Bangabangana Ke Maro Ikaua Rau Lulungu Kase Pang Yowan A Ikani
10
1 Motong la akamata bangabangana ke Maro san mulu yo gurana ki mai san i,
in ipa ke malala ke Maro a isi.
Ngan bangabangana tani in iduku tinini mai i le imot ye eng tene,
inbe gannui atu ikodo ke kutono pono.
Inbe damono in isallin dawa ben ke isini nga.
Inbe kene,
ngan ei ikan le ilolo ye dawa ben ei ikana kai kaini a ilo pang ete nga.
2 Ngan bangabangana tani in itoko rau lulungu kase yo tiperenaii in ye baene,
inbe ipadu kene oonoo in le du tukbe tiek pono,
inbe ipadu kene ngas in le du tukbe tana pono.
3 Motong la koonoo le kalngana mai dawa ben asara gok yo laion in ingirir nga.
Ngan ye kene yo koonoo ye in nga,
ngan le looloo limi be ru titara a tiraua koonoo le kalngadi dawa ben di tooltool tiwetewete nga.
4 Inbe ye kene yo looloo tina ngan tiwetewete ye in nga,
ngan lok be le awodo betanga kidi yo tiwetewete nga.
Bong ngan alongo tool atu koonoo ke malala ke Maro nen,
“Betanga yo looloo limi be ru tiwete nga,
ngan kupataukala le iken yong leu,
inbe kin kuwodo ilo ye rau be.”
5 Motong la akamata bangabangana ke Maro tani yo ikodo tiek le tana pono i,
in iyitmaka baene oonoo a ilo pang ye malala ke Maro.
6 Inbe iwete moolmool le ete ye tool tani yo iyepepe nen le taukan motingi i,
in ene.
Ya in tool tani yo itar lang le tana inbe tiek le so tina le imot yo iken ye di nga.
Ngan le iwete nen,
“Lal imot oo,
le ke be tanam mulu tiap!
7 Bong ye kene yo be bangabangana ke Maro yo limi be ru ki i,
in imaia tauru ki nga,
ngan ole Maro iyei so tina yo lon ikaua urata ye a betanga ki iken sollono go nga.
Ngan ole kanono pombe moolmool dawa ben tina yo iwete pang di kapraingi ki yo di Maro koonoo nga.”
8 Motong la tool kalngana tani yo alonga ipa ke malala ke Maro a isi i,
in iwete pau pattu mulu nen,
“Kula ye bangabangana ke Maro yo ikodo tana le tiek pono ni a la kouo rau lulungu yo tiperenaii a iken ye baene ni.”
9 Le nga ala ye bangabangana ke Maro tani a la atoru be ikaua rau lulungu kase tani in pau.
Ngan le iwete pau nen,
“Kouu a koni,
ngan ole koom lono isil ye dook mata dawa ben bagil surunu,
bong kapom lono ole iparpilong ye.”
10 Ngan akaua rau lulungu kase tani ye bangabangana ke Maro in baene a akani,
ngan kook lono isil ye dook mata san dawa ben bagil surunu.
Bong kene yo atona ye in nga,
ngan le kapok lono iparpilong ye dook.
11 Motong la tool atu koonoo pau mulu nen,
“Nga ole kouo Maro koonoo mulu a la kuwete betanga ki ye so yo be pombe pang ye di tooltool ke tana maimai nga,
inbe di tooltool yo kulidi le koodi ki ki nga,
inbe di tooltool yo tiyei kuto maimai pang tana yo maimai ngan le imot nga.”