\id TIT \h Tito \toc2 Tito \mt1 Tson Na Scüenon Pablo Nnon Tito \c 1 \s Incyaa Pablo tsꞌon ꞌnaanꞌ jon nnon Tito \p \v 1 ꞌUꞌ Tito, ja Pablo, matscüenön tsonvahin nnonꞌ. Condui ja tsꞌan na ityeꞌntjon nnon Tyoꞌtsꞌon. Ndoꞌ mantyi condui ja tsꞌan na iꞌua Jesucristo tsꞌian nnön na ninncya jñꞌoon naya ꞌnaanꞌ jon ndëë nnꞌan. Itsꞌaa jon na nndaꞌ, chaꞌ nque nnꞌan na icüji Tyoꞌtsꞌon cüentaaꞌ jon, ngantyjantyichen nꞌonhan Jesucristo, ndoꞌ mantyi chaꞌ ngayꞌoonhanꞌhin na quindë ya ncüaaꞌ nꞌonhan juu jñꞌoon mayuuꞌ na juuhanꞌ vayꞌoonhanꞌ tsꞌan na ncüꞌahin ntyja ꞌnaanꞌ nquii Tyoꞌtsꞌon. \v 2 Chuhanꞌ na quintꞌa na nndaꞌ ngꞌe contyja tcüiiꞌ nnꞌön na ncyꞌön cüenta na tyiꞌquintycüii na cotaꞌntꞌö yo ñuan njanhan. Nquii jon, vitjachen na tquen jon tsonnangue, tcoꞌ jon ꞌndyo jon na nque nnꞌan na conduihin cüentaaꞌ jon, ncyꞌonhan cüentahanꞌ. Ndoꞌ nquii jon min tyiꞌxeꞌquitsiviꞌnnꞌan jon. \v 3 Nquii Tyoꞌtsꞌon na conduihin na itsinꞌman jon ñuaan nnꞌan, ninꞌjuu xjen na taaꞌ tsꞌon jon na chuhanꞌ, joꞌ siꞌman jon juu jñꞌoon naya ꞌnaanꞌ jon ndëë nnꞌan, majuu jñꞌoonꞌñeen na tꞌua jon tsꞌian nnön na mancyahanꞌ ndëë nnꞌan. \v 4 ꞌUꞌ ntyjë Tito, xengꞌe juu jñꞌoonvahin na covantyja nnꞌön Jesús, joꞌ condui ꞌuꞌ jnda. Nquii Tyoꞌtsꞌon conduihin tyëëhë ndoꞌ juu Jesucristo conduihin na itsinꞌman jon ñuan njanhan. Macꞌan ndëëhan na juu naya na nanꞌxuanhan, yo ninꞌjuu na conduihan na tajñuaanꞌ tsꞌonhan, cꞌoonhanꞌ yo ꞌuꞌ. \s Tsꞌian na tꞌua Pablo nnon Tito \p \v 5 Juu tsꞌiaanꞌ na jntyꞌi ja ꞌuꞌ ndyuaa Creta na mꞌaan ndaandue xiꞌjndio ngiaaꞌhanꞌ, na quitsijndaꞌ joo tsꞌian na vitja ndui, ndoꞌ na nninjndaꞌ nnꞌan na nnintquehin ndëë nnꞌan na vantyja nꞌonhan Jesús ncüii cüii tsjoon. \v 6 Nquii tsꞌan na nnintquehin ndëë nnꞌan na conduihin cüentaaꞌ Tyoꞌtsꞌon, chuhanꞌ na quinduihin tsꞌan na vaa jñꞌoon ya ntyja ꞌnaanꞌ juu na tyiꞌcotsitjahin, na ninncüii scuuꞌ jon, na mantyi ntsinda jon vantyja nꞌon, min chito vaa jñꞌoon ntyja ꞌnaan nanꞌñeen na conanꞌjonhan yo ꞌnan na tsixuan tsonnangue, min