Satan Itouo Yesu
4
Motong la Maro Amunu Silene ipasongosongo Yesu bet ila pang ye ni soorookoonoo atu,
a bet nen ngan la tool kuto mai kidi so sidi itoua.a
2 Ngan la Yesu yetaleu inepe ye ni tani nga,
ngan isapariuu le ikan so tiap ye ke le bong sangaul pai le pitolo belebele.
3 Motong la tool dook tiap ke touanga i,
in man pombe pang ye a iwete panga nen,
“Ai,
bet ong i Maro natunu moolmool nga,
ngan kuwete a pat nga tiportak le tiyei porong a kon.”
4 Bong ngan Yesu iraua betanga ki nen,
“Rau ke Maro iwete nen,
‘Porong leu la bet itoko di tooltool ye nepongo kidi,
in tiap,
bong betanga le imot yo ipa ye Maro koonoo nga,
ngan la itoko di tooltool ye nepongo kidi nga.’b ”
5 Motong la tool kuto mai kidi so sidi tani in ikaua Yesu a yeru tilo ye malala mison ke Maro yo Yerusalem i,
a lo ipatokode le ikodo bareme mai ke sungunu pono meneng ete ni,
inbe iwete panga nen.
Iyei ne,
6 “Bet ong i Maro natunu moolmool nga,
ngan kupas le kudu tana ni,
yesoo Rau ke Maro iwete nen,
‘Ole iwanga di bangabangana ki pong a tisipong ye bedi,
a bet nen ngan pat isolo kem katene be.’c ”
7 Bong ngan Yesu iraua betanga ki nen,
“Rau ke Maro iwete lapau nen,
‘Ken kutouo Maro yo Tool Mai kiong,
in be.’d ”
8 Motong la tool kuto mai kidi so sidi tani in ikaua Yesu mulu a yeru tilo kawal kutono meneng ete ni,
a lo ipitnai malala le so matana matana ke tana mai i le imot yo dook mata nga,
ngan panga.
9 Motong la iwete panga nen,
“Kumata bet kugun turum le du damom toko tana,
inbe kusung pau nga,
ngan ole akap so nga le imot pong.”
10 Bong ngan Yesu iraua betanga ki nen,
“Satan,
kukoo yau!
Yesoo,
Rau ke Maro iwete nen,
‘Kusung pang Maro yo Tool Mai kiong i,
inbe kuraua panga yetaleu.’e ”
11 Yesu iwete nen pang tool kuto mai kidi so sidi tani a ikoo ye,
motong la di bangabangana ke Maro tisi a si tiloni.
Yesu Ipamaditi Urata Ki Tana Mai Galili
12 Ye kene yo Yesu ilongo bingi ke Yowan yo titaru lo rumu dook tiap kidi talnga dikidiki lono ye in nga,
le nga imulu a ilo pang tana mai Galili.
13 Ilo,
ngan le igege malala Nasaret,
inbe la inepe ye malala mai yo ene Kapenam i.
Ngan malala mai Kapenam tani in iken potai pang ye ran Galili gigini,
ye tana ke di rara kidi Sebulen le Naptali.
14 Ngan ye dada tani yo Yesu iyeii nen i,
in le iyeie betanga ke Maro koonoo Esai yo iweta in le kanono pombe.
Ngan Esai tani in iyei ne,
15 “Ang di rara ke Sebulen le Naptali nga kalongo.
Ang ngan di tooltool yo kanepe pang ke tiek du nga,
inbe ang ngan di tooltool yo kanepe potai pang ye ran Yodan koonoo kapala nga,
inbe ang ngan di tooltool yo kanepe ye tana mai Galili ye ni yo di tooltool yo tipa ye di rara kidi Yuda tiap ngan tinepe ye i.
16 Di tooltool kiang yo tinepe todo lono nga,
ngan tikamata sul maiyoko.
Inbe di tooltool kiang yo todo mai ke matenge iduk di nga,
ngan sul tani in ilangarai di lapau.”f
17 Ye kene tani in Yesu ipamaditi urata ki ke bet iwetewete bingi dook mata ke Maro pang di tooltool.
Ngan le iwete pang di nen,
“Kaportak lomu,
yesoo mooloo tiap,
inbe dada yo Maro bet matan kala di tooltool ki ye i,
in ole si pombe mallangana.”
Yesu Ikiu Di Tooltool Pai Ke Yoosoongoo
18 Motong la Yesu ipelele ran koonoo Galili a ila,
ngan ikamata di tooltool ru,
yeru ngan taidi le toodi.
Ngan atu,
in ene la Simon i,
inbe tiwete ene san ye Pita,
in iye taini yo Antares i.
Yeru ngan tikatte pu kidi du ran lono a bet tikap i ye,
yesoo di ngan tiyei urata ye kaungu i bet tiyawar a tikap pat ye.
19 Bong ngan Yesu ipusye di nga,
le nga iwete pang di nen,
“Suru nga,
kaman katoo au.
Ang ngan di tooltool ke kaungu i,
bong ole apatomonai ang ye urata ke kaungu di tooltool.”
20 Yeiso bet iwete pang di nen,
ngan le pattu leu inbe yeru tigege pu kidi sila ikino,
inbe titoo a tiye tila.
21 Yesu iye di suru tina ngan tipa kasin a tila,
inbe ikamata di tooltool ru mulu,
ngan taidi le toodi lapau.
Di tooltool ru tina,
ngan atu ene la Yemis yo Sebedi natunu i,
in iye taini Yowan.
Di ngan tiye tamadi Sebedi tinepe ookoo pono kidi a tikarata pu kidi,
inbe Yesu ikamata di le nga koonoo pang di bet titoo lapau.
22 Yeiso bet yeru tilongo tina yo koonoo pang di nga,
ngan le pattu leu inbe tigege tamadi sila inepe ye ookoo kidi tani,
inbe yeru timadit a titoo Yesu a tila.
Yesu Ikarata Di Tooltool Alunu Yo Matamatenge Ikap Di Nga
23 Yesu ila ipa ye malala kapala ke tana mai Galili in le imot a ipatomonai di tooltool ye rumu kidi Yuda ke gaongo in lono,
inbe iwetewete bingi dook mata pang di tooltool ye dada yo Maro bet matan kala di tooltool ki ye i.
Inbe ikarata di tooltool yo matamatenge matana matana ikap di nga,
ngan le tinidi dook mata mulu.
24 Ngan ye urata tina yo Yesu iyei nen nga,
ngan bingi ki idada a iwakaia tana mai Siria in le imot a tilonga,
le nga tikap di tooltool yo matamatenge matana matana ikap di ngan pang ye Yesu a bet man iyei di le tinidi dook mata mulu.
Le nga di tooltool yo tinidi massingi mai mata nga,
inbe di tooltool yo so sidi idiwidiwi di nga,
inbe di tooltool yo matadi taltalai ngan timol du tana a titangarur nga,
inbe di tooltool yo tikap rama nga,
ngan timan pang ye Yesu,
inbe iyei di le tinidi dook mata mulu.
25 Ngan tina tilongo bingi ke Yesu yo iyei urata nen nga,
le nga di tooltool alunu le alunu san tipa ke Galili,
inbe ke Dekapolis,g
inbe ke Yerusalem le tana mai Yudia,
inbe di tooltool kapala tipa ke malala le imot yo iken ke ran Yodan koonoo kapala nga,
ngan di le imot la tipa a titoo Yesu nga.