Di Tooltool Yo Tiyepe Ye Malala Ke Maro Nga, Ngan Tiyitmaka Ene
19
1 Ngan akamata so tina ngan a imot,
motong la alongo so dawa ben di tooltool malala mai koodi le mai ye malala ke Maro nen.
Tiyei ne,
“Tayitmaka Maro ene!
Ya taleu in la ikau idi a ipamulidi ye so dook tiap yo be igarungidi i.
Ya in gurana ki mai san.
Inbe ene ilo ete ke be di tooltool tipayiti ye.
2 Ngan kanakana ngan ya in ikarata betanga kidi tooltool ye dada dook tiap kidi yo tiyei nga,
ngan le itoo dada dook mata yo moolmool inbe tarantatu ngan le imot.
Nen le iyemenaia garup mai lekelekene tani yo igarung di tooltool le imot ke tana i ye dada dook tiap ki ke bauk nga.
Muku ngan garup tani in iraumata di kapraingi ke Maro a rara kidi imati du tana,
ngan la le Maro iraua urata dook tiap ki yo iyeii i,
in kootoonoo panga nga.”
3 Le nga alongo di tooltool tina ngan tiwete nen a imot,
motong la koodi mulu le mai nen,
“Tayitmaka Maro ene!
Yesoo,
ei yo ikana malala mai Babilon i,
in kutana ole ilo pang ete a iken nen le taukan motingi.”
4 Di tooltool tina ngan tiwete nen a imot,
motong la di kuto maimai ke malala ke Maro yo sangaul ru inbe pai ngan tiye di so mauredi tina yo pai nga,
ngan tigun turudi le du damodi toko tana,
inbe tisung pang Maro yo iwur ye kookoowoo ki ke burungu i.
Inbe tiwete nen,
“Moolmool,
tayitmaka Maro ene!”
5 Ngan tiwete nen a imot,
motong la alongo tool atu kalngana pombe ye kookoowoo ke burungu ke tool kuto mai tani in nen.
Iyei ne,
“Ang di kapraingi ke Maro yo emim maimai inbe yo emim maimai tiap nga,
ngan kayitmaka Maro ene!
Inbe ang di tooltool nga le imot yo katattadaia Maro kiidi a karaua panga nga,
ngan kayitmaka ene lapau!”
6 Le nga alongo tool tani kalngana iwete nen a imot,
motong la alongo so mununu san mulu dawa ben di tooltool malala mai kalngadi.
Ngan mununu tani in dawa ben ran idu le gurana a mununube nga,
inbe dawa ben looloo somai itara le gurana nga.
Ngan di tooltool tina ngan tiwete nen,
“Tayitmaka Maro ene!
Yesoo,
Tool Mai kiidi Maro in gurana ki mai san le illos gurana ke so nga le imot,
inbe ya in iyei kuto mai a matan kala so tina nga le imot lapau.
7 Ngan nen le lodo dook mata inbe lod ponana le dook.
Inbe tayeie ene le ilo ete ke be di tooltool tipayiti ye.
Yesoo,
lal yo be Sipsip Natunu tani in ikere ye i,
in pombe oo.
Inbe garup yo be iyooloo i,
in ya taunu ikarata a nga inam.
8 Ngan garup tani in Maro la ikap sousoungu kookoonoo yo puspusngana inbe igalanga le isallin san nga,
ngan panga be isousou ye nga.”
Ngan sousoungu kookoonoo tina ngan inanpootoo dada dook mata noonoonoo yo ke di tooltool ke Maro nga.
9 Motong la bangabangana ke Maro iwete pau nen,
“Nga ole kuwodo betanga nga:
‘Di tooltool yo Maro ikiu di be timan ye mailang mai ke kerenge ke Sipsip Natunu i nga,
ngan lodi ponana,
yesoo ole Maro iyei urata dook mata pang di.’
 ” Motong la bangabangana ke Maro tani in iseke betanga ki kasin mulu nen,
“Ngan betanga yo nga,
ngan betanga moolmool ke Maro.”
10 Le nga iwete nen a imot,
motong la agun turuk le du damok itoko tana potai pang ye kene punu a be asung panga.
Bong ngan iwete pau nen,
“Ai,
kin kuyei nen be!
Au i kapraingi ke Maro dawa ben ong kuye di diem kapala yo titara lodi medana panga a tikodo le timede ye betanga moolmool ke Yesu nga.
Le kusung pang Maro ya taleu!
Yesoo,
Maro Amunu Silene la ipamede di Maro koonoo a tiwetewete betanga moolmool ke Yesu i.”