chito mꞌanhin na conanꞌqueꞌ nꞌonhan nnon nquii tyehan. \v 7 Ee nquii tsꞌan na conintquehin tondëë nnꞌan na conduihan tmaanꞌ cüentaaꞌ Tyoꞌtsꞌon, nquii jon xuuꞌ jon juu tsꞌianꞌñeen. Ngꞌe joꞌ chuhanꞌ na itsiquindë jon tonnon Tyoꞌtsꞌon ndoꞌ mantyi tondëë nnꞌan. Icanhanꞌ na chito conduihin tsꞌan na itsichon jon na xiaꞌntyi ꞌnan na ngitso jon, joꞌ na nndui, min chito conduihin tsꞌan na cje ro na itsivꞌii, min chito tsꞌan na quindyihin, min chito conduihin tsꞌan na ityio jon ꞌnan nnꞌan. Mantyi ngꞌe na conduihin jnda Tyoꞌtsꞌon, joo sꞌon na vantjon jon, cüantjon jonhanꞌ yo ncüii nnon tsꞌian na chuhanꞌ. \v 8 Juu jon, nque nnꞌan na cotsque yahan na mꞌaan jon na cotsacondyiꞌhan yo tsꞌian ꞌnaanꞌ Tyoꞌtsꞌon, cꞌoon cje jon na cyꞌoon jon cüentahin na ntixeeꞌ jonhan. Chuhanꞌ na conduihin tsꞌan na neiinꞌ jon na itejndei jon nnꞌan, na mantyi conduihin tsꞌan na iquen nquii jon xjen ntyja ꞌnaanꞌ na vamꞌaan jon, na conduihin tsꞌan na jndaꞌ ꞌnan na itsitiu jon na tonnon Tyoꞌtsꞌon yo na tondëë nnꞌan, na conduihin tsꞌan na itsꞌaa jon ꞌnan na caveeꞌ ntyjii Tyoꞌtsꞌon, mantyi na conduihin tsꞌan na itsiquindë juu na tonnon jon. \v 9 Ndoꞌ mantyi juu tsꞌan na conintquehin ndëë nnꞌan na conduihan tmaanꞌ cüentaaꞌ Tyoꞌtsꞌon, icanhanꞌ na quintjotyenhin ntyja ꞌnaanꞌ jñꞌoon na mayuuꞌ chaꞌxjen juu jñꞌoon na conanꞌmán, chaꞌ mantyi nndëë nninjntꞌuehinhanꞌ, chaꞌ nque nnꞌan na condyehan jñꞌoon na ncyaa jon, nnanꞌjonhan yo jñꞌoon na mayuuꞌ, ndoꞌ mantyi yo juu jñꞌoonꞌñeen ngüantjon jon joo nnꞌan na coꞌmanjndo juu jñꞌoon na coninncyá. \p \v 10 Ee jndye nnꞌan mꞌan na coꞌmanjndohin, na nanꞌ jñꞌoon na conanꞌneinhan na yo joo jñꞌoonꞌñeen conanꞌviꞌnnꞌanhan nnꞌan. Majndeichen nque nnꞌan na quii jndyuehan na conduehan na juu tsꞌan na vantyja tsꞌon Jesús na icanhanꞌ na quitsiquindë juu costumbre na contꞌa nnꞌan judíos yononꞌndaa ndahin. \v 11 Icanhanꞌ na quitsichenꞌ jndyue nanꞌñeen xengꞌe ntyja ꞌnaan joo jñꞌoon na conanꞌneinhan, jndye nnꞌan conanꞌndaaꞌhanꞌ. Manndaꞌ vaa na