NitamashtilisteKwal Yehshwa-Kristo yewal kikwihkwilo Lukas
Lukas kikwihkwiloli Te'ópilo
1
Tasotili Te'ópilos,
myak takam motalik kwihkwilok in tapowaliste kina omotachi kampa melawak yok panok ika tehwante,
2 kina tishnishtilik yehwante nitahtolme kitak kina omotachi kimani omopewalti,
wan yehwante kinonanak in tikipanoliste pa kitotiyaloskya nitahtolmeDyos.
3 Newal niyok tasotili Te'ópilos,
onimomashti kwal mochi pa kimani omopewalti,
wan kwal pa nimishmashtis ka takwihkwiloliste pa tihmatiskya kina opan,
4 pa timomashtis kwal in melawak in ten mishmashtik.
Lucas 1.1-25
Tanawatiliste ka in takatiliste pa Yuhanes
5 Pa inik tonatim in Herodes katka Rey pa Yudaya,
katka se totats itoka SakarYah,
yewal katka pa se tanichikol ka in totatsim kintokayoltiloya AbíYah.
Nisiwa itokaya EliSabet,
yewal katka nikolinche Arón.
6 Moshte omente,
SakarYah wan EliSabet kwal kichiwaloya i'ishpa Dyos wan kimawishtililoya mochi tamawishtiliste wan nitahtolmeDyos pa in TATS.
7 Ma yok,
amo kipiyaloya ininpilwam,
kampa EliSabet amokwal kinpiyaskya ininpilwam,
moshte omente kolinche katkaloya.
8 Pa se tonat,
SakarYah tikipanowaya kina se totats pa kalitik in tyopWe pa i'ishpa Dyos kampa kitokarowaya nitanichikol AbíYah,
9 yok kina kimatiloya kichiwaloya ika totatsim,
pa in tonat kichiwak,
ak itonal,
katka pa kalakiskya pa nityopWe in TATS pa tapopochoskya.
10 Kwah tapopochotikatka,
moshte masewalme katkaloya kiyawak pa in tyopWe kitahtoltitikatkaloya Dyos.
11 Kwah NitanawatilanhelTATS omoneshti ka SakarYah,
moketstikatka pa nitankwakwal,
kaha tatamakal kaha kitalil poposhte.
12 Kwah SakarYah okit in Nitanawatilanhel,
motapololtiyaya wan amo kimatiya ten kichiwaskya.
13 Wan in Nitanawatilanhel kili:
―SakarYah,
amo shimomapti,
kampa Dyos okikak motahtol yewal mishnankili,
mosiwa EliSabet mishmakas se mokon,
wan tewal tiktokayoltis Yuhanes.
14 Tikpiyas pakiliste,
wan myak kipiyaske pakiliste ka nitakatiliste;
15 kampa mokon we yes pa i'ishpa in TATS.
Amo konis nihugoUbaBino wan amo konis alkol,
wan kipiyas miyak EspirituSanto pa kimani ayamo takatis.
16 Kichiwas yewal myak pa in pweblo Isra'El pa kikwepaske taneltokaliste ka TATS ininDyos.
17 In Yuhanes yaptiyas ta'ishpa pa in TATS,
ka in Espiritu wan in nichikawaliste in niTaketsal nitahtolDyos EliYah,
pa kwal motakichilitiyaske nitats inak ininpilwam,
wan inik yehwante amo kimatil takakil kimatiske takakiske.
Yok kichiwas ka in masewalme pa kinamikiske in TatsDyos.
18 SakarYah kitahtanili Nitanawatilanhel:
―Kina nihmatis newal ta melawak kina tinichilitik?
Kampa newal hyero nikolinche wan nosiwa niyok.
19 In Nitanawatilanhel kinankili:
―Newal niGabriEl,
wan newal niktikipanoli Dyos;
yewal onishtake pa nitahtos monak wan nimishmakas nitamashtilisteKwal.
20 Kina amo otishneltok ka notahtolme,
amokwal titahtos pa kimani takatis mokon.
Yok kimani motachiwas pa inik tonatim kina nimichili.
21 Moshte masewalme,
katkaloya pa kiyawak kichishtikatkaloya SakarYah,
wan motahtanililoya pates wehkaptikatka kisaskya pa in tyopWe.