Tooltool Yo Iwur Oos Kookoonoo Pono I
11 Motong la be matak pang nen nga,
ngan akamata malala ke Maro koon panganga inbe oos kookoonoo atu in ikodo dama kiau.
Inbe tool tani yo iwur oos pono i,
in ene nen,
Tool Yo Itoo Betanga Ki Le Imot i.
Inbe ene san la Tool Yo Iwete Betanga Ngan Moolmool Le Imot i.
Inbe ye kene yo be ipamaditi patokongo too be ikarata betanga ke di tooltool ye in nga,
ngan itoo dada dook mata tarantatu leu.
12 Inbe matana nga ilolo le dawa ben ei loloana,
inbe koomoo yo dawa ben kidi tooltool kuto maimai,
ngan alunu la titar lo iken kutono nga.
Inbe ene yo tiwode ilo ye tinini i,
in tool sa lono galanga ye tiap,
bong ya taunu la lon galanga ye i.
13 Ngan sousoungu ki yo isousou ye i,
in isilil ye rara.
Inbe tiwete ene nen,
Betanga ke Maro.
14 Inbe akamata di tooltool ke patokongo yo ke malala ke Maro nga,
ngan tiwur ye di oos kookoonoo inbe titoo a tila.
Ngan di tooltool tina ngan tisousou ye sousoungu kookoonoo yo puspusngana inbe igalanga san nga.
15 Inbe tool tani yo imuku pang di i,
in pul ke patokongo yo matana welewele in matana pombe ye koonoo.
Ngan pul tani in ke raumatenge di tooltool ke ni mai i le imot.
Inbe tool tani in “ole itoko so dawa ben koro medana ye baene a iyei tool kuto mai pang di tooltool ye.”
a Ngan Maro yo gurana ki mai san le illos gurana ke so nga le imot i,
in katen malmal san,
nen le ole iyirngan di koi ki ngan dawa ben di tooltool tiyirngan ooroo wain puana ye pat gumono yo tikarata pang yirnganingi wain puana i.
16 Ngan ye sousoungu mooloo ke tool tani inbe ye bulene nga,
ngan tiwodo ene nen,
be ya taleu in la Tool Kuto Mai i,
le di tooltool kuto maimai kapala ngan tiyepe ke parmana.
Inbe tiwodo ene san nen be ya taleu in la Tool Mai i,
le di tooltool maimai kapala ngan tiyepe ke parmana lapau.
17 Motong la akamata bangabangana ke Maro atu yo ikodo ke sinana i,
in koonoo le kalngana mai pang di man tina le imot yo tiro lang katene ete ni ngan nen.
Iyei ne,
“Ai,
kaman a man kagaua ye mailang maiyoko ke Maro i,
18 a be nen ngan kakan di kuto maimai yo matadi kala tana i le imot nga,
inbe di kuto maimai ke di tooltool ke patokongo nga,
inbe di tooltool yo turana bulbulini ke patokongo nga,
inbe di oos le tipa ye di tooltool yo tidada ye di nga,
ngan medadi.
Inbe di koi ke Maro nga le imot yo tiyepe ben tooltool ke poranga too tiyepe ben di tooltool ke poranga tiap nga,
inbe di tooltool yo edi maimai too edi maimai tiap nga,
ngan kakan medadi le imot lapau.”
19 Motong la akamata asara gok dook tiap tani,
inbe di kuto maimai ke tana tiye di tooltool kidi ke patokongo nga,
ngan man tigaua a be nen ngan tiye tool tani yo iwur oos pono i,
inbe di tooltool ki ke patokongo tina,
ngan tiye di tipatoko.
20 Bong ngan tool tani yo iwur oos pono i,
in ikaua asara gok tani in a iparama le imede.
Inbe ikaua ene san yo iwete ngan ran ki kaplungunu ye betanga i,
in a iparama le imede lapau.
Ngan muku nga,
ngan tool ke kaplungunu tani in ikaua asara gok tani in nene a iyei gogo mos maimai matana matana.
Nen le ye mos tina yo iyei nga,
ngan le ikap lungunu ye di tooltool yo tikaua tarkilanga ke asara gok tani inbe tisung pang kai padodo ki nga.
Bong ngan le yaru timaurur go,
inbe tikatte di tidu ye gomo yo pat salpa ipa ye ei ikanen ye i.
21 Inbe tool tani yo iwur oos pono i,
in iraumatamata di tooltool kidi ke patokongo nga,
ngan ye pul ke patokongo tani yo pombe ke koonoo a isi i.
Motong la di man tina le imot timan a man tikan di tooltool ke patokongo tina medadi,
ngan le kapodi sung welewele ye.