Yesu Ikarata Tool Atu Yo Tinin Sarer I, In Ye Lal Kidi Yuda Ke Sungunu
14
Ye kene atu in lal kidi Yuda ke sungunu in pombe,
le nga Yesu ilo bet lo ikan so ye rumu ke tool kuto mai atu kidi Paresi nga,
ngan di tooltool matadi ikenen ye bet tikamata ole iyeie so sa lapau,
too tiap.
2 Ngan tool atu yo tinin sarer i,
in inepe potai pang ye Yesu lapau.
3 Le nga Yesu ikamata tool tani,
motong la itor di kuto maimai ke wer ke Maro tiye di Paresi nen,
“Ai,
nga bet atorang.
Wer ke Maro iwete balai,
bet takarata di tooltool yo matamatenge ikap di nga,
ngan ye lal kidi Yuda ke sungunu lapau,
too tiap?”
4 Bong ngan tiwete toko betanga siap.
Tipas le tipalongo leu.
Le nga Yesu ipaloko bene lo ye tool tani in a ikarata ye matamatenge ki le tinini dook mata mulu,
motong la iwete panga bet ila pang ni ki nga.
5 Motong la Yesu iwete pang di mulu nen,
“Kumata le ang tina ngan atu bet natunu,
too asara ki yo bulumakau,
in bet imol du ran kelingi atu lono ye lal kidi Yuda ke sungunu nga,
ngan ole gelei,
palbe leu be la kayit tarraii a ise ete mulu,
too?”
6 Ngan le tirau toko betanga ki pitiap yege.
Ong Taum Kuyitmakong Be
7 Ye kene tani in Yesu ikamata di tooltool yo tikiu di a tise rumu lono ye mailang tani in nga,
ngan lodi bet lo tiwur ye kakawa yo bet di tooltool edi maimai ngan tiwur ye nga.
Le nga ikatte betanga atu pang di nen,
8 “Kumata bet tool atu ikiu ong a kula ye mailang ke kerenge nga,
ngan ken katem ro lo kuwur ye kakawa kidi tooltool yo edi maimai nga,
ngan be.
Yesoo,
ole nen ngan bet mailang taunu tani in ipootoo tool san yo ene mai le illosong i,
in ye la bet lo iwur ye kakawa tani i.
9 Le kumata bet kuyei nen nga,
ngan mailang taunu yo ikiu ang angru i,
in ole man iwete pong nen,
‘Tool kiau,
kumadit ye kakawa in a kuwi pang tool i a iwur ye.’
Ngan ole moomoom a kumadit le kukoo du kuwur meneng mur yege ni.
10 Ngan nanga,
kumata bet tool atu ikiu ong bet kula ye mailang ki nga,
ngan kulo le lo kuwur ye kakawa yo ke mur nga,
a bet nen ngan tool tani yo ikiu ong i,
in iman le bet man ikamatong nga,
ngan ole iwete pong nen.
Iyei ne,
‘Atoo,
tool kiau,
kumadit a kulo le lo kuwur ye kakawa dook mata meneng ke dama ngo atu.’
Ngan kumata le bet iyei nen pong nga,
ngan ole iyitmaka em la di diem kapala yo kuye di kalo ye mailang tani nga,
ngan matadi.
11 Awete pang nen,
yesoo sei tool yo ye taunu iyitmaki le ilo ete i,
in ole Maro itaru le idu lopo ni.
Bong sei tool yo ye taunu itaru le idu lopo i,
in ole Maro iyitmaki le ilo ete ni.”
12 Motong la Yesu iwete pang Paresi tani yo ikiuu bet man ikan so rumu ki i,
in nen,
“Bet kukiu di tooltool a bet kuye di kakan so kemai,
too rrai nga,
ngan ken kukiu di tooltool kiong,
too di taim le toom,
too di rara kiong kapala,
too di tooltool ballingadi yo tinepe potai yong,
ngan be.