contꞌahin ngꞌe na cotquen yantyihin na ninꞌquitaꞌntjonhan xoquituꞌ, min tajnꞌanhan na contꞌahin tsꞌianꞌñeen. \p \v 12 Ncüii nquehin, tsan na tuihin juu ndyuaa Creta, na tonduihin tsꞌan na tonincyaa juu jñꞌoon ntyja ꞌnaanꞌ ꞌnan na nndui, tso juu na tsoñꞌen ntyjehin nnꞌan na mꞌan juu ndyuaaꞌñeen, mancüiixjen conduihan nanquintu, itsijonhanꞌ joohan chaꞌvijon quiooꞌ vje na viꞌ jndyi ꞌnan contꞌahin. Itso tsanꞌñeen na condui nanꞌñeen nanntyquen na ninꞌcüaꞌ quintcuhin min tatsꞌian contꞌahan. \v 13 Juu jñꞌoon na tso tsanꞌñeen, mayuuꞌhanꞌ. Ngꞌe joꞌ cüanꞌ yantyi ndëë nnꞌan Creta na vantyja nꞌon Jesús, chaꞌ quen yantyihanꞌhin ntyja ꞌnaanꞌ na vantyja nꞌon. \v 14 Cüanꞌ ndëëhan na quitsacüentyjeeꞌhan na conanꞌjñꞌoonꞌhan joo jñꞌoon na conanꞌjndaꞌ nnꞌan judíos yo joo jñꞌoon na nque nnꞌan conanꞌjndaꞌhan na cotoꞌxenhanꞌ. Nnꞌan na contꞌa na nndaꞌ, conduihan nnꞌan na tyiꞌcueeꞌ nꞌonhan juu jñꞌoon na mayuuꞌ. \p \v 15 Nque nnꞌan na jndë tquen Tyoꞌtsꞌonhan na conduihin na ntjuꞌ ñuaanhan, ntyja ꞌnaan joohan tsoñꞌen nnon conduihanꞌ na ntjuꞌ. Majoꞌ ntyja ꞌnaan nque nnꞌan na mꞌaanꞌ nꞌonhan ꞌnan natyia, min tyiꞌcantyja nꞌonhan Cristo, juu na cotjiꞌhan cüenta, min ncüii nnon tyiquitsixuanhanꞌ na ntjuꞌ. Ata juu na mꞌaanꞌ nꞌonhan yo ninꞌjuu na vicjeeꞌ ñuaanhan, mꞌaanhanꞌ na tyꞌahanꞌ na tonnon Tyoꞌtsꞌon. \v 16 Joo nanꞌñeen yo na saaꞌ nꞌonhan, conduehan na cotaꞌjnꞌaanhin Tyoꞌtsꞌon, majoꞌ juu na cotsamꞌanhan, itsiꞌman jndyoyuhanꞌ na cotjihan ntyja ꞌnaanꞌ nquii jon. Ji vaa jndyi ntyjii jon ntyja ꞌnaanhin. Min tyiꞌninꞌquinanꞌquindëhan na tonnon jon. Minꞌncüii nnon tsꞌian na ya tyiꞌxeꞌcüijntꞌuehin ntyja ꞌnaanꞌhanꞌ. \c 2 \s Chuhanꞌ na quitsiꞌman tsꞌan jñꞌoonmin \p \v 1 Majoꞌ ntyja ꞌnanꞌ, ninvito quitsiꞌmanꞌ ndëë nnꞌan na ꞌuꞌ vamꞌanꞌ tyquiiꞌ joo jñꞌoon na itejndeihanꞌ na conanꞌnchuꞌhanꞌ nchu vaa na icanhanꞌ na cꞌon nnꞌan na vantyja nꞌonhan Cristo Jesús. \v 2 Nque nannon tque, quitsuꞌ ndëëhan na quitquen nquehin xjen ntyja ꞌnaanꞌ na cotsamꞌanhan, cꞌonhan na conduihan