌ nninncyaahanꞌ na vanaan na nntꞌachenhoꞌ ꞌnan natyia. Quintꞌahoꞌ tsoñꞌen ꞌnan na ntsiꞌmanhanꞌ na conduihoꞌ nnꞌan na cotyentjontyenhoꞌ nnon jon. \v 17 Ncüii cüii tsꞌan, quinanꞌmanhoꞌ nnon juu na njonhin ngiohoꞌ. Quinanꞌvengiohoꞌ nnꞌan na vantyja nꞌon Jesús. Ninnquiiꞌchen quinanꞌtꞌmaanꞌhoꞌ Tyoꞌtsꞌon na quitsincyaaꞌhanꞌ nꞌonhoꞌ na nntꞌahoꞌ ꞌnan na tyiꞌquichuhanꞌ ntyjii jon. Ndoꞌ mantyi nquii ta tsanmꞌaantsꞌian tꞌman, quintꞌahoꞌ na njonhin. \s Juu naviꞌ na tenon Cristo, vaa na itsiꞌmanhanꞌ ndëë \p \v 18 ꞌOꞌ na conduihoꞌ moso ndëë patrón ꞌnaanhoꞌ, yo na xoncüeeꞌ nꞌonhoꞌ quitjueꞌcjehoꞌ ndëëhan na quitaꞌngueeꞌhoꞌ tsoñꞌen ꞌnan na conduehan. Chito xiaꞌntyi na quintꞌahoꞌ na nndaꞌ ndëë joo nanꞌñeen na ya nnꞌanhan ndoꞌ na viꞌngiohan ꞌoꞌ, majoꞌntyi quintꞌahoꞌhanꞌ yo joo patrón na tëëꞌ nꞌonhan ꞌoꞌ. \v 19 Ee nquii Tyoꞌtsꞌon caveeꞌ nchjii jon xe na aa nan tsꞌan joo naviꞌ na iquenon juu min na tyiꞌyuuꞌ na sitjahin ngꞌe na ntyjii juu na nquii jon mꞌaan jon yohin. \v 20 Ee tyiꞌtsitꞌmaanꞌhanꞌ Tyoꞌtsꞌon xe na aa conanꞌquii nꞌonhoꞌ na cotjaꞌ patrón ꞌoꞌ jnaanꞌ na jnanꞌtjahoꞌ ndëëhan. Majoꞌ xe na aa cotjaꞌhan ꞌoꞌ ngꞌe ncüii nnon ꞌnan naya na contꞌahoꞌ, ndoꞌ na conanꞌquii nꞌonhoꞌ na nndaꞌ coquenonhoꞌ, juu nanꞌñeen na contꞌahoꞌ caveeꞌ ntyjii jonhanꞌ. \v 21 Ee nquehoꞌ na tqueenꞌ jon ꞌoꞌ, sijndaꞌ jon na ntquenonhoꞌ naviꞌminꞌ, ngꞌe mantyi nquii Cristo tquenon jon naviꞌ ntyja ꞌnaanhoꞌ. Ndoꞌ na nndaꞌ tjon jon, itsiꞌmanhanꞌ na cotsananꞌjonhoꞌ ntyja ꞌnaanꞌ na totsꞌaa nquii jon. \v 22 Juu jon minꞌncüii tacotsitjahin min tacotsinin jon jñꞌoon quintu. \v 23 Ee juu xjen ya na tonanꞌcüejnaanꞌ nnꞌanhin, tajñꞌoon jnaanꞌ sintcüeꞌ jon. Min juu xjen na tontꞌaviꞌ nnꞌanhin, taꞌnan tso jon na ndyionhan nnon jon. Jntyꞌii jon na nquii Tyoꞌtsꞌon na icoꞌxen jon tsoñꞌen chaꞌxjen na chuhanꞌ, quitsijndaꞌ jon tsoñꞌen ntyja ꞌnaanꞌ juu chaꞌxjen na ntꞌue tsꞌon nquii jon. \v 24 Manquiintyi Cristo, tëchu jon jnan jaa juu xjen na tꞌion nnꞌan jon nnon tsojnꞌaan, chaꞌ nndëë nnanꞌxuan jaa ntꞌoo ntyja ꞌnaanꞌhanꞌ ndoꞌ ngotsamꞌan ntyja ꞌnaanꞌ na jndyoyu condui nquii Tyoꞌtsꞌon. Cüii cüiii nnon joo na tqueeꞌ Cristo, yo joohanꞌ na itsinꞌman Tyoꞌtsꞌon ñuaanhoꞌ. \v 25 Ee ntyja ꞌnaan