Yesoo,
kumata le bet kuyei nen nga,
ngan pang dama ni nga,
ngan ole di lapau tikiui ong ye kanningi kidi,
inbe tirau kanningi kiong tina.
13 Bong bet kuyeie kanningi kiong atu nga,
ngan kukiu di tooltool yo ballingadi tiap nga,
inbe di tooltool yo turadi ikalel nga,
inbe di tooltool yo kedi dook tiap nga,
inbe di tooltool yo matadi kisis nga.
14 Di ngan o ke bet tiyeie kanningi sa bet tirau so kiong ye,
ngan tiap.
Bong Maro ole iyei urata dook mata pong,
yesoo pang dama ni nga,
ngan ye kene yo Maro bet ipamadit di tooltool noonoodi yo timmata koot ngan le timadit mulu ye ni ke matenge nga,
ngan ole iraukol so kiong tina ngan pong.”
Kattenge Betanga Ke Mailang Maiyoko Atu
15 Di tooltool tina yo tiye Yesu tiwur le tiwakaia kakawa ke kaningi so nga,
ngan atu ilongo tina yo Yesu iwete nen nga,
le nga iwete panga nen,
“Di tooltool yo tilo bet lo tigaua ye di tooltool yo Maro bet matan kala di inbe tiye di tiwur bet tikana mailang tani nga,
ngan Maro ole iyei urata dook mata pang di le lodi ponana.”
16 Bong ngan Yesu iraua betanga ki nen,
“Tool atu in iyeie mailang maiyoko,
motong la ikiu di tooltool alunu la timan bet man tikana mailang ki tani in nga.
17 Ye kene yo ikarata kaningi ke mailang tani in a imot,
motong la iwanga kapraingi ki bet la iwete pang di tooltool yo ikiu di bet man tikana mailang tani ngan nen,
‘Ai,
kaman a tala la kakan so.
Kaningi ngo,
amkarata a imot oo.’
18 “Bong di tooltool tina ngan di le imot lodi bet tila ye mailang tani in tiap,
le nga di atu atu tiwete lodi pang kapraingi tani.
Le nga tool yo ila ye mugu in iwete panga nen,
‘Au i dookoot yege sa ayimi tana atu nga,
le nga bet ala akamata.
Le asogorai ong nen,
o amala ye mailang in tiap.’
19 “Inbe tool san in iwete panga nen,
‘Au i dookoot yege sa ayimi asara yo ene bulumakau ngan sangaul atu nga,
le nga bet ala la ayei toko urata ye di.
Le asogorai ong nen,
o amala ye mailang in tiap.’
20 “Inbe tool san mulu in iyei ne,
‘Au i dookoot yege sa akere paunu nga,
le o ke bet amala ye mailang in tiap.’
21 “Motong la kapraingi tani in ikap betanga kidi tooltool tina,
ngan a imulu la iwete pang tool mai ki a ilongo,
le katen malmal,
le nga iwete pang kapraingi ki tani in nen.
Iyei ne,
‘Oo,
palbe kula la kutoo dada maimai inbe dada kapala ke malala mai i,
le bet kupusye di tooltool yo ballingadi tiap nga,
inbe di tooltool yo turadi ikalel nga,
inbe di tooltool yo matadi kisis nga,
inbe di tooltool yo kedi dook tiap nga,
ngan kop di a timan rumu man tikana mailang kiau i.’
22 “Ngan kapraingi tani in itoo tool mai ki koonoo,
inbe la ikap di tooltool tina a timan rumu.
Bong ikamata rumu ngan ipon tiap,
le nga la iwete pang tool mai ki tani in nen,
‘Tool mai,
kumata nga,
atoo koom bet akap di tooltool tina a tise rumu,
bong rumu lono mai la iken sorok go i.’
23 “Motong la tool mai tani in iwete pang kapraingi ki nen,
‘Kupa le kukapusu malala mai i,
inbe kudu kutoo dada kakase ngo,
inbe la kudada koongoo ke kumu le bet kumata di tooltool sa nga,
ngan kuwete le koom mede pang di a tise,
a bet nen ngan rumu kiau i ipon dook ye di tooltool yo bet tikana mailang i nga.