nnꞌan na tque contꞌa chaꞌ ngiooꞌ ngio nnꞌan ntyja ꞌnaanhan, quinduihan nnꞌan na jndaꞌ ꞌnan na cotjiꞌhan cüenta. Mantyi cꞌonhan na xoncüiiꞌ nꞌonhan ntyja ꞌnaanꞌ juu na vantyja nꞌonhan, ndoꞌ mantyi cüivengiohan nnꞌan, ndoꞌ mantyi cꞌonhan na tꞌman nꞌonhan quityquiiꞌ joo naviꞌ na coquenonhan. \v 3 Ndoꞌ majoꞌntyi nanntcu tque, quitsiꞌmanꞌ ndëëhin na quitsamꞌanhin yo na xoncüiiꞌ nꞌonhan, min chito conanꞌtjaꞌhan quintu nnꞌan, min chito na conduihan nanntcu na nanꞌcüenonhan xjen na covehan. Ndoꞌ ndëë ntyjentcuhin na tyiꞌtquechen, quinanꞌmanhan ndëë nanꞌñeen ꞌnan na chuhanꞌ na quintꞌahan. \v 4 Quintꞌa nanntcu tque nanꞌmin chaꞌ nque ntyjentcuhan na tyiꞌtquechen, ntsiꞌmanhanꞌ ndëë nanꞌñeen na quinanꞌvengiohan sꞌahin yo ndahin. \v 5 Nque nanntcu tque, quinanꞌmanhan ndëë nanꞌñeen na quitquen nquehin xjen ntyja nchu vaa na cotsamꞌanhin. Na cꞌonhan na ntjuꞌ ntyja ꞌnaanꞌ ꞌnan na conanꞌtiuhan, ndoꞌ mantyi quityiꞌxeeꞌ yahan sꞌahin yo ndahin, ndoꞌ cꞌonhan na ya ñuan nanꞌxuanhan yo tsoñꞌen. Ndoꞌ mantyi quinanꞌman nanntcuꞌñeen ndëë ntyjentcuhan na quitjueꞌcjehin ndëë sꞌahan, chaꞌ ntscuꞌhanꞌ na nndue nnꞌan na juu jñꞌoonꞌ Tyoꞌtsꞌon tyiꞌquijntꞌuehanꞌ. \p \v 6 Machaꞌxjen juu jñꞌoon na jndë tsjö, mantyi nque nnꞌan ndyua, quitsijndaꞌ nquenhan na quitsamꞌanhan na xoncüiiꞌ nꞌonhan. \v 7 Majoꞌ ncuꞌ tyquiiꞌ tsoñꞌen na vamꞌanꞌ, quitsaꞌ na ncüaaꞌ nꞌonhan nchu vaa na icanhanꞌ na cꞌonhan na cotquenhan cüenta ntyja ꞌnaanꞌ na vamꞌanꞌ. Xjen na matsiꞌmanꞌ jñꞌoonꞌ Tyoꞌtsꞌon ndëëhan, quitsaꞌhanꞌ yo na xoncüeeꞌ tsonꞌ na tonnon Tyoꞌtsꞌon, ndoꞌ mantyi na matsaꞌ na juu tsꞌian na tsixuanꞌ njon jndyi conduihanꞌ. \v 8 Joo jñꞌoon na matsiꞌmanꞌ ndëë nanꞌñeen, quitsininꞌ jñꞌoon na ntejndeihanꞌhin na ngaquehan ntyja ꞌnaanꞌ na vantyja nꞌonhan, ncüii jñꞌoon na tyiꞌxeꞌncyaahanꞌ na nnduehan na tyiꞌcüijntꞌue juu jñꞌoon na matsininꞌ. Na ntsaꞌ na nndaꞌ, juu tsꞌan na tyiꞌcüjiꞌ yahanꞌ jñꞌoon na incyaa, ngüejnaanꞌ juu ndoꞌ ntsichenhanꞌ ꞌndyo juu na taꞌnan jñꞌoon tyia na nndëë ntsinin juu