nquehoꞌ, totsijonhanꞌ ꞌoꞌ chaꞌvijon quinman na ꞌio ꞌio cocya oꞌ, majoꞌ naneinhin jndë ntcüeꞌhoꞌ yo nquii Cristo. Conduihin na ivantyjeeꞌ jon ꞌoꞌ ndoꞌ icꞌiooꞌ jon ndëëhoꞌ chaꞌ na itsꞌaa tsꞌan na ivantyjeeꞌ quinman. \c 3 \s Ndö vaa na icanhanꞌ na cꞌon nnꞌan na jndë tonco \p \v 1-2 Mantyi ꞌoꞌ nanntcu na mꞌan sꞌahoꞌ, quitaꞌngueꞌhoꞌ ꞌnan na nꞌonhan jñꞌoonꞌ Tyoꞌtsꞌon, xjen na cotquenhan cüenta nchu vaa na cotsamꞌanhoꞌ tondëëhan na conanꞌtꞌmaanꞌhoꞌ jon yo na xoncüeeꞌ nꞌonhoꞌ, joꞌ ntcüeꞌ nꞌonhan ndoꞌ ngantyja nꞌonhan ta Jesús min na tatyꞌoo contꞌahoꞌhin. \v 3 Chito xiaꞌntyi yo ꞌnan na cojntꞌue nquehoꞌ na cüinancooꞌhoꞌ ndëëhan, chaꞌ ntyja ꞌnaanꞌ na conanꞌtycüiꞌhoꞌ sonquenhoꞌ, oo na conanꞌtycüiꞌhoꞌ yo ꞌnan na jndë yo sꞌon ijan, oo na cocüehoꞌ ndiaa na ya jndyi. \v 4 Chuhanꞌ na quityquiiꞌ nꞌonhoꞌ quinanꞌxuanhoꞌ ncüii nnon na tyiꞌcovityincyooꞌhanꞌ ndëë nnꞌan. Juu nanꞌñeen na cꞌonhoꞌ na nancooꞌhoꞌ na tonnon Tyoꞌtsꞌon na vengiohoꞌ nnꞌan, min tyiꞌnanꞌtëëꞌ nꞌonhoꞌhin, ya na nndaꞌ vaa na conduihoꞌ na nancooꞌ ꞌoꞌ, juuhanꞌ njon jndyihanꞌ ntyjii jon. \v 5 Ndyu na toxenꞌchen nque nanntcu na yo jiꞌua tonanꞌxuanhin na tonanꞌqui nꞌonhan jon, manndaꞌ vaa tontꞌahan na sinancooꞌhanꞌhin. Totjueꞌcjehan ndëë nnonhan. \v 6 Nquii Sara, manndaꞌ vaa totsꞌaa jon. Tovangueeꞌ jon jñꞌoon na totso Abraham. Totso juu ntyja ꞌnaanꞌ jon na conduihin na tocoꞌxen jonhin. Ndoꞌ naneinhin ꞌoꞌ nanntcu, conduihin chaꞌvijon ndyeehoꞌ xe na aa contꞌahoꞌ ꞌnan ya min tyiꞌcꞌonhoꞌ na ncyaaꞌ nꞌonhoꞌ. \p \v 7 Ndoꞌ mantyi ꞌoꞌ nannon na mꞌan ntcuhoꞌ, manincüajon quitsamꞌanhoꞌ yohan yo na jndaꞌ nquenhoꞌ. Cꞌoonꞌ nꞌonhoꞌ ntyja ꞌnaanhan ngꞌe na tyiꞌjndëchenhan chaꞌna nquehoꞌ, ngꞌe joꞌ cüinjonhin ngiohoꞌ chaꞌ tyiꞌntscuꞌhanꞌ na nndyii Tyoꞌtsꞌon jñꞌoon na conanꞌneinhoꞌ nnon jon. Ee cüejon incyaa jon naya na cotaꞌndoꞌ xcohoꞌ ntyja ꞌnaanꞌ jon chaꞌxjen incyaa jon na conanꞌxuanhinhanꞌ. \s Coquenon nnꞌan naviꞌ ngꞌe na contꞌahin ꞌnan ya \p \v 8 Jñꞌoon na matsꞌia na matsjö ndëëhoꞌ ntyja ꞌnaanꞌ jñꞌoonmin, nque ntyjehoꞌ na vantyja nꞌon Jesús na viꞌ coquenonhan, tsoñꞌenhoꞌ cꞌonhoꞌ na ninncüii mꞌaanꞌ nꞌonhoꞌ ntyja ꞌnaan nanꞌñeen. Juu ꞌnan na coquenonhan, quintꞌahoꞌ na conduihanꞌ chaꞌvijon xu na cho