3 Erot tani,

in mugu ngan iwete le di tooltool ki tikaua Yowan a tipauu,

motong la titaru lo rumu dook tiap kidi talnga dikidiki lono,

yesoo Yowan ipasak panga ye yo iyooloo toonoo Pilip rimana yo Erodias in nga.

4 Ye kene tani in Yowan iwete pang Erot nen,

“Ong i nga kopsap ye wer ye yo kuyooloo garup in nga.”

5 Ngan nen le Erot lono mai san bet iraumata Yowan a imata,

bong itattadai di tooltool ke Yuda,

yesoo di ngan tikamata Yowan ben ye in Maro koonoo atu.

6 Tinepe,

tinepe,

le tilo ye kene yo bet lodi tut ye lal yo Erot tinana ipasuiu ye i,

motong la iyeie kanningi maiyoko atu bet tikanen ye lal tani in.

Inbe ye kene tani in Erodias natunu garup,

in man iki la di tooltool maimai tina matadi,

le Erot ikamata ngan lon ponana ye mai san.

7 Le nga Erot ipamede betanga ki pang garup kase tani nen,

“Awete pong moolmool le ete nen.

Soo so yo lom panga mai mata i,

in kuweta,

ngan ole akauu pong.”

8 Motong la garup kase tani la itoro tinana ye so yo bet Erot ikauu panga i,

ngan tinana iwete panga ye Yowan yo irriu di tooltool in kutono.

Le nga itoo tinana koonoo a imulu la iwete pang Erot nen,

“Lok bet kukurutu Yowan yo irriu di tooltool,

in gurini,

inbe kunono kutono lo ye tawiri atu a kuwi pau dookoot nga.”

9 Ngan tool kuto mai tani in ilongo betanga ke garup kase tani ngan lon moo ye dook.

Bong ngan ipamede betanga medana a iwete moolmool le ete la di diene tina yo iye di tikan so,

ngan matadi oo,

le nga iwete bet tikaua so yo garup kase tani iwete ye,

in panga.

10 Ngan nen le iwanga di tooltool ki yo bet matadi kala nga,

ngan tilo rumu kidi talnga dikidiki lono a lo tisaputu Yowan tani in gurini.

11 Motong la tikaua kutono a tinona lo tawiri lono,

inbe tikauu pang garup kase tani a ikauu lo ikauu pang tinana.

12 Motong la Yowan di galiunu tilongo bingi ki yo imata koot nga,

le nga timan man tikaua bobono a la tikelmaii.

Motong la tila la tikaua bingi ye pang Yesu nga.

13 Ye kene tani in Yesu ilongo bingi ke Yowan yo imata nga,

motong la igege malala tani,

inbe ipasnaka panga le du iyiri ye ookoo atu a ila pang ye ni balim koonoo atu.

Bong di tooltool alunu tilongo bingi ke Yesu yo ila nga,

motong la tigege malala kidi,

inbe tipa tana a titoo a tila.

14 Le nga ye kene yo la ookoo ki isolo tana ye in nga,

ngan Yesu ikamata di tooltool malala mai tina yo tinepe nga.

Ngan nen le ye in lono pang di,

le nga ikarata di a matamatenge kidi imot,

inbe tinidi dook mata mulu.

15 Tinepe ye ni tani in a du rrai,

motong la Yesu di galiunu timan tiwete panga nen,

“Ai,

ni yo tanepe ye i,

i ni balim koonoo,

inbe nga rrai oo.

Le kuwete pang di tooltool nga a tila pang ye malala kapala,

a bet nen ngan la di tapdi tiyimi kaningi yo bet tikan nga.”

16 Motong la Yesu iraua betanga kidi nen,

“Di tooltool nga o ke bet tila tiap.

Ole ang tapmu kakap kaningi pang di a tikan.”

17 Ngan di galiunu tiwete panga nen,

“Ona tiap!

Am nga porong kiam nga dukumu limi,

inbe i paranga kiam nga ru leu.”

18 Motong la Yesu iwete pang di nen,

“Kakap porong le i ngan man yau.”