nacjoꞌ. \p \v 9 Ndoꞌ nque nnꞌan na cotyeꞌntjontyenhan ndëë patrón ꞌnaanhin, quitsuꞌ ndëëhan na quitaꞌngueeꞌhan tsoñꞌen ꞌnan na condue nanꞌñeen, cjooꞌ nꞌonhan na ngaveeꞌ ngio nanꞌñeen yo joohan, min tyiꞌnanꞌntcüeꞌhan jñꞌoon ndëë nanꞌñeen. \v 10 Min tyiꞌntyꞌueehin ꞌnaan nanꞌñeen, majoꞌ quinanꞌmanhan na conanꞌquindëhin tondëë nanꞌñeen. Quintꞌahin chaꞌxjen na matsjö ndöꞌ, ee na aa ntꞌahinhanꞌ, ntyja ꞌnaanhin ntsiquinjonhanꞌ juu jñꞌoon na conanꞌman ntyja ꞌnaanꞌ nquii Tyoꞌtsꞌon na conanꞌtꞌmaanꞌ jaa na conduihin na itsinꞌman jon ñuan njanhan. \p \v 11 Ee juu naya na tsixuan jon, jndë tityincyooꞌ jndyoyuhanꞌ ndëë tsoñꞌen nnꞌan. Ntyja ꞌnaanꞌ juuhanꞌ na itsinꞌman jon ñuan ꞌnaanꞌ minninchen tsꞌan. \v 12 Juu nayaꞌñeen itsiꞌmanhanꞌ ndëëhë na quitji ntcüeꞌ jaa ntyja ꞌnaan minꞌcya ro nnon natyia na itsuehanꞌ nacjooꞌ Tyoꞌtsꞌon, ndoꞌ tsoñꞌen nnon na cojooꞌ nꞌon nnꞌan na ninꞌquinanꞌjonhan yo juu na tsixuan tsonnangue, quitquen nque jaa xjen ntyja ꞌnaanꞌhan, yo na quintꞌaha tsoñꞌen chaꞌxjen na chuhanꞌ na tondëë nnꞌan, yo nchu vaa na quitsamꞌan quiiꞌ ntꞌan nnꞌan tsonnanguevahin. \v 13 Ndoꞌ viochen xjen na cotsamꞌanntyëhë, cominntꞌö tcüihi na ncüjeeꞌ ntcüeꞌ nquii Jesucristo na conduihin Tyoꞌtsꞌon na taquintyja na tꞌman conduihin na itsinꞌman jon ñuan njanhan. \v 14 Tyincyaa nquiihin na tueꞌ jon ntyja njanhan, chaꞌ ncüjiꞌ ntcüeꞌ jon jaa quiiꞌ tsoñꞌen ꞌnan tyia, ndoꞌ chaꞌ ntquen jon jaa na ntjuꞌ cüentaaꞌ nquii jon, ndoꞌ na icüji jon jaa yo na ntquen jon nquë na condui jaa nnꞌan ntyja ꞌnaanꞌ nquii jon. Itsꞌaa jon na nndaꞌ chaꞌ na quitquen yantyi jaa na ntꞌaha tsꞌian na ntyja ꞌnaanhanꞌ na nditꞌmaanꞌ jon. \p \v 15 Ninnquiiꞌchen quitsiꞌmanꞌ jñꞌoonminꞌ ndëë nanꞌñeen yo juu najndei na matsixuanꞌ. Tyiꞌntsinchqueenꞌ ꞌuꞌ na mancyaꞌhanꞌ ndëëhin. Joo nnꞌan na tyiꞌninꞌquinanꞌjñꞌoonꞌhan jñꞌoon ꞌndyoꞌ, cuanꞌ ndëëhin, min tyiꞌninncyaꞌ na ncüjiꞌ tsꞌan cüenta na tyiꞌquinjon condui ꞌuꞌ. \c 3 \s Tsꞌianmin icanhanꞌ na quintꞌa \p \v 1 Nque nnꞌan na vantyja nꞌon Cristo, quitsaꞌ na cañjoonꞌ nꞌonhan na quitjueꞌcjehin tondëë nanmꞌannꞌian yo ninꞌndëë nnꞌan na cotsantyja nanquenꞌ nanꞌñeen, quitaꞌngueeꞌhin ntyja ꞌnaan tsoñꞌen, ndoꞌ na cꞌon cjehan na ntꞌahin minninchen tsꞌian na ya na conanꞌjndaꞌ nanmꞌannꞌianꞌñeen. \v 2 Min tananꞌneinhan jñꞌoonviꞌ nacjooꞌ minꞌncüii tsꞌan. Majoꞌ joo nnꞌan na chohan tyiaꞌ yo ntyjehan, quinanꞌchonhan na nanꞌntycüiihan tyiaꞌ ꞌnaan nanꞌñeen ndoꞌ na quintꞌahan ncüii cüii nnon naya yo nnꞌan. Ndoꞌ ndëë tsoñꞌen nnꞌan quinanꞌmanhan na ya ñuan nanꞌxuanhan. \p \v 3 Ee mantyi jaa ndyu na toxenꞌchen tomꞌan na tataaꞌ nnꞌön nchu vaa na ntꞌue tsꞌon Tyoꞌtsꞌon na cꞌön, tatotaꞌncꞌuë ꞌnan na ntꞌue tsꞌon jon. Jñꞌoon na tonanꞌman nnꞌan ndëëhë, tjuꞌndyaꞌhanꞌ jaa nato na tyiꞌya. Joo natyia na tovineiinꞌ nnꞌön yohanꞌ yo cüii nnon natyia na ntꞌue jndyi tsꞌon tsꞌan na ninꞌquitsꞌaa juu, totyeꞌntjöntyën ndëëhanꞌ, ninnquiiꞌchen tonanꞌjön yo tsoñꞌen nnon ꞌnan tyia. Tonanꞌtëëꞌ nnꞌön nnꞌan, tondijndö joohan ndoꞌ mantyi nquehan tondijndohan jaa. \v 4 Majoꞌ nquii Tyoꞌtsꞌon na conduihin na itsinꞌman jon ñuan njanhan, juu xjen na sꞌaa jon na tityincyooꞌ na ya ñuan tsixuan jon yo ntyja njanhan, yo juu na viꞌnchjii jon nnꞌan, \v 5 juu xjenꞌñeen sinꞌman jon ñuan njanhan. Min chito sꞌaa jon na nndaꞌ ngꞌe jaa jndë jntꞌa ꞌnan na ya jndyi na tonnon jon. Sꞌaa jonhanꞌ xengꞌe ntyꞌia ro nnꞌan nchjii jon. Sꞌaa jonhanꞌ juu xjen na tyincyaa jon na tui xco jaa na tman jon jaa, yo ntyja ꞌnaanꞌ juu najndei na condui nquii Espíritu Santo. \v 6 Ndoꞌ ntyja ꞌnaanꞌ nquii Jesucristo na conduihin na itsinꞌman jon ñuan njanhan, joꞌ nquii Tyoꞌtsꞌon tyiꞌvacuaa xjen na incyaa jon Espíritu Santo quiiꞌ nnꞌön. \v 7 Ngꞌe juu naya na condui Jesucristo, joꞌ na iquen Tyoꞌtsꞌon jaa na tajnan nanꞌxuan. Ndoꞌ na nndaꞌ, incyaahanꞌ na itsiquindaaꞌ jon jaa na tyiꞌquintycüii na cotaꞌntꞌö yo ñuan njanhan, ꞌnan na contyjatycüiiꞌ nnꞌön na ncyꞌön cüentahanꞌ. \p \v 8 Joo jñꞌoonminꞌ conduihanꞌ jñꞌoon na mayuuꞌ, ndoꞌ nque nnꞌan na vantyja nꞌonhan