nquehoꞌ. Mantyi quinanꞌvengiohoꞌhin. Cꞌonhoꞌ na conanꞌndyiaꞌ nꞌonhoꞌ ndëë nnꞌan. Min tyiꞌnanꞌsꞌahoꞌ, tyiꞌnanꞌntcuhoꞌ ndëëhan. \v 9 Natyia na contꞌa nnꞌanhoꞌ, tyiꞌnanꞌntcüeꞌhoꞌhanꞌ, min na cotjueꞌhan jñꞌoon tsanꞌ nacjohoꞌ, tyiꞌnanꞌntcüeꞌhoꞌhanꞌ. ꞌOꞌ vandyaꞌ ꞌnan quintꞌahoꞌ, quitanhoꞌ nnon Tyoꞌtsꞌon na quityio jon jnꞌaan joo nanꞌñeen. Ee joꞌ tsꞌian na tqueenꞌ jon ꞌoꞌ chaꞌ tsoñꞌen nnon na ninꞌquitsiquindaaꞌ jonhoꞌ na ndyio jon jnꞌaanhoꞌ, ncyꞌonhoꞌ cüentahanꞌ. \v 10 Ee nnon tson Salmos vaa jñꞌoon na itsohanꞌ: \q Minninchen tsꞌan na ntꞌue tsꞌon juu na ya ngamꞌaan juu, ndoꞌ na ninꞌcꞌoon juu na neiinꞌ juu, \q chuhanꞌ na quen nquii jon xjen tsa juu, \q min tyiꞌntsinin juu quintu. \q \v 11 Chuhanꞌ na cüjihin ntyja ꞌnaanꞌ ꞌnan tyia ndoꞌ quitsꞌaa juu ꞌnan ya. \q Ndoꞌ quintꞌue juu \q na cꞌoon juu na tatyiaꞌ quichu juu yo nnꞌan. Ninnquiiꞌchen nndaꞌ quitsꞌaa juu. \q \v 12 Ee nque nnꞌan na jndë tquen Tyoꞌtsꞌonhin na tajnan nanꞌxuanhan, \q iquen jon cüenta ꞌnan na coquenonhan. \q Ndoꞌ mantyi iquen jon cüenta jñꞌoon na conduehan nnon jon. \q Majoꞌ nque nnꞌan na contꞌa ꞌnantyia, vja jon nacjo nanꞌñeen yo ꞌnan na contꞌahan. \p Manndaꞌ itsiquindyi juu jñꞌoonꞌñeen. \p \v 13 Xe cojooꞌ nꞌonhoꞌ na ntꞌahoꞌ ꞌnan ya, taꞌnan tsꞌan ntsꞌaa viꞌ ꞌoꞌ. \v 14 Majoꞌ min xe na aa contꞌaviꞌ nnꞌanhoꞌ ngꞌe na contꞌahoꞌ chaꞌxjen na chuhanꞌ, majndaꞌ ityio Tyoꞌtsꞌon jnꞌaanhoꞌ. Tyiꞌndyuehoꞌ na nin ꞌnan na nndëë nntꞌa nanꞌñeen ꞌoꞌ, min tyiꞌninncyahoꞌ na ntsiquijñꞌeenhanꞌ ꞌoꞌ na nndaꞌ vaa na coquenonhoꞌ. \v 15 Majoꞌ quiiꞌ nꞌonhoꞌ quitquenhoꞌ Cristo na nquii jon conduihin na ityeꞌntjon jonhoꞌ. Ndoꞌ nque nnꞌan na cotaꞌxeeꞌhan ndëëhoꞌ ntyja ꞌnaanꞌ juu jñꞌoon na contyja tycüiiꞌ nꞌonhoꞌ Cristo, cꞌoncjehoꞌ na nnduehoꞌ jñꞌoonꞌñeen ndëëhan. \v 16 Majoꞌ quintꞌahoꞌhanꞌ yo na ndyiaꞌ nꞌonhoꞌ ndoꞌ yo na contꞌahoꞌ na njonhin min taꞌnan ncüii nnon na itsiꞌndaaꞌhanꞌ na covicjehoꞌ quiiꞌ ñuaanhoꞌ. Quintꞌahoꞌ na nndaꞌ chaꞌ nque nnꞌan na conanꞌtjaꞌhan quintu cjohoꞌ, ntscüejnaanꞌhanꞌhin na cotquenhan cüenta na cotsamꞌanhoꞌ chaꞌxjen na ntꞌue tsꞌon Cristo. \p \v 17 Ee yantyichen na njntyꞌiahoꞌ naviꞌ na ngüejnꞌanhoꞌ ngꞌe na contꞌahoꞌ ncüii nnon naya xe na aa nquii Tyoꞌtsꞌon ntꞌue tsꞌon jon na nndaꞌ, chito na ngüejnꞌanhoꞌ jnaanꞌ ncüii nnon natyia na jndë jnanꞌtjahoꞌ. \v 18 Ee mantyi nquii Cristo ninjon tquenon jon naviꞌ na tueꞌ jon ntyja ꞌnaanꞌ jnan na nanꞌxuan. Nquii jon conduihin tsꞌan na minꞌncüii jnaanꞌ. Jaa na condui nnꞌan jnan na tonnon Tyoꞌtsꞌon, tueꞌ jon ntyja njanhan. Sꞌaa jon na nndaꞌ chaꞌ ndëë ngachu jon jaa na mꞌaan Tyoꞌtsꞌon. Ntyja ꞌnaanꞌ na tsꞌanhin, jnanꞌcueeꞌ nnꞌanhin, majoꞌ ntyja ꞌnaanꞌ nquii Espíritu, joꞌ tyincyaa Tyoꞌtsꞌon na tandoꞌ xco jon. \v 19 Ndoꞌ vitjachen na tyincyaa Tyoꞌtsꞌon na tandoꞌ xco jon ntyja ꞌnaanꞌ nquii Espíritu, tja jon naijon na mꞌantyen ntꞌoo. Joꞌ tyincyaa jon jñꞌoon ndëëhan. \v 20 Joo nanꞌñeen, ndyu na toxenꞌchen, tominndooꞌchen Tyoꞌtsꞌon na ntcüeꞌ nꞌonhan jnanhan. Juu Noé, viochen xjen na totsia jon vꞌaandaa tꞌman, toninncyaa jon jñꞌoon ndëë nanꞌñeen. Xjen na siquitooꞌhanꞌ tsonnangue yo ndaa, tyiꞌjndye nnꞌan jnꞌman quiiꞌ juu naviꞌñeen, ninnenhan. \v 21 Juu ndaaꞌñeen vatꞌuiihanꞌ juuhanꞌ yo ndaa na contꞌë, na ntyja ꞌnaanꞌ joꞌ naneinhin itsinꞌman Tyoꞌtsꞌon ñuan njanhan. Chito ngꞌe na itsintjuꞌhanꞌ juu na tyꞌa na chuuꞌ siꞌtsꞌo njanhan, majoꞌ ntyja ꞌnaanꞌ juuhanꞌ mantyi incyaahanꞌ na ya covicjëhë quiiꞌ ñuan njanhan na tonnon Tyoꞌtsꞌon. Ntyja ꞌnaanꞌ na contꞌëhöꞌ itsinꞌman jon ꞌoꞌ ngꞌe na tyincyaa jon na vandoꞌ xco Jesucristo. \v 22 Naneinhin jndë tjantcüeꞌ jon quiñoonꞌndue. Joꞌ mꞌaan jon ngiaaꞌ Tyoꞌtsꞌon tontyjaya naijon nque ángeles yo ninꞌnque na conintque ndëë ángeles tyia, yo ninꞌtsoñꞌen na cotoxenhin joꞌ, cotjueꞌcjehan nnon nquii jon. \c 4 \s Xiaꞌntyi chaꞌxjen na itsiquindaaꞌ Tyoꞌtsꞌon jaa, joꞌ condëë na cotyeꞌntjön nnon jon \p \v 1 Ngꞌe nquii Cristo tyincyaahin na tquenon jon naviꞌ ata iscueeꞌhanꞌhin, mantyi ꞌoꞌ quintjo ya ngiohoꞌ naviꞌ na coquenonhoꞌ. Ee juu tsꞌan na jndë tquenon naviꞌ yo siꞌtsꞌo ꞌnaanꞌ, juu najndei na tsixuan jnan, jndë ntycüii na icoꞌxenhanꞌhin. \v 2 Mangꞌe na nndaꞌ, viochen xjen na mꞌanntyë, cꞌön chaꞌxjen na ntꞌue tsꞌon nquii Tyoꞌtsꞌon, chito chaꞌxjen juu ꞌnan natyia na njntꞌue jndyi nꞌon nnꞌan na cotsamꞌanhan ntyja nchu vaa na tsixuan tsonnangue. \v 3 Nque nnꞌan tsonnangue, jndye nnon min na contꞌahan na tyiꞌcuaa ya ntyjii Tyoꞌtsꞌon