24 Awete pong nen,
di tooltool yo akiu di mugu bet tise ye mailang kiau ngan le tise tiap nga,
ngan o ke bet tikan toko kaningi naunu ke mailang i pitiap yege.’ ”
Matam Too Ong Dook, Lo Ngan Bet Kutoo Yesu
25 Di tooltool malala mai san la titoo Yesu a tiye tipa nga.
Le nga iportak bet iwete pang di nen,
26 “Kumata tool atu lono bet man itoo au,
bong lono yo itaru pang tamana le tinana,
inbe rimana le di natunu,
inbe di lini le taini,
inbe ye taunu nepongo ki in mai mata le illoso lono yo itaru pau in nga,
ngan o ke bet iyei au galiuk tiap.
27 Inbe sei tool yo lono bet isolo urata moonoo ben kai palasingi ki,
a itoo au tiap i,
in o ke bet iyei au galiuk tiap lapau.
28 “Ngan kumata tool atu lono bet ire rumu mooloo atu pang di tooltool yo itar di bet matadi kala kumu ki nga,
ngan ole iwur inbe lon kaua urata dook ye pat pi yo bet iyimi renge ke rumu tani in ye nga.
A nen ngan matan too,
ole pat ki tina ngan ige renge ke rumu tina yo iyimi ngan bet ire ye le imot,
too tiap.
29 Kumata le iyei nen tiap,
inbe ikel sawa a ipatokodo leu,
inbe rumu tani in kanono o ke bet ire le imot tiap nga,
ngan ole di tooltool tikamata urata ki nen,
le tiyei sere ye a tingeleraii.
30 Inbe ole tiwete nen,
‘Atoo,
kakamata tool ni too,
katen ro ye renge rumu ki ngan iyeisa ole ire le imot.’
31 “Ngan gaongo leu,
kumata tool kuto mai yo matan kala tana mai atu i,
in lono bet la iye tool kuto mai san tipatoko nga,
ngan o ke bet imadit tina le ila la yeru tipatoko tiap.
Bong kulkulunu ngan ole iwur,
inbe lon kaua urata dook ngan,
yesoo ye taunu in tooltool ki ke patokongo ngan kinkatingi kidi ben 10,000 leu.
E tool kuto mai san yo bet man ipamaditi patokongo i,
in di tooltool ki ke patokongo ngan kinkatingi kidi ben 20,000.
Ngan nen le tool kuto mai tani in ole lon wete nen,
‘Ai,
bet amadit ye patokongo nga,
ngan ole gurak le alloso kuto mai san ni ye patokongo i,
too tiap?’
32 Ngan kumata bet tool kuto mai tani in lon kaua urata le lon tar bet o ke bet illosi tiap nga,
ngan ye kene yo kuto mai san tani in inepe manga mooloo go nga,
ngan ole iwanga di tooltool pattu a tila bet la tiwete silli kuto mai tani,
a bet nen ngan lon sil inbe tikarata betanga ke patokongo tani le imot.
33 Ngan gaongo leu,
kumata ang tina ngan atu bet iwala murini pang so ki ke tana nga le imot tiap nga,
ngan o ke bet iyei au galiuk tiap lapau.”
Kattenge Betanga Ke Tiek Yo Taukan Gurana I
34 Motong la Yesu iseke betanga ki mulu nen,
“Tiek in so dook mata,
bong kumata bet gurana ki imot nga,
ngan ole kuyeie tiek tani in balai bet iyei tiek mulu nga?
35 Ngan tiek yo taukan gurana nen i,
in dook mata ke bet tatar lo ye asara tedi yo tigaun pang penge so,
nga tiap,
inbe o ke bet iyeie tana le gurana tiap lapau.
Bong bet nen ngan takatte.
Sei tool bet talngana ke longono betanga nga,
ngan itar talngana dook a ilongo betanga kiau nga.”