Tyoꞌtsꞌon, ntꞌue tsꞌön na jaaꞌ quitsininꞌhanꞌ ndëëhan chaꞌ nnanꞌchonhan na ntꞌahan ncüii cüii nnon tsꞌian na ya. Ee joo jñꞌoonminꞌ njon jndyihanꞌ, ndoꞌ tꞌman naya nanꞌxuanhanꞌ na ntejndeihanꞌ tsoñꞌen nnꞌan. \v 9 Majoꞌ juu jñꞌoon na conanꞌnein nnꞌan na vayꞌoonhanꞌ nnꞌan na icꞌonhanꞌhin yo ntyjehan, oo na conanꞌnchuꞌhan nin nnꞌan tsjan na jndyocahanꞌ na tuihan, oo na conanꞌntjaꞌhin yo ntyjehan nchu vaa na itsiꞌman ncüii ꞌndyo jñꞌoon na tquen Moisés, ꞌuꞌ tyiꞌntyiiꞌ ꞌuꞌ ntyja ꞌnaanꞌ na cotjiꞌ nanꞌñeen cüenta. Ee joo jñꞌoonminꞌ tyiꞌquitejndeihanꞌ tsꞌan, veꞌ jnꞌaanhanꞌ. \p \v 10 Ncüii tsꞌan na incyaa jñꞌoon na ntyja ꞌnaanꞌhanꞌ na icꞌonhanꞌ nnꞌan yo ntyjehan na vantyja nꞌon, ncüii oo aa ve jnda na quitsiquiꞌmanꞌhin, ndoꞌ xe aa tyiꞌquitsijñꞌoonꞌ juu jñꞌoon na matsuꞌ nnon juu, cüjiꞌhin quiiꞌ ntꞌanhoꞌ. \v 11 Ee ndëë ncüjiꞌ cüenta na juu tsanꞌñeen tyiꞌndyoyu nato na mꞌaan juu, juu jnan na itsꞌaa juu, itꞌuiihanꞌhin. \s Jñꞌoon na itsiquiꞌmaanꞌ Pablo Tito \p \v 12 Ya na njñön juu ntyjëëhë Artemas oo Tíquico na mꞌanꞌ, quitsichonꞌ na ngaquindyiaꞌ ja tsjoon Nicópolis, ee jndë sijntꞌa na juu tsjoonꞌñeen, joꞌ nguenön ngueetein. \v 13 Juu Zenas, tsan na tsintyjaaꞌ jñꞌoon ꞌnaan nnꞌan, yo juu Apolos, xjen na nnduiꞌhan na mꞌanhoꞌ, ncyahoꞌ tsoñꞌen na icanhanꞌhin chaꞌ ndëë ncꞌohan na tonnonchen nato na ñjonhan, na minꞌcüii ꞌnan tyiꞌquitsitjahanꞌhin. \v 14 Ee nque ntyjëëhë na vantyja nꞌon Jesús, icanhanꞌ na cjooꞌ nꞌonhan na quintꞌahan ncüii cüii nnon ꞌnan naya, ndoꞌ quitejndeihin nque nnꞌan na itsitja jndyihanꞌ ꞌnan na ninjntꞌuehan, ee xe na aa tyiꞌquintꞌahan na nndaꞌ, juu na vantyja nꞌonhan itsijonhanꞌ juuhanꞌ chaꞌvijon tsꞌoon na tatë coveꞌ. \s Incyaa Pablo tsꞌon ꞌnaanꞌ jon ndëëhan \p \v 15 Tsoñꞌen ntyjëëhë na vantyja nꞌon Jesucristo na mꞌanhan ntjoohin yo ja, concyahin tsꞌon ꞌnaanhan nnonꞌ. Ndoꞌ mantyi ncyaꞌ tsꞌon njan ndëë nque nnꞌan na conanꞌvengiohan já ngꞌe na mantyi vantyja nnꞌön jon. Juu naya na tsixuan nquii Tyoꞌtsꞌon, ncyaa jon na nnanꞌxuanhoꞌhanꞌ.