yohanꞌ. Mantyi ꞌoꞌ ndyu na toxenꞌchen, majndye xjen na tacahanꞌ na tonanꞌjonhoꞌ yo joo natyia na contꞌa nanꞌñeen. Chaꞌna totquenhan na ninꞌcꞌonhan yo nnꞌan na veꞌ ndöꞌ ro. Ninꞌquintꞌa jndyihan ꞌnan na tyiꞌquichuhanꞌ. Tondyehoꞌ na tovehoꞌ. Xjen na tocüaꞌ quintcu nnꞌan ndoꞌ na tove quintcuhan, tonanꞌjonhoꞌ yohan. Ndoꞌ mantyi tonanꞌtꞌmaanꞌhoꞌ ꞌnan na chito Tyoꞌtsꞌon conduihanꞌ, ndoꞌ juu nanꞌñeen, jndë tquen jon jñꞌoon na tavinduihanꞌ. \v 4 Majoꞌ naneinhin nque nanꞌñeen ndicüaaꞌ nꞌonhan ndu na cotji ntcüeꞌhoꞌ na toninncyañꞌenhoꞌ na tonanꞌjonhoꞌ yo ꞌnantyia na contꞌahan. Ndoꞌ ngꞌe na nndaꞌ contꞌahoꞌ, joꞌ na conanꞌcüejnaanꞌhan ꞌoꞌ. \v 5 Majoꞌ ngüentyja xjen na yo na ijndeiꞌhanꞌ ntjiꞌ jndyoyuhan nnon nquii jon na mꞌaan cje jon na ntcoꞌxen jon nnꞌan ntyja ꞌnaanꞌ jnanhan, min na aa cotandoꞌhan ndoꞌ min na aa jndë tjëhan. \v 6 Mangꞌe na nndaꞌ, joꞌ sijndaꞌ Tyoꞌtsꞌon na joo nnꞌan na jndë tjë, jndyehan juu jñꞌoon naya ꞌnaanꞌ jon. Sꞌaa jon na nndaꞌ chaꞌ ntyja ꞌnaanꞌ na tonanꞌxuanhan xjen na tomꞌanhan, nincüajon ntcoꞌxen jonhan chaꞌxjen na ntcoꞌxen jon minꞌcya ro tsꞌan. Nndaꞌ vaa na sꞌaa jon chaꞌ nndëë nnanꞌjonhan yo juu na incyaa jon na tsixuan tsꞌan na tyiꞌquintycüii na vandoꞌ ñuaanꞌ juu yo ntyja ꞌnaanꞌ espíritu ꞌnaanhan. \p \v 7 Jndë vavindyo na ntycüii tsoñꞌen. Mangꞌe na nndaꞌ, quinanꞌxuanhoꞌ na xoncüiiꞌ nꞌonhoꞌ, ndoꞌ na conanꞌchonhoꞌ na conanꞌneinhoꞌ nnon Tyoꞌtsꞌon. \v 8 Ndoꞌ na tꞌmanntyichen na tsoñꞌen, yo na manchaꞌchen nꞌonhoꞌ, cüivengiohoꞌ ntyjehoꞌ na vantyja nꞌonhan Cristo, ee ya na contꞌaha na nndaꞌ, itsiquinaanhanꞌ na conanꞌtꞌman nnꞌönhan ntyja ꞌnaanꞌ na conanꞌtjahin ndëëhë. \v 9 Nque ntyjëëhë na cotsque yahin na mꞌanhoꞌ, ncüii ro cüiihoꞌ quitixeeꞌhoꞌhin, yo na xoncüiiꞌ nꞌonhoꞌ ntyja ꞌnaanhan. \v 10 Minninchen nnon tsꞌian na itsiquindaaꞌ Tyoꞌtsꞌon ꞌoꞌ, cüijntꞌuehoꞌ joohanꞌ na ntejndeihanꞌ ntyjehoꞌ. Ee na ntꞌahoꞌ na nndaꞌ, ntsiꞌmanhanꞌ na cotaꞌntyjeeꞌ yahoꞌ juu naya na condui Tyoꞌtsꞌon. \v 11 Minꞌninchen tsꞌan na jndaaꞌ juu na incyaa juu jñꞌoonꞌ Tyoꞌtsꞌon ndëë nnꞌan, quitscüenon juuhanꞌ chaꞌxjen na itsinin nquii Tyoꞌtsꞌon. Ndoꞌ minꞌninchen tsꞌan na jndaaꞌ juu na ityentjon juu ndëë nnꞌan na conduihan tmaanꞌ cüentaaꞌ jon, quitsiquindë