Taraua Pang Di Kuto Maimai A Tanepe Parmadi
13
Ang di tooltool nga le imot ole karaua pang di tooltool kuto maimai kiang a kanepe parmadi.
Yesoo,
di kuto maimai nga di tapdi bet tiyei kuto maimai tiap,
Maro la itar di bet tiyei kuto maimai nga.
Le di kuto maimai yo dookoot tinepe nga,
ngan Maro la itar di nga.
2 Ngan nanga,
sei tool yo lono bet inepe di kuto maimai parmadi tiap i,
in inepe la betanga yo Maro itar bet di kuto maimai tiyei urata ye ngan parmana tiap lapau.
Le di tooltool yo tiyei nen nga,
ngan tiyolo pang di bet tiyemenai di ye dada dook tiap kidi yo tiyei nga.
3 Inbe di kuto maimai nga Maro itar di bet tiyei di tooltool yo tiyei dada dook mata nga,
a bet nen ngan titattadai,
ngan tiap,
bong di tooltool yo tiyei dada dook tiap nga.
Nen le ang tina nga sei lono bet itattadai di kuto maimai tiap nga,
ngan ole iyei dada yo dook mata ngan leu.
Ngan kumata bet iyei nen nga,
ngan ole lodi ponana ye a tipayiti ye.
4 Yesoo,
di kuto maimai tina ngan kapraingi ke Maro.
Inbe Maro itar di a bet tilonang le kanepe dook mata.
Bong kumata le bet ang tina ngan sa bet iyei dada dook tiap nga,
ngan ken itattadai di,
yesoo di ngan,
Maro ikap sorok gurana pang di tiap,
bong bet tiyemenai di ye.
Ngan di ngan kapraingi ke Maro,
le ye punu in la le tipitnaia kate malmal ke Maro pang di tooltool yo tiyei dada dook tiap nga bet tiyemenai di ye i.
5 Ngan la dook mata nen,
ole karaua pang di kuto maimai a kanepe parmadi,
yesoo di ngan ke bet tiyemenai ang,
inbe in dada dook mata tani yo lod wetewete paidi ye bet tatoo lapau i.
6 Le ye punu,
in la kakap pat pang di tooltool kuto maimai,
yesoo di ngan kapraingi ke Maro.
Le ye pat tina yo kakap pang di nga,
ngan la bet kanakana ngan tiyei urata tina yo Maro itar di bet tiyei nga.
7 Le kakap soo so yo di kuto maimai tiwete bet kakap pang di nga.
Le kumata bet tiwete ye kaungu pat nga,
ngan kakap pat pang di bet tiyei urata kidi ye.
Inbe kumata bet tiwete ye geingi urata nga,
ngan kayei urata yo bet kalon di ye nga.
Le di tooltool yo Maro itar di bet katattadai di nga,
ngan katattadai di.
Inbe yo itar di le edi maimai nga,
ngan karaua pang di.
Lodo Pang Di Diede Mai San, Yesoo Lal Ke Tool Mai Yo Bet Isi Ye I, In Potai Oo
8 Ken kagege bun kiang sila ikino le karau tiap,
ngan be.
Bong so ataleu yo bet iyei ben bun pang a bet iken nen i,
in nen;
bet lomu pang di diemu atu atu mai san.
Ngan nen le sei tool yo lono pang di diene mai san i,
in itoo wer le imot yo ke Maro nga.
9 Ngan wer kapala yo Maro iwete ngan nen,
“Ken kuyei bauk be,”
inbe “Ken kuraumata di tooltool be,”
inbe “Ken kupinau be,”
inbe “Ken matamu gorengana ye so kidi tooltool kapala be.”a
Bong wer yo iduk wer kapala nga le imot a igaua le ataleu,
in nen:
“Lom pang di diem mai san dawa ben yo ong taum lom pong mai san nga.”b
10 Kumata bet lomu pang di diemu mai san nga,
ngan ke bet kuyei dada dook tiap sa pang di tiap.
Ngan la sei tool yo lono pang di tooltool kapala mai san i,
in itoo wer ke Maro dook mata le imot.
11 Ngan awete pang bet kayei nen nga,
yesoo ang ngan lomu galanga ye lal yo dookoot nga tanepe ye in oo.
Le kamadit ye ni ke kenongo mata a matamu rere,
yesoo lal yo Maro iwanga Kirisi bet si ikau idi a ipamulidi ye so dook tiap yo bet igarungidi i,
in iman potai oo.
Ngan kulkulunu yege ye kene yo tatara lodo medana pang Kirisi ye in nga,
ngan lal tani in ben iman potai kasin,
bong yo dookoot nga,
lal tani in iman potai oo.
12 Ngan bong i nga potai bet imot,
inbe ke nga bet se pombe.
Le tagege dada dook tiap yo ke todo lono nga,
inbe tayei dada dook mata yo ke kemai nga.
Kumata bet tayei nen nga,
ngan idi nga ole tapanat ye patokongo dawa ben tool ke patokongo yo isousou ye sousoungu medana ke patokongo i.
13 Le idi nga ole tayei dada yo dook mata nga,
dawa ben di tooltool yo tinepe kemai ye ni galangana nga.
Nen le ken tayin ran medana a kutodo moo ye be,
inbe taye di diede tagaua bet tayin ran medana a la tayei dada dook tiap pang di tooltool kapala,
ngan be.
Inbe ken tayei dada dook tiap ke bauk be,
inbe tagarung tiniidi ye dada ben kidi gaunu yo tiyei,
ngan be.
Inbe ken koodoo parkap a tapatoko be,
inbe lodo dook tiap pang di tooltool ye so kidi,
ngan be.
14 Bong takaua Tool Mai Yesu Kirisi dawa ben takaua sousoungu a tasousou ye nga.
Ngan nen le ken lomu kaua urata ye dada dook tiap ke sennene yo tiniidi iyolidi bet la tayei,
ngan be.