19 Inbe iwete pang di tooltool malala mai tina bet du tiwur dingding pono.

Motong la ikap porong dukumu limi ipa ye i ru tina,

inbe itada pang lang katene a iwete lo ponana ki pang Maro ye.

Motong la itepalapala a isuket pang di galiunu bet timalimi di tooltool tina ye a tikan.

20 Ngan di tooltool tina ngan di le imot tikan tikan le lo kapodi sung dook.

Motong la di galiunu tiwinnoko kaningi naunu naunu tina yo tiwulai nga,

ngan le tipadid ye karei sangaul be ru le lo ipon.

21 Ngan kinkatingi kidi tooltool yo tikan so nga,

ngan di tamoto leu ngan ben 5,000.

Bong di garup le kakase kidi yo tiye di tikan so nga,

ngan tikinkat di tiap.

22 Tikan so a imot,

motong la Yesu ipagaigai di galiunu bet tisuku ookoo kidi,

a bet nen ngan tipoi a timugu pang ran koonoo kapala.

E ye taunu in bet sila inepe a itar di tooltool tina a tila pang malala kidi kidi ngan.

23 Itar di a tila,

motong la yetaleu inau a ilo pang kawal bet lo ipatarau.

Ngan ke bet idu iyara a bet ni burrum,

ngan Yesu yetaleu inepe la kawal ngo.

24 E di galiunu tina ngan tipoi a tila ke ran kataunu ni,

a manga mooloo ye tana oo.

Bong eng ipakala di ke dama le nga tirookoorookoo kokor maimai dook.

25 Ngan Yesu inepe kawal le lo pang malama,

motong la idu a ipa ran pono pang ye di a ila.

26 Ipa a ila potai pang ye di,

motong la tikamata yo ipa ran pono a bet ila pang ye di nga.

Le nga titattadai a titangarur,

inbe tisulu.

Tiyei ne,

“Ai,

nisene atu la iman pang yidi i!”

27 Bong palbe leu be Yesu koonoo pang di nen,

“Katattadai be!

I au tani naii.

Ken lomu mede leu.”

28 Motong la Pita iwete panga nen,

“Tool Mai,

bet in ong moolmool nga,

ngan kuwete le apa ran pono a amala pang yong.”

29 Ngan Yesu iyei ne,

“Oo,

nen ngan kuman.”

Motong la Pita ipas a igege ookoo,

inbe idu ipa ran pono a ila pang ye Yesu.

30 Bong ye kene yo ipa a ila ye in nga,

ngan ikamata kokor ke eng tani maimai leu,

le nga itattadai,

inbe kotorbe kasin pang ran lono.

Yo ngan le taun koonoo palbe pang Yesu.

Iyei ne,

“Atoo,

Tool Mai,

kulonau!”

31 Motong la palbe leu be Yesu iro bene du ikauu a iyitmaki,

inbe iwete panga.

Iyei ne,

“Ong i kutara lom medana pau mai mata tiap sa!

Nga gelei,

a le bet lom rru nga?”

32 Ye kene yo yeru tila a tiyiri lo ookoo lono ye in nga,

ngan le eng mai tani in imata.

33 Motong la Yesu di galiunu yo tinepe ookoo lono nga,

ngan tisung panga.

Tiyei ne,

“Moolmool yege,

ong i Maro Natunu moolmool sa.”

34 Motong la tipoi saut a tila,

ngan le la tisolo ye malala atu yo ene Genesaret i.

35 Yeiso bet di tooltool ke malala tani ngan tikilala Yesu,

motong tiwanga pang di tooltool ke malala kapala yo iken potai pang ye malala tani nga le imot.

Le nga di tooltool tina ngan tikap di tooltool kidi yo matamatenge ikap di nga,

ngan a timan pang ye Yesu.

36 Timan,

motong la timangmang ye bet imalum a di tooltool yo matamatenge ikap di nga,

ngan tipas le titoko sousoungu matana ki leu,

a bet nen ngan matamatenge kidi imot.

Ngan nen le di tooltool yo titoka nga,

ngan tinidi dook mata mulu.