juu tsꞌianꞌñeen yo najndei na condui nquii jon. Xe na aa ntsꞌaa juu na nndaꞌ, tsoñꞌen nditꞌmaanꞌ Tyoꞌtsꞌon ntyja ꞌnaanꞌ Jesucristo. Xiaꞌntyi nquii jon vacüjaꞌhanꞌhin na manchaꞌchen xjen cüitꞌmaanꞌhin. Taquintyja nquii jon conduihin tsoñꞌen najndei. Quindui chaꞌxjen na conduë. \s Juu tsꞌan na vantyja tsꞌon na contyꞌe nnꞌanhin, ndö vaa quitsꞌaa juu \p \v 12 ꞌOꞌ ntyjë na viꞌntyji ꞌoꞌ, naneinhin coquenonhoꞌ ncüii nnon na jaaꞌ jndyihanꞌ ngiohoꞌ na itsichonhanꞌ na ngacüaaꞌ ꞌoꞌ. Itsijonhanꞌ juuhanꞌ chaꞌvijon na covenonhoꞌ quiiꞌ chon. Majoꞌ tyiꞌncꞌoonꞌ nꞌonhoꞌ ntyja ꞌnaanꞌhanꞌ na jen mañoonhanꞌ. \v 13 Majoꞌ cüineiinꞌ nꞌonhoꞌ na coquenonhoꞌ na nndaꞌ, ee ntyja ꞌnaanꞌ joꞌ conanꞌjonhoꞌ juu naviꞌ na tquenon Cristo, chaꞌ juu xjen na ntsiꞌman Tyoꞌtsꞌon na taquintyja na tꞌman condui nquii Cristo, mantyi ꞌoꞌ juu xjenꞌñeen ncꞌonhoꞌ na nein jndyihoꞌ. \v 14 Xjen na conanꞌcüejnaanꞌ nnꞌan ꞌoꞌ ngꞌe na conduihoꞌ nnꞌan cüentaaꞌ Cristo, vaa tꞌman jndyi na ityio Tyoꞌtsꞌon jnꞌaanhoꞌ. Ee na coquenonhoꞌ na nndaꞌ, itsiꞌmanhanꞌ na nquii Espíritu na condui jon na taquintyja na njon conduihin, mꞌaan jon yohoꞌ. \v 15 Xe na aa ngüejnꞌaan ncüii ꞌoꞌ, chito ntjon juu na nndaꞌ ngꞌe conduihin tsꞌan na iscueeꞌ juu tsꞌan, oo ngꞌe na xꞌuee juu ꞌnaanꞌ tsꞌan, oo ngꞌe ncüiichen nnon na sitjahin ndëë nanmꞌannꞌian, oo na ityiiꞌ yahin nchu vaa na tsixuan ncüiichen tsꞌan. \v 16 Majoꞌ xe na aa ngꞌe na condui tsꞌan cüentaaꞌ Cristo, ndoꞌ ngꞌe joꞌ contꞌaviꞌ nnꞌanhin, tyiꞌncꞌoon juu na jnaanꞌ jndyi juu na nndaꞌ vaa iquenon juu. Quitsitꞌmaanꞌ juu nquii Tyoꞌtsꞌon yo ncya juu naya jon na condui juu ntyja ꞌnaanꞌ Cristo. \p \v 17 Ee jndë tentyja xjen na quitꞌuiihanꞌ jaa nnꞌan na condui cüentaaꞌ Tyoꞌtsꞌon. Ndoꞌ xe aa yo jaa cotyeꞌhanꞌ, yajoꞌ jantyichen ꞌnan na ntquenon joo nnꞌan na tyiꞌtaꞌngueeꞌhan jñꞌoonꞌ jon. \v 18 Chaꞌna juu jñꞌoonꞌ Tyoꞌtsꞌon na jndui na itsohanꞌ: “Juu tsꞌan na itsinꞌman Tyoꞌtsꞌonhin na jndë tquen jonhin na tajnan tsixuan juu, xe veꞌ yo ncꞌua na nꞌman ñuan ꞌnaanꞌ juu, yajoꞌ juu tsꞌan na tyia tsꞌanhin yo ninꞌjuu tsꞌan na vaa jnaanꞌ, viꞌntyichen ngenon tsanꞌñeen.” \p Manndaꞌ itsiquindyi juu jñꞌoonꞌñeen. \v 19 Mangꞌe na nndaꞌ, ꞌoꞌ na coquenonhoꞌ naviꞌ ntyjantyi yo ꞌnan na ntꞌue tsꞌon Tyoꞌtsꞌon, ninvito quintꞌahoꞌ ꞌnan ya ndoꞌ juu na cotsamꞌanhoꞌ, quiꞌndyehoꞌhanꞌ ntꞌö nquii jon na tquen jon ꞌoꞌ. Ee joo jñꞌoon na jndë tcoꞌ jon ꞌndyo jon, tsoñꞌenhanꞌ ntsiquindë jonhanꞌ. \c 5 \s Itsiquiꞌmaanꞌ Pedro nnꞌan na conintque quiiꞌ ntꞌan nnꞌan tmaanꞌ cüentaaꞌ Tyoꞌtsꞌon \p \v 1 Naneinhin, ꞌoꞌ ntyjë na conintquehoꞌ quiiꞌ ntꞌan nnꞌan na conduihan cüentaaꞌ Tyoꞌtsꞌon, matsiquiꞌmanꞌ ja ꞌoꞌ. Ee mantyi ja ndö, cüejon condui ja tsꞌan na conintque yohoꞌ. Ncö jntyꞌia nnön juu naviꞌ tꞌman na tquenon Cristo na jñon nnꞌanhin tsonjnꞌaan. Ndoꞌ juu xjen na nndityincyoo nndaꞌhin, mantyi ntsijon ja yo na ntsitꞌmaanꞌ Tyoꞌtsꞌon jon. \v 2 Nquii Tyoꞌtsꞌon iꞌua jon tsꞌian ndëëhoꞌ na cotaꞌntyjeeꞌhoꞌ nnꞌan na conduihan tmaanꞌ cüentaaꞌ jon, ee nquii jon ntꞌue tsꞌon jon na nndaꞌ. Quinanꞌquindëhoꞌ juu tsꞌianꞌñeen yo na xoncüeeꞌ nꞌonhoꞌ, chito yo na ijndeiꞌhanꞌ, min chito ngꞌe na ntꞌue jndyi nꞌonhoꞌ na ngioo xoquituꞌ ndueehoꞌ. \v 3 ꞌOꞌ na iꞌua Tyoꞌtsꞌon tsꞌian ndëëhoꞌ na quitquenhoꞌ cüenta nnꞌan na conduihan tmaanꞌ cüentaaꞌ nquii jon, tyiꞌnanꞌquinjon nquehoꞌ ndëë nanꞌñeen. Juu na cotsamꞌanhoꞌ, quinduihanꞌ ꞌnan na ntsiꞌmanhanꞌ ndëëhin nchu vaa ncꞌonhan. \v 4 Nquii Cristo conduihin na taquintyja na conintquehin na ivantyjeeꞌ jon nnꞌan na conduihan tmaanꞌ cüentaaꞌ nquii Tyoꞌtsꞌon. Xjen na nndyo nndaꞌ Jesús, nquehoꞌ na cotyentjonhoꞌ nnon jon ncyꞌonhoꞌ cüenta na tyiꞌxeꞌquintycüii na ntsitꞌmaanꞌ jon ꞌoꞌ. \p \v 5 Mantyi ꞌoꞌ nnꞌan ndyua, quitaꞌngueeꞌhoꞌ jñꞌoon na conanꞌjndaꞌ nque nnꞌan na conintque ndëë nnꞌan na conduihan tmaanꞌ cüentaaꞌ Tyoꞌtsꞌon, quitjueꞌcjehoꞌ ntyja ꞌnaanꞌ na conanꞌjndaꞌhan. Tsoñꞌenhoꞌ cꞌonhoꞌ na ndyiaꞌ nꞌonhoꞌ yo nnꞌan na conduihan tmaanꞌ cüentaaꞌ jon. Ee vaa jñꞌoonꞌ jon na itsiquindyihanꞌ: \q Joo nnꞌan na conanꞌquinjon nquehin, nquii Tyoꞌtsꞌon icoꞌhin ndëë nanꞌñeen, \q majoꞌ nque nnꞌan na conanꞌndyiaꞌ nꞌonhan, incyaa jon juu naya na condui jon ndëëhan. \p Nndaꞌ vaa na itsiquindyi juu jñꞌoonꞌñeen. \v 6 Nquii Tyoꞌtsꞌon vaa najndei na conduihin na ityeꞌntjon jon tsoñꞌen, mangꞌe joꞌ, quinanꞌndyiaꞌhoꞌ na tonnon jon. Ee na ntꞌahoꞌ na nndaꞌ, yajoꞌ ntsiquinjon jon ꞌoꞌ juu xjen na ivaaꞌ tsꞌon jon na jndë