22 Kimani okis,
amokwal kina tahtoskya;
kimatik kampa tachiyaya kina tatimiktiyaskya pa in tyopWe.
Wan kintakichiliyaya ka nimahwam.
23 Kwah omotam nitikipanoliste SakarYah opanoti icha.
24 Wan amo wehkA,
nisiwa EliSabet moka ostiti ta'apa,
wan pa makwil meste amo okis pa nikal,
tamatiti:
25 “In TATS onishchiwil in ashka,
pa yok in masewalme yahmo nishihyaske.”
Tanawatiliste ka nitakatiliste Yehshwa
26 Pa chikwase meste ostitikatka tomaptikatka EliSabet,
Dyos okitake Nitanawatilanhel GabriEl pa in Wepweblo Galileya itoka Nasaret,
Lucas 1.26-80
27 kampa mochantiyaya se siwatYankwik itoka Marya.
Ayamo motekaya ka se takat,
kampa tatahtanil katka pa monamiktiskya inak se takat itoka Yosé,
nikolinche katka weRey Dawid.
28 In Nitanawatilanhel okalak kaha katka yewal wan kili:
―Shikpi pakiliste,
Dyos mishmashti kwal!
In TATS onka ka tewal.
29 Marya motapololti ka in tahtolme,
wan motahtaniliyaya ten okinek okit tatahpalol.
30 In Nitanawatilanhel kili:
―Marya,
amo shimomapti,
kampa tikpi pakiliste ka ta'ihniliste ka Dyos.
31 Ashka,
ti'ostitiya tita'apawas wan tikpiyas se mokon,
wan tiktokayoltis Yehshwa.
32 Ina yes se we takat;
yewal kitokayoltiske Nikon in Dyos HyeroTakpak,
wan TATS kichiwas weRey kina niwichal Dawid,
33 pa yok reynaros hanse ipa nipweblo Yakob;
nireynaroliste amo kipiyas tamiliste.
34 Marya kitahtanili Nitanawatilanhel:
―Kina kwal motachiwas in,
ta amo nimochanti inak takat?
35 In Nitanawatilanhel kinankili:
―Yewal in EspirituSanto walas ipa tewal,
wan in nichikawaliste Dyos HyeroTakpak mishtsakwilis ka nitasoway.
Kampa yok,
in piltonte yewal takatis itokas NikonDyos.
36 Niyok moparyente EliSabet kipiyas se nikon kampa yok abwel katka;
yewal kililoya kaha yok amokwal kinpiyaskya ininpilwam ashka ta'ostitik ta'apaptik kipi chikwase meste.
37 Ma yok Dyos mochiten kwal kichiwas.
38 Kwakin Marya kito:
―Newal nitikipanol in TATS;
ma kichi Dyos pa newal kina tichili.
Ka in,
Nitanawatilanhel panoti.
Marya kipashalo EliSabet
39 Pa inik tonatim Marya panoti ka isewiliste pa talTepet,
pa se Wepweblo Yudaya,
40 okalak pa nikal SakarYah wan kitahpal EliSabet.
41 Kwah EliSabet kikak nitahtol Marya,
mohmolin nikon pa'itik yewal,
wan yewal kipi in EspirituSanto.
42 Kwakin ka tsatsiliste chikawak kito:
―Dyos mishmashti pa inik siwam,
wan niyok kimashti mokon yewal tikpiyas.
43 Ak ninewal,
pa yewal owal onishpashal ninantsi noTATS?
44 Kwah kikak motahtol,
nokon mohmolin ka pakiliste pa itik newal.
45 Dyos mishmak miyak pakiliste,
kampa otihneltok kampa monamikis kina yewal michili in TATS.
46 Marya kito:
No'ihyo kishki we kitahtolti pa noyol in TATS,
47 wan no'espiritu kwal tamat pa Dyos nishkishti pa nota'ihtakoliste.
48 Kampa Dyos okital nishtololwam pa newal nitikipanol amoten kipi,
wan pa ashka nishtokayoltiske pakiliste wan moshte mokolinchim yehwante takatitiwalaske.
49 Kampa in kipi chikawaliste okichi pa newal wehwe tachiwaliste;
Santo ni'itokaliste.
50 Dyos kipi hanse ta'ihniliste aki yehwante kimawishtilil.
51 Okichi ka mochi nipoderoliste;
kinshitin yehwante hyero wehwe tamatiloya.
52 Okinkishti inik weReye' ompa kaha motaliloya,
wan okintal kishki amoten kipiyaloya.
53 Inik mayantikatkaloya kinmak mochiten,
wan inik yehwante kishki mochiten kipiyaloya ka miyak tomi kinka ka amoten.
54 Kipale in pweblo Isra'El nitikipanol;
amo ki'ilka pa kwal kichiwiliskya ka ta'ihniliste,
55 yok tishtenewilik towichalme,
AbRaham wan niyok yewal takatitiwalaske nikolinchim pa hanse.
56 Marya omoka yey meste ka EliSabet,
kwakin omokwep pa nikal.
Nitakatiliste Yuhanes takwatiki
57 Kwah mo'as in tonat EliSabet,
okitakatilti nikonTakat.
58 Wan moshte kishki ompa mochantiloya wan niparyente hyero kwal tamatiloya,
kampa kitak yewal TATS kineshtili niwe ta'ihniliste.
59 Pa in chikweyi tonatim,
kiwikak pa yeskya takotonil nikwerit kaha mashishal,
wan kinekiloya kitokayoltiloskya kina nitats,
SakarYah.
60 Wan ninantsi kito:
―Amo.
Itokas Yuhanes.
61 Kilik:
―Amo'ak yok itok pa mokal.
62 Kwakin kitahtanilik ka taneshtiliste nitats in piltonte,
pa yok kimatiloskya kina kinek kitokayoltiloskya.
63 Nitats otahtan se tabla pa takwihkwiloskya,
wan kikwihkwilo:
“Ni'itokaliste yewal Yuhanes.”
Wan moshte mokawak tachistiyak.
64 Hani SakarYah oksep waltahto,
wan kipewaya tahtolme wehwe pa Dyos.
65 Moshte yehwante ompa mochantiloya motapololtiloya,
wan pa mochi talTepet Yudaya taketsaloya yewal ten motachi.
66 Moshte kishki takakiloya,
motahtanililoya wan mo'ililoya:
―Ten yes in piltonte kwah we yes?
Kampa melak in TATS kineshtiyaya nichikawaliste ipa yewal.
SakarYah kimashtiyaya nitahtolDyos
67 SakarYah nitats in piltonte,
ka miyak EspirituSanto wan kimani kimashtiyaya nitahtolDyos kito:
68 Ma kimashti in TATS,
niDyos Isra'El,
kampa wal kinkishti pa amo poliwiloskya pa nipweblo.
69 Otishwaltitanil se ka miyak chikawaliste pa tishkishti pa poliwiste
ika se nikolinchim Dawid nitikipanol.
70 In yewal tishtenewiliyaya ya wehkA ka inkamak ininsanto in Taketsalme nitahtolmeDyos:
71 Yewal tishpalewiskya ka yehwante tishkokolil wan moshte kishki tishihyal,
72 kipiyaskya ta'ihniliste ka towichalme,
wan ki'ilnamikiskya in nitahtoliste.
73 Wan ka tahtol melawak kichiwili totats AbRaham:
Yewal tishmakaskya.
74 Yolil,
titamakawalme ka in tishkokolil,
pa tiktikipanoliske amo timomaptitiyaske,
75 kwal timochantitiyaske wan chipawiliste pa toyol,
mochi inik tonatim i'ishpa yewal.
76 Wan tewal piltonte,
ti'itokas in niTaketsal nitahtolDyos HyeroTakpak,
kampa tewal tiyaptiyas ta'ishpa ka in TATS pa titahtotiyas Dyos nitahtol tikchiwas ni'otim pa ininyoliliste masewalme,
77 timoneshti ka nipweblo kampa Dyos kinihnili moshte kishki amokwal tamatil,
kina Dyos kinkishti pa amo poliwiloskya.
78 Kampa toDyos,
ka we nita'ihniliste,
tishwalikili tonat pa okse tanes,
79 pa kintawilis kishki mochantil pa se tayowaliste wan pa se hyero we tatikomat,
wan tiyaske tipanoske ka totankwa pa in ot ka sewiliste.
80 In piltonte mo'apaptiyaya wan ka chikawaliste pa in espiritu,
wan mochantiti pa se tal kaha tawak yok panok inik shiwim kwah o'as in tonat kimani omomashti pa Isra'El.