Talaparai Yidi Leu Be, Bong Talon Di Diede
15
Idi sima tooltool yo tatara lodo medana inbe takodo le tamede nga,
ngan ke bet talaparai yidi leu a lod ponana ngan tiap.
Yesoo,
idi nga urata kiidi yo bet tayeii i,
in ke bet talon di tooltool yo tikodo le timede ye lodi medana tiap nga,
a bet nen ngan talon di a tasolo moonoo kidi lapau.
2 Ngan nen le idi atu atu nga ole tayei dada dook mata yo bet di diede kapala tikamata ngan lodi ponana ye i.
Ngan ye dada tani,
in ole talon di,
inbe tapamede di ye lodi medana yo titaru i.
3 Yesoo,
idi nga bet tatoo dada yo ben Kirisi itoo nga,
ye in ilaparai ye ye taunu tiap.
Le ben Rau ke Maro iwete nga,
“Betanga dook tiap yo tiwete a tikapge bet tipammoo ong ye nga,
ngan tipaloko lo pok lapau.”a
4 Ngan betanga ke Maro yo mugu ngan tiwodo a iken ye rau ki nga,
ngan bet nen a ipagalanga lodo ye dada yo dook mata nga.
Ngan nen le ipatomonai idi ye dada yo bet takodo le tutube a tasolo urata moonoo yo pombe pang yidi nga,
inbe ipamedidi le lodo iken dook mata,
a bet nen ngan tatar matada a tanama Maro ye so dook mata yo bet iyeii paidi i.
5 Ngan Maro la ilonidi a bet takodo le tutube inbe tasolo urata moonoo yo pombe pang yidi nga,
inbe ye in la ipamedidi le lodo iken dook mata i,
le apatarau panga nen bet ole iyei ang le kagauagaua dook mata,
inbe katoo dada dook mata tina yo ben Yesu Kirisi itoo nga.
6 Ngan ole nen,
a bet nen ngan lomu le betebetanga kiang nga,
ngan igaua le ataleu,
inbe kayeie Maro yo Tool Mai kiidi Yesu Kirisi Tamana in ene le ilo ete ke bet di tooltool tipayiti ye.
Di Tooltool Yo Tipa Ye Rara Kidi Yuda Tiap Nga, Ngan Tilongo Bingi Dook Mata Lapau
7 Le dookoot nga,
ole lomu ponana ye di diemu atu atu nga le imot a kakap di pang,
dawa ben Kirisi yo lon ponana yang bet kaye kanepe i.
Ngan kayei nen,
a bet nen ngan kayeie Maro ene le ilo ete.
8 Yesoo,
au awete pang nen,
Kirisi in isi nga bet si iyei kapraingi pang di Yuda bet ilon di.
Ye in iyei nen nga bet ipitnaia betanga ke Maro in ben betanga moolmool,
inbe ye dada tani yo nen i,
in bet iyei betanga medana tina yo Maro iwete pang di sasa kidi ye ngan le kanono pombe moolmool.
9 Ngan di Yuda leu tiap,
bong bet nen a di tooltool yo tipa ye rara kidi Yuda tiap nga,
ngan ole tiyeie Maro ene le ilo ete ke bet di tooltool tipayiti,
yesoo tikamata ye yo iyei dada dook mata a lon mulumulu ye di tooltool nga.
Ngan nen le dawa ben tina Rau ke Maro iwete nga,
“Le au i ole ayitmaka em kataunu ke di tooltool yo tipa ye rara kidi Yuda tiap nga.
Inbe ole awouo woungu yo bet ayitmaka em ye nga.”b
10 Inbe Rau ke Maro iwete mulu nen,
“Ang di tooltool yo kapa ye rara kidi Yuda tiap nga,
ngan kaye di tooltool yo Maro ipootoo di panga,
ngan lomu ponana.”c
11 Inbe iwete mulu nen,
“Ang di tooltool le imot yo kapa ye rara kidi Yuda tiap nga,
ngan kayitmaka Tool Mai ene.
Inbe ang di tooltool ke ni mai i le imot ole kawouo woungu a kayitmaka ene ye.”d
12 Inbe Maro koonoo yo Esai i,
in iwete nen lapau.
Iyei ne,
“Ole sasa ke Yesi atu la bet pombe i,
inbe ye in ole iyei tool kuto mai a matan kala ni mai i le imot i.
Le di tooltool yo tipa ye rara kidi Yuda tiap nga,
ngan ole titar matadi a tinamu ye so dook mata yo bet ikauu pang di i.”e
13 Ngan Maro la iyei ang le katar matamu a kanam ye so yo ipamede betanga ye nga.
Le apatarau panga nen,
bet ole iyei ang le lomu ponana,
inbe kanepe ye lo silene ben yo katara lomu medana panga nga.
Ngan apatarau yang nen,
a bet nen ngan Maro Amunu Silene ipamedang ye gurana ki a kakodo le kamede,
inbe katar matamu a kanamu ye so yo bet iyei pang nga.
Paulu Iyei Urata Bet Ilon Di Tooltool Yo Tipa Ye Rara Kidi Yuda Tiap Nga
14 Ang di diek nga,
au i lok galanga yang nen,
dada kiang yo kayei ngan dook mata,
inbe ang ngan lomu galanga dook ye dada yo bet kayei so ngan itoo dada dook mata ye i.
Le ang ngan ke bet kapatomonai di tooltool kapala lapau.
15 Ngan betanga pattu yo awodo pang ye rau i nga,
ngan betanga medana.
Au i akap betanga pang nen,
bet nen a apamadit lomu ye mulu,
yesoo Maro lono pau a iyei dada dook mata pau le ikaua urata i pau bet ayeii.