tentyja xjen. \v 7 Tsoñꞌen ꞌnan na ndyiiꞌ jndyi nꞌonhoꞌ, ncyahoꞌ na nquii Tyoꞌtsꞌon ngichu jonhanꞌ ee ninnquiiꞌchen mꞌaanꞌ jndyi tsꞌon jon ntyja ꞌnaanhoꞌ ndoꞌ iquenchen jon cüenta tsoñꞌen ꞌnan na coquenonhoꞌ. \p \v 8 Quitquen nquehoꞌ xjen nchu vaa na cotsamꞌanhoꞌ ndoꞌ ninnquiiꞌchen quitquen ya yahoꞌ cüenta, ee mꞌaan ncüiichen na ninnquiiꞌchen vꞌiiꞌ tsꞌon juuhoꞌ, nquii yutyia. Imandyiꞌ juu na intꞌue juu nin tsꞌan na ntsiꞌndaaꞌ juu. Itsijonhanꞌhin chaꞌvijon lión na itsixuaa oꞌ, na imandyiꞌ oꞌ na intꞌue oꞌ quiooꞌ na ntquii oꞌ. \v 9 Xjen na ninꞌquen yutyia xjen ꞌoꞌ, tyiꞌndyicjehoꞌ nnon juu, tyen cüentyjeeꞌhoꞌ quityquiiꞌ na vantyja nꞌonhoꞌ. Yajoꞌ xeꞌquindëë ngüantjon juu yohoꞌ. Nque ntyjehoꞌ na mꞌanhin ninvaa tsonnangue na mantyi vantyja nꞌonhan Cristo, mangiohoꞌ cüejon viꞌ coquenonhan chaꞌxjen juu ꞌnan na coquenonhoꞌ. \v 10 Nquii Tyoꞌtsꞌon na tsoñꞌen naya tsixuan jon, nquii jon tqueenꞌ jon ꞌoꞌ na quinanꞌjonhoꞌ ntyja ꞌnaanꞌ juu na tyiꞌquintycüii na ntsitꞌmaanꞌ jon Cristo. Chjo ro xjen na coquenonhoꞌ naviꞌ, ndoꞌ ndë joꞌ manquiintyi jon ntsꞌaa jon na ntcoꞌ ya ntcüeꞌhanꞌ ꞌoꞌ. Nninncyaa jon najndëhoꞌ chaꞌ nnanhoꞌ yo tsoñꞌen nnon na coquenonhoꞌ ndoꞌ chaꞌ ntjotyenhoꞌ ntyja ꞌnaanꞌ jon. \v 11 Xiaꞌntyi nquii jon tsixuan jon na iquen jon xjen nanein ndoꞌ na ninvaa na tonnonchen. Quindui na nndaꞌ. \s Incyaa Pedro tsꞌon ꞌnaanꞌ jon ndëë nnꞌan \p \v 12 Majñön tsonvahin na mꞌanhoꞌ yo ntꞌö Silvano. Yo na macüjiꞌ cüenta, conduihin tsꞌan na xoncüeeꞌ tsꞌon jon na vantyja tsꞌon jon Jesucristo. Nnonhanꞌ jndë tsjö ncüii ve ꞌndyo jñꞌoon na ntejndeihanꞌ na ngüentyjeeꞌtyenhoꞌ quityquiiꞌ juu naviꞌ na coquenonhoꞌ. Ndoꞌ na macüjiꞌ jndyoyu na juu nayavahin na condui Tyoꞌtsꞌon na jndë conanꞌjonhoꞌ ntyja ꞌnaanꞌhanꞌ, conduihanꞌ na mayuuꞌ. Quintjotyenhoꞌ ntyja ꞌnaanꞌhanꞌ. \p \v 13 Joo nnꞌan na mꞌan tsjoon Babilonia na mantyi icüji Tyoꞌtsꞌonhan na conduihan cüentaaꞌ jon, coninncyahin tsꞌon ꞌnaanhan ndëëhoꞌ. Ndoꞌ mantyi nquii Marcos. Conduihin jnda. \v 14 Ncüii cüiihoꞌ ncyahoꞌ tsꞌon ntyjehoꞌ yo na xoncüeeꞌ nꞌonhoꞌ na conanꞌmanhoꞌ na conanꞌvengiohoꞌhan. \p Tsoñꞌenhoꞌ na conanꞌjonhoꞌ yo Cristo, ncyaa Tyoꞌtsꞌon na nanꞌxuanhoꞌ na tajñuaanꞌ tsꞌonhoꞌ na tonnon jon.