Sipsip Natunu Ikede Bun Yo Limi Be Ru Ki I
8
1 Ngan ye kene yo Sipsip Natunu tani in ikede bun tina ngan limi be ru ki ye in nga,
ngan le malala ke Maro in ni kisirbe ye manga mooloo kasin.a
2 Motong la akamata di bangabangana ke Maro limi be ru tina yo tikodo dama ke Maro nga,
ngan tikap tauru atu atu le iye di.
3 Inbe bangabangana ke Maro san in iman le man ikodo potai pang ye kookoowoo ke paroranga so pang Maro in gigini.
Ngan kookoowoo ke paroranga so tani in tikarata ye gol a ikodo dama ke kookoowoo ke burungu ke tool kuto mai tani.
Inbe bangabangana tani in itoko ruku yo tikarata ye gol i,
inbe tikap kaiye kai surunu yo kini ki dook mata ngan panga,
a be nen ngan iyei paroranga ye le ipa ye pataraungu ke di tooltool ke Maro nga le imot.
4 Ngan so tina yo iken ye baene nga,
ngan iti du ye kookoowoo ke paroranga so le kutana ipa ye pataraungu tina ngan ilo pang ye Maro.
5 Motong la bangabangana ke Maro tani,
in ikaua ruku tani in la ipaponi ye ei ke kookoowoo ke paroranga so pang Maro i,
inbe ikatte a idu pang tana.
Ngan tina yo ikatte a idu tana nga,
ngan le looloo itara le ni mai i le imot rutunu ye,
inbe kili itai,
inbe nauningi itak lapau.
Di Bangabangana Ke Maro Pai Timai Tauru
6 Motong la di bangabangana ke Maro limi be ru tina yo titoko tauru atu atu nga,
ngan tikarata di a be timai tauru kidi tina.
7 Ngan nen le bangabangana ke Maro yo imuku i,
in imaia tauru ki,
ngan le ki somai imol,
bong ki tani in patunu maimai inbe imede dawa ben madamada.
Inbe ye kene tani in ei yo tipargarungraii ye rara in tikatte le imagirigiri a idu pang tana pono.
Ngan le igarungu tana i nin la nin le dook tiap san dawa ben tipoto tana le imot le iyei patol nga,
ngan le pattu ngan ei ikan le ipa ye kai ki le imot.
Inbe dingding raunu yo ilala nga,
ngan ei ikan le imot lapau.
8 Motong la bangabangana ke Maro tina ngan ru ki,
in imaia tauru ki,
ngan le so dawa ben kawal somai atu yo ei ikanen ye i,
in tikatte le idu tiek lono.
Nen le igarungu tiek mai san dawa ben tipota le iyei patol nga,
ngan le pattu ngan iportak le iyei ben rara,
9 le so matana matana yo tiyepe ye nga,
ngan timmata,
inbe ookoo maimai yo tikooi ye nga,
ngan iraumere di le imot lapau.
10 Motong la bangabangana ke Maro tina ngan tol ki,
in imaia tauru ki,
ngan le kanpitiki somai atu yo ikan le ilolo dawa ben sul i,
in imol ke lang katene a idu le du tukbe ye ran yo maimai nga inbe ye ran gumono yo maimai tiap nga,
ngan podi lapau.
11 Ngan kanpitiki tani in ene la Bar Malingene i,
inbe idu tukbe ngan le igarung ran tina ngan alunu san.
Le ran tina ngan dawa ben tipoto le iyei patol nga,
ngan pattu la iyei le imaling le dook ke yinungu tiap nga.
Nen le di tooltool alunu kaiye la timmata ye ran tani yo malingene in nga.
12 Motong la bangabangana ke Maro tina ngan pai ki,
in imaia tauru ki,
ngan le ke kapala ki in ikan mulu tiap,
bong iportak le iyei ben todo.
Nen le ke tani in ikan dook tiap dawa ben tipota le iyei patol nga,
ngan le pattu ngan ikan tiap.
Ngan nen le ke yo isini muntu le du rrai,
in isini dawa ben muku nga tiap,
bong dawa ben tipoto lal yo be ke isini ye nga le iyei patol,
ngan le pattu ngan isini tiap.
Inbe gaongo leu,
taudu kapala le ipa ye di kanpitiki kapala ngan tikan mulu dawa ben muku ngan tiap lapau.
Nen le kene yo be tikan ye in nga,
ngan ke be tikan bong mooloo le du muntu ngan tiap lapau.
13 Motong la be matak lo pang ete,
ngan akamata bangabangana ke Maro atu yo iro meneng lang katene ete ni,
in alongo kalngana koonoo le mai nen,
“Atoo!
Atoo!
Atoo,
di tooltool yo tiyepe tana pono nga,
ngan ole tikaua urata moonoo masngana dook tiap,
yesoo di bangabangana ke Maro tol yo tiyepe go ngan la be timai porai tauru kidi nga.”