16 Ngan nen le au i Maro ipootau bet ayei kapraingi ke Yesu Kirisi a ayei urata kataunu ye di tooltool yo tipa ye rara kidi Yuda tiap nga.
Inbe au i ben tool ke paroranga so,
le awetewete bingi dook mata ke Maro pang di a akap di timan potai ye Maro.
Ngan tina nen nga,
le Maro Amunu Silene iyei di le tinidi igalanga dook mata ye Maro matana,
ben so ke paroranga yo Maro lon ponana ye nga.
17 Ngan la au i ayitmaka Yesu Kirisi ene le ilo ete ke bet di tooltool tipayiti,
yesoo ye in ipamedau bet ayei urata ke Maro.
18 Inbe au i lok bet awetewete ye urata le so yo kapala,
ngan tiap,
bong bet awetewete ye urata tani yo Kirisi ipamedau bet ayeii i.
Ngan ye in la ilonau a akap di tooltool yo tipa ye rara kidi Yuda tiap nga,
a man titara lodi medana pang Maro ye soo betanga le urata yo ayei nga,
19 inbe ye mos matana matana yo ayei ye gurana yo ipa ye Maro Amunu Silene i.
Nen le malala le imot yo iken Yerusalem a ipa so le la Ilirikum nga,
ngan apa bet awetewete bingi dook mata ke Kirisi ye le imot.
20 Ngan au i kanakana ngan so yo lok panga mai mata i,
in nen:
Akapge bet le awetewete bingi dook mata ke Kirisi pang di tooltool yo tilonga tiao nga.
Ngan nen,
yesoo au i lok bet au tauk ape sawa inbe are rumu lo pono,
bong di tooltool kapala tipe sawa,
lo ngan bet are rumu ilo pono,
ngan tiap.
21 Ngan ayei nen le lo ige betanga yo tiwodo a iken ye Rau ke Maro nga,
“Di sima tooltool yo tiwete pang di ye ene pitiao nga,
ngan ole tikamata.
Inbe di sima tooltool yo tilongo bingi dook mata ki pitiao nga,
ngan ole lodi galanga ye.”f
Paulu Iwete Pang Di Rom Bet Ye In Lono Bet Ikamata Di
22 Ngan tina atu ye panga a betebetanga bingi dook mata pang di malala kapala nga,
le taukak manga yo bet amala pang yang ye i.
23-24 Bong dookoot nga ye ni yo awete nin pang koot nga,
ngan malala sa mulu yo iken sorok bet la ayei urata ke Maro ye,
ngan tiap.
Nen le ye kene yo bet adu pang tana mai ke Sipen ye in nga,
ngan au i lok tar bet ole mala akamatang mugu ngan,
lo ngan bet adu.
Ngan au i lok ponana ye yo ayang bet tanepe kasin nga,
yesoo ye rai alunu la au i lok bet mala akamatang pa ye nga.
Le ole ayang tanepe kasin a imot,
lo ngan bet apa nga,
ngan lok bet ang kalonau ye panga kiau yo bet adu pang Sipen ye i.
25 Bong dookoot nga ye panga kiau,
ngan ole amulu pang Yerusalem a alon di tooltool ke Maro yo tinepe ni ngo,
mugu ngan.
26 Yesoo,
di tooltool yo titara lodi medana pang Kirisi a tinepe ye tana maimai Masedonia le Akaia nga,
ngan lodi ponana a titar pat kidi pattu bet tiyawar lo pang Yerusalem bet lo tilon di tooltool ke Maro yo timaka ye so nga.
27 Di tapdi lodi ponana bet tilon di ye pat kidi nen.
Inbe ye dada yo tiyeii nen i,
in dook mata san,
yesoo di ngan so ben bun kidi bet tirau pang di Yuda.
Le kakamata,
dada dook mata yo Maro iyeii pang di tooltool yo tipa ye rara kidi Yuda tiap le ole tikaua nepongo yo taukan motingi i,
in ipa ye di Yuda.
Le dook mata ngan nen,
di nga tilon di Yuda ye nepongo kidi yo ke tana i.
28 Le dookoot nga ole akap loningi kidi tina a lo atar lo di tooltool yo tinepe Yerusalem ngo,
bedi ngan,
lo ngan bet adu pang Sipen kooti.
Le ye kene yo adu ye in nga,
ngan ole apa so le mala matak so ang pa.
29 Nen le au i lok galanga nen,
ye kene yo au bet mala pombe pang yang ye in nga,
ngan ole mala apamedang ye urata dook mata le imot yo bet Kirisi iyei pang nga.
30 Ang di diek nga,
ye Tool Mai kiidi Yesu Kirisi ene,
inbe ye Maro Amunu Silene yo iyei ang a lomu mai san pang di tooltool kapala i,
in ene nga,
ngan atorang nen,
bet kasu au inbe ayang tapatarau le gurada pang Maro bet ilonau.
31 Le kapatarau pang Maro nen,
bet ole ilonau a asur di tooltool ke Yudia yo lodi pang betanga ke Maro tiap a bet tigarungau nga.
Inbe kapatarau bet urata ke Maro yo bet ayei Yerusalem nga,
ngan ole dook mata ye di tooltool ke Maro yo tinepe ni ngo,
matadi.
32 Ngan kumata bet kayei nen le Maro lono dook mata bet amala pang yang nga,
ngan au i ole lok ponana ye kene yo bet mala pombe pang yang ye i.
Inbe ye kene tani,
in ole idi le imot tapamedidi le gurada mulu.
33 Ngan nen le apatarau pang Maro nen,
bet ikaua lo silene ki pang,
inbe inepe yang ang le